NDIMA nde Yehowa ta vanda pana sambu na nge kana nge vutuka na yandi. Yandi ta sadisa nge na kukangila basusi ntima, na kununga mawi yina me lwala, mpi na kukuma ti ngemba na mabanza mpi na ntima, ngemba yina ke katukaka na kansansa ya bunkete. Na nima, nge lenda wa diaka nzala ya kusadila Yehowa ti bampangi-­Bakristu. Luzingu na nge ta fwanana ti ya Bakristu ya nkaka ya mvu-nkama ya ntete, bayina ntumwa Piere sonikilaka nde: “Beno vandaka bonso mameme yina ke vila nzila, kansi ntangu yai beno me kwisa kuvutuka na ngungudi mpi nkengi ya mioyo na beno.”—1 Piere 2:25.

Kuvutuka na Yehowa kele kibeni kima ya kuluta mbote yina nge lenda sala. Sambu na nki? Nge ta pesa ntima ya Yehowa kiese. (Bingana 27:11) Mutindu nge me zaba yo, Yehowa ke waka kiese mpi mawa, disongidila nde mambu yina beto ke salaka lenda pesa yandi mpasi to kiese. Ya kieleka, Yehowa ke lombaka beto ve na kuzola yandi mpi na kusadila yandi na kingolo-ngolo. (Kulonga 30:19, 20) Muntu mosi ya mayele yina ke longukaka Biblia tubilaka diambu yina mutindu yai: “Ata muntu mosi ve lenda kangula ntima na nge. Nge mosi fwete kangula yo.” Beto lenda ndima kukangula ntima na beto kana beto ke sambila Yehowa ti ntima ya kufuluka na zola. Kana beto sala mutindu yina, beto ta pesa yandi dikabu mosi ya mfunu mingi—kwikama na beto—mpi beto ta pesa ntima na yandi kiese ya mingi. Ya kieleka, ata kima mosi ve lenda fwanana ti kiese yina beto ke waka ntangu beto ke sambilaka Yehowa na mutindu yina ke sepedisaka yandi.—Bisalu 20:35; Kusonga 4:11.

Diaka, kana nge vutukila lusambu na nge ya Bukristu, nzala na nge ya mambu ya kimpeve ta mana. (Matayo 5:3) Inki mutindu? Bantu yina kele na nsi-ntoto ke kudiyulaka nde, ‘Sambu na nki beto kele awa?’ Bo kele ti nzala ya kubaka bamvutu na bangiufula yina me tala lukanu ya luzingu. Bantu kele ti nzala yina sambu Yehowa me gangaka bo ti yo. Yandi ke zola nde beto lungisa nzala yina ntangu beto ke sadila yandi. Ata kima mosi ve lenda fwanana ti kiese ya mingi yina beto ke bakaka ntangu beto ke zabaka nde beto ke sambila Yehowa na zola.—Nkunga 63:1-5.

Zaba nde Yehowa ke zola nde nge vutuka na yandi. Inki mutindu nge lenda ndima diambu yina? Tadila diambu yai: Bo yidikaka kamukanda yai mbote-mbote na nsadisa ya bisambu mingi. Ziku, nkuluntu mosi to na mpangi-Mukristu mosi muntu natilaka nge yo. Na nima, nge bakaka kikesa ya kutanga yo mpi ya kusadila malongi yina kele na kati. Mambu yai yonso ke monisa nde Yehowa me vilaka nge ve. Kansi na mawete yonso, yandi ke benda nge sambu nge vutuka na yandi.—Yoane 6:44.

Beto lenda baka kikesa ya kuzaba nde Yehowa ke vilaka ve ata fioti bansadi na yandi yina me vilaka. Mpangi-nkento mosi na zina ya Donna bakisaka diambu yai. Yandi tubaka nde: “Mono yantikaka kuyambula kieleka malembe-malembe, kansi mono yindululaka Nkunga 139:23, 24 yina ke tuba nde: ‘Fimpa mono, O Nzambi, mpi zaba ntima na mono. Tala mono, mpi zaba bangindu ya ke yangisa mono. Tala kana na kati na mono kele ti nzila ya ke pesa mpasi, mpi twadisa mono na nzila ya mvula na mvula.’ Mono zabaka nde mono vandaka ve muntu ya nsi-ntoto—yo vandaka ve kisika na mono—mpi mono zabaka nde organizasio ya Yehowa vandaka kisika yina mono fwete vanda. Mono yantikaka kumona nde Yehowa me yambulaka mono ve; mono vandaka kaka ti mfunu ya kumona nzila ya kuvutuka na yandi. Yo yina, mono kele kibeni na kiese sambu mono vutukaka!”

Beto kele ti kivuvu nde nge mpi ta wa diaka “kiese ya Yehowa” yina nge vandaka kuwa ntete. (Nehemia 8:10) Nge ta wa ve mawa ata fioti kana nge vutuka na Yehowa.