Mpangi ya beto ke zolaka mingi:

Mutindu nge me zaba yo, Biblia kele ntete-ntete mukanda yina ke tubilaka luzingu ya bantu. Mingi na kati na bo vandaka babakala mpi bankento ya kwikama yina kutanaka ti bampasi yina beto ke kutana ti yo. Bo vandaka ti “mawi bonso ya beto.” (Yakobo 5:17) Bankaka lembaka nitu sambu na bampasi mpi basusi. Bankaka diaka lwalaka ngolo sambu na bangogo yina bampangi na bo ya dibuta to bampangi-Bakristu tubilaka bo. Bankaka lembaka nitu mpi kumaka kudiyangisa sambu na bifu na bo mosi.

Keti bo yambulaka Yehowa kimakulu? Ve. Bamingi vandaka bonso muyimbi-bankunga yina sambaka nde: “Mono me yungana bonso dimeme yina me vila. Sosa nsadi na nge, sambu mono me vilaka ve bantuma na nge.” (Nkunga 119:176) Keti nge ke kudiwa bonso yandi?

Yehowa ke vilaka ve ata fioti bantu yina ke sambilaka yandi, bayina me yambulaka lupangu na yandi. Kansi yandi ke sadisaka bo—mbala mingi, yandi ke salaka yo na nzila ya bampangi na bo Bakristu. Mu mbandu, beto tadila ­mutindu Yehowa sadisaka nsadi na yandi Yobi, yina kutanaka ti bampasi mingi—bampasi ya mbongo, lufwa ya bantu yina yandi vandaka kuzola, mpi maladi ya ngolo. Yobi kangaka mpi ntima sambu na bangogo yina bantu yina yo lombaka bo sadisa yandi vandaka kutuba. Kansi yandi pesaka ve Yehowa mukongo ata fioti, ata na ntangu mosi buna mabanza na yandi kumaka kisaka-saka. (Yobi 1:22; 2:10) Inki mutindu Yehowa sadisaka Yobi na kutadila diaka mambu na mutindu ya mbote?

Yehowa sadisaka Yobi na nzila ya mpangi-Mukristu mosi na zina ya Elihu. Ntangu Yobi tubilaka Elihu basusi na yandi, Elihu widikilaka ntete, na nima yandi tubaka. Inki yandi tubaka? Keti yandi bedisaka Yobi? Sambu na kupesa yandi kikesa, keti Elihu pesaka Yobi foti to nsoni? Keti Elihu vandaka kudimona bonso nde yandi me luta Yobi? Kele ve! Mpeve ya Nzambi sadisaka Elihu, yo yina yandi tubaka nde: “Mono kele kaka bonso nge na meso ya Nzambi ya kieleka; mono mpi salamaka na ntoto ya tuma.” Na nima, yandi lembikaka ntima ya Yobi na bangogo yai: “Boma na mono fwete titisa nge ve, mpi ata ngolo mosi ve ya ke katuka na mono fwete lutila nge.” (Yobi 33:6, 7) Na kisika ya kuyika mpasi na zulu ya bampasi yina Yobi vandaka ti yo, na zola yonso Elihu pesaka Yobi ndongisila mpi kikesa yina yandi vandaka ti yo mfunu.

Zaba nde beto me yidika kamukanda yai sambu na lukanu yina. Ntete beto widikilaka mpi beto tadilaka na dikebi yonso bampasi mpi mambu yina bampangi mingi ya me lembaka tubaka. (Bingana 18:13) Na nima, beto tangaka Biblia mpi tadilaka mbote-mbote masolo yina ke monisa mutindu Yehowa sadisaka bansadi na yandi na bilumbu ya ntama ntangu bo kutanaka ti bampasi ya mutindu mosi. Nsuka-nsuka, beto vukisaka masolo yina kele na Biblia ti mambu yina bampangi ke kutana ti yo bubu yai sambu na kubasisa kamukanda yai. Beto ke lomba nge na kutadila malongi yai mbote-mbote. Ndima zola na beto ya masonga sambu na nge.

Nto-Kimvuka ya Bambangi ya Yehowa