Ntangu Yezu katukaka na nkinsi ya makwela na Kana, yandi kwendaka na Kapernaumi. Yandi kwendaka ti mama na yandi mpi baleke na yandi ya babakala: Yakobo, Yozefi, Simoni, ti Yuda.

Kansi sambu na nki Yezu ke kwenda na Kapernaumi? Mbanza yai kele na kisika ya mbote kibeni kuluta Nazareti to Kana mpi yo kele nene. Diaka, balongoki ya Yezu mingi ya mpa vandaka kuzinga na Kapernaumi to pene-pene na yo. Yo yina, Yezu lendaka kupesa bo malongi ya nkaka na bwala na bo.

Ntangu Yezu kele na Kapernaumi, yandi me sala mambu ya kuyituka. Yo yina, bantu mingi ya mbanza yina mpi ya babwala ya pene-pene, me wa mambu yina yandi me sala na Kapernaumi. Kansi sambu Yezu ti banduku na yandi kele Bayuda ya me kudipesaka na Nzambi, yo lombaka nde bo kwenda kukonda kusukinina na Yeruzalemi sambu na kusala Nkinsi ya Paki ya mvu 30 ya ntangu na beto.

Ntangu bo kumaka na Tempelo, balongoki ya Yezu monaka diambu mosi ya kuyituka yina bo me monaka ntete ve na Yezu.

Nsiku ya Nzambi vandaka kutuba nde bantu ya Izraele fwete pesa bimenga ya bambisi na tempelo, mpi bantu yonso yina vandaka kukwisa na Yeruzalemi vandaka na mfunu ya madia na nsungi ya bilumbu yina bo vandaka kulutisa pana. Yo yina, Nsiku vandaka kupesa nswa na bantu yina vandaka kukatuka na babwala ya ntama na kunata mbongo sambu na kusumba “bangombe, mameme, bankombo” ti bima ya nkaka ya mfunu na nsungi ya bilumbu yina bo vandaka kulutisa na Yeruzalemi. (Kulonga 14:24-26) Yo yina, bantu ya mumbongo yina vandaka na Yeruzalemi vandaka kuteka bambisi to bandeke na kati ya kibansala ya tempelo. Bantu ya nkaka na kati na bo vandaka kuyiba bantu sambu bo vandaka kuteka bima ntalu.

Yezu waka makasi ya mingi. Yandi losaka mbongo ya bantu yina vandaka kushanze mbongo, yandi balulaka bamesa na bo, mpi yandi kulaka bo. Ebuna yandi tubaka nde: “Beno katula bima yai awa! Beno bika kukumisa nzo ya Tata na mono nzo ya mumbongo!”—Yoane 2:16.

Ntangu balongoki ya Yezu monaka diambu yai, bo yibukaka mbikudulu yina tubaka sambu na Mwana ya Nzambi nde: “Kikesa sambu na nzo na nge ke pela na kati na mono bonso tiya.” Kansi Bayuda yulaka yandi nde: “Inki kidimbu nge lenda songa beto, sambu nge ke sala mambu yai?” Yezu tubaka nde: “Beno bwisa tempelo yai, mpi mono ta tedimisa yo na bilumbu tatu.”—Yoane 2:17-19; Nkunga 69:9.

Bayuda vandaka kuyindula nde Yezu vandaka kutubila tempelo yina vandaka na Yeruzalemi, yo yina bo yulaka yandi diaka nde: “Bo salaka bamvula 46 na kutunga tempelo yai, ebuna nge, keti nge ta tedimisa yo na bilumbu tatu?” (Yoane 2:20) Kansi Yezu vandaka kutubila nitu na yandi, yandi fwanisaka yo ti tempelo. Na nima ya bamvula tatu, balongoki na yandi yibukaka mambu yina ntangu yandi futumukaka.