DILONGI 17
Yezu Ke Vandaka ti Nki Bikalulu?
Ntangu beto ke longukaka mambu yina Yezu tubaka mpi salaka awa na ntoto, yo ke sadisaka beto na kukuma banduku na yandi ya ngolo mpi ya Tata na yandi Yehowa. Inki kele mwa bikalulu ya Yezu yina ke sepedisaka nge? Mpi nki mutindu beto lenda landa mbandu ya Yezu na luzingu na beto?
1. Na nki mambu Yezu kele bonso Tata na yandi?
Na zulu, banda bamvula mingi mpenza, Yezu ke talaka Tata na yandi ya zola mpi ke longukaka mambu mingi na yandi. Yo yina, yandi ke yindulaka, ke kudiwaka mpi ke salaka mambu kaka bonso Tata na yandi. (Tanga Yoane 5:19.) Ya kieleka, Yezu ke landaka mbote-mbote bikalulu ya Tata na yandi. Yo yina yandi tubaka nde: “Muntu yina me mona mono me mona mpi Tata.” (Yoane 14:9) Kana nge ke longuka bikalulu ya Yezu, yo ta sadisa nge na kuzaba Yehowa mbote mpenza. Mu mbandu, kikalulu ya mawa yina Yezu ke vandaka ti yo sambu na bantu ke monisaka nde Yehowa ke kudiyangisaka mpi sambu na nge.
2. Inki mutindu Yezu monisaka nde yandi ke zolaka Yehowa?
Yezu tubaka nde: “Sambu nsi-ntoto kuzaba nde mono ke zolaka Tata, mono ke sala mutindu Tata songaka mono na kusala.” (Yoane 14:31) Ntangu Yezu vandaka na ntoto, yandi monisaka nde yandi ke zolaka Tata na yandi mingi mpenza sambu yandi vandaka kulemfukila yandi ata ntangu yo vandaka mpasi na kusala yo. Diaka, Yezu vandaka kuzola kulonga mambu ya Tata na yandi mpi kusadisa bantu na kusala kinduku ya ngolo ti Tata na yandi.—Yoane 14:23.
3. Inki mutindu Yezu monisaka nde yandi ke zolaka bantu?
Biblia ke tuba nde Yezu ke ‘zolaka mingi bantu.’ (Bingana 8:31, noti na nsi ya lutiti) Yandi monisaka zola yango ntangu yandi vandaka kupesa bo kikesa mpi kusadisa bo na ntima ya mvimba. Yandi salaka mambu ya kuyituka yina monisaka nde yandi kele ngolo mpi ntima-mawa. (Marko 1:40-42) Yandi vandaka kusadila bantu mambu na mawete yonso mpi kukonda kupona-pona. Mambu yina yandi vandaka kutuba vandaka kupesa kikesa mpi kivuvu na bantu yonso ya ntima-masonga yina vandaka kuwa yo. Yezu ndimaka kumona mpasi mpi kufwa sambu yandi ke zolaka bantu yonso. Kansi yandi ke zolaka mingi mpenza bantu yina ke sadilaka malongi na yandi.—Tanga Yoane 15:13, 14.
LONGUKA MAMBU MINGI
Beto tala bikalulu ya nkaka yina Yezu ke vandaka ti yo mpi mutindu beto lenda monisa zola mpi kikalulu ya kukaba bonso yandi.
4. Yezu ke zolaka Tata na yandi
Mbandu ya Yezu ke longa beto mutindu beto lenda monisa nde beto ke zolaka Nzambi. Beno tanga Luka 6:12 mpi Yoane 15:10; 17:26. Na nima ya kutanga konso verse, beno pesa mvutu na ngiufula yai:
-
Inki beto fwete sala sambu na kumonisa nde beto ke zolaka Yehowa bonso Yezu?
Yezu vandaka kuzola Tata na yandi ya zulu mpi yandi vandaka kusolula mbala mingi ti yandi na kisambu
5. Yezu ke zolaka bantu
Yezu ke sosaka ntete mambote ya bantu ya nkaka kansi ve ya yandi mosi. Ata ntangu yandi vandaka ya kulemba, yandi sadilaka ntangu mpi ngolo na yandi sambu na kusadisa bantu. Beno tanga Marko 6:30-44 mpi na nima beno pesa mvutu na bangiufula yai:
-
Mutindu disolo yai me monisa yo, tanga mwa mambu ya Yezu salaka yina monisaka nde yandi ke kudiyangisaka mpenza sambu na bantu ya nkaka.—Tala verse 31, 34, 41 mpi 42.
-
Inki vandaka kupusa Yezu na kusadisa bantu?—Tala verse 34.
-
Mutindu Yezu ke landaka bikalulu ya Yehowa, yo ke longa nge nki sambu na Yehowa?
-
Tanga mwa mambu ya beto lenda sala sambu na kumonisa nde beto ke kuditulaka na kisika ya bantu ya nkaka bonso Yezu.
6. Yezu ke kabaka
Yezu vandaka kukaba ata yandi vandaka ve ti bima mingi mpi yandi ke lombaka beto na kukuma mpi ti kikalulu ya kukaba. Beno tanga Bisalu 20:35 mpi na nima beno pesa mvutu na ngiufula yai:
-
Yezu ke tuba nde nki beto fwete sala sambu na kuvanda na kiese?
Beno tala VIDEO mpi na nima beno pesa mvutu na ngiufula ya ke landa.
-
Tanga mwa mambu ya beto lenda sala sambu na kumonisa kikalulu ya kukaba ata beto kele ve ti bima mingi.
Keti nge zabaka yo?
Biblia ke songaka beto na kusamba Yehowa na zina ya Yezu. (Tanga Yoane 16:23, 24.) Ntangu beto ke sambaka Yehowa na zina ya Yezu, beto ke monisaka ntonda sambu na mambu yina Yezu me salaka sambu na kusadisa beto na kukuma banduku ya Yehowa.
BANTU YA NKAKA KE TUBAKA NDE: “Nzambi ke kipaka ve bampasi na beto.”
-
Inki mutindu mambu yina Yezu salaka ntangu yandi vandaka na ntoto ke monisa nde Yehowa ke kipaka beto?
NA BUNKUFI
Yezu ke zolaka Yehowa mpi bantu. Kana beto me zaba Yezu mbote, yo ta sadisa beto na kuzaba mpi Yehowa mbote mpenza sambu yandi kele bonso Tata na yandi.
Inki Nge Me Simba?
-
Inki beto fwete sala sambu na kumonisa nde beto ke zolaka Yehowa bonso Yezu?
-
Inki beto fwete sala sambu na kumonisa nde beto ke zolaka bantu bonso Yezu?
-
Inki kikalulu ya Yezu me sepedisa nge mingi?
TALA MPI
Tala mwa bikalulu ya Yezu yina beto fwete landa.
“Sambu na Kulanda Mbandu ya Yezu, Vanda . . .” (Yezu Kele Nzila, Kieleka, mpi Luzingu, lutiti 317)
Tala sambu na nki beto fwete samba na zina ya Yezu.
“Sambu na Nki Beto Fwete Samba na Zina ya Yezu?” (Disolo ya kele na Nzozulu ya Nkengi)
Keti Biblia ke tubaka mutindu nitu ya Yezu vandaka?
Mutindu Yezu vandaka kusadila bankento mambu ke longa beto nki?
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
