DILONGI 24
Bawanzio Kele Banani mpi Nki Bo Ke Salaka?
Yehowa ke zolaka nde beto zaba dibuta na yandi ya kele na zulu. Dibuta yango kele ti bawanzio yina Biblia ke bingaka nde ‘bana ya Nzambi.’ (Yobi 38:7) Inki Biblia ke tubaka sambu na bawanzio? Inki bo ke salaka sambu na bantu? Keti bawanzio yonso ke vandaka na dibuta ya Nzambi?
1. Bawanzio kele banani?
Yehowa salaka bawanzio na ntwala ya kusala ntoto. Bonso Yehowa, bawanzio ke zingaka na zulu mpi beto lenda mona bo ve. (Baebreo 1:14) Bawanzio kele mingi kibeni mpi bo yonso kele ve mutindu mosi. (Kusonga 5:11) Bo ‘ke zitisaka ndinga ya Yehowa mpi ke lemfukilaka mungungu na yandi.’ (Nkunga 103:20) Na ntangu ya ntama, Yehowa vandaka kutinda bawanzio bantangu ya nkaka sambu na kusonga bansadi na yandi nsangu na yandi, sambu na kusadisa bo mpi kugulusa bo. Bubu yai, bawanzio ke nataka Bakristu na bantu yina ke zola kuzaba Nzambi.
2. Satana mpi bademo kele banani?
Bawanzio ya nkaka kolamaka na Yehowa. Wanzio ya ntete ya kolamaka kele “yina bo ke bingaka Diabulu mpi Satana, yina ke kusaka ntoto ya mvimba.” (Kusonga 12:9) Satana vandaka mpenza ti nzala ya kuyala, yo yina yandi pusaka Adami ti Eva mpi nkutu bawanzio ya nkaka na kukolama na Yehowa. Biblia ke bingaka bawanzio yina kolamaka nde bademo. Yehowa me kulaka bo na zulu, me losaka bo awa na ntoto mpi yandi ta fwa bo.—Tanga Kusonga 12:9, 12.
3. Inki mutindu Satana mpi bademo ke sosaka kukusa beto?
Sambu na kukusa bantu mingi, Satana mpi bademo ke sadilaka bisalu ya bampeve ya mbi, disongidila bo ke pusaka bantu na kusolula ti bo. Mu mbandu bantu ya nkaka ke kwendaka kusolula ti bantu ya ke talaka bambwetete sambu na kuzabisa mambu yina ta salama na bilumbu ke kwisa, bo ke kwendaka kusolula mpi ti bantu ya ke zabisaka bantu mambu ya ta kumina bo, banganga-nkisi mpi bandoki. Bankaka ke kwendaka kubaka lusansu ya ke wakana ti bisalu ya bampeve ya mbi. Nkutu bantu ya nkaka me kumaka kundima nde bo lenda solula ti bantu ya me fwaka. Kansi Yehowa ke kebisa beto nde: “Kukwenda ve na bantu yina ke solulaka ti bampeve ya bafwa, mpi kuyula ve bantu yina ke zabisaka bantu mambu yina ta kumina bo.” (Levi 19:31) Yehowa ke songa beto mambu yai sambu na kutanina beto sambu Satana ti bademo kele bambeni na yandi mpi bo ke zolaka kusala beto mbi.
LONGUKA MAMBU MINGI
Beto tala mambu ya mbote yina bawanzio ke salaka, bigonsa ya bisalu ya bampeve ya mbi mpi mambu ya beto fwete sala sambu na kuditanina na Satana mpi bademo.
4. Bawanzio ke sadisaka bantu na kuzaba Yehowa
Bawanzio ya Nzambi ke kwisaka ve kimuntu-kimuntu sambu na kulonga bantu nsangu ya mbote. Kansi bo ke nataka bansadi ya Nzambi na bantu yina ke vandaka na mfunu ya kuzaba yandi. Beno tanga Kusonga 14:6, 7 mpi na nima beno pesa mvutu na bangiufula yai:
-
Sambu na nki beto ke vandaka na mfunu ya lusadisu ya bawanzio sambu na kulonga nsangu ya mbote?
-
Keti yo ke pesa nge kikesa mutindu nge me zaba nde bawanzio ke nataka nge na bantu yina ke vandaka na mfunu ya kuwa mambu ya Biblia? Sambu na nki?
5. Buya bisalu ya bampeve ya mbi
Satana ti bademo kele bambeni ya Yehowa. Bo kele mpi bambeni na beto. Beno tanga Luka 9:38-42 mpi na nima beno pesa mvutu na ngiufula yai:
-
Inki mambu bademo ke salaka bantu?
Beto fwete bika ve nde bademo kuyala beto. Beno tanga Kulonga 18:10-12 mpi na nima beno pesa mvutu na bangiufula yai:
-
Inki mutindu bademo ke sosaka kuyala beto mpi kusolula ti beto? Inki bisalu ya bampeve ya mbi ke salamaka mingi na kisika ya nge ke zingaka?
-
Keti nge ke mona nde yo kele mbote mutindu Yehowa ke buyisaka beto bisalu ya bampeve ya mbi? Sambu na nki?
Beno tala VIDEO mpi na nima beno pesa mvutu na bangiufula ya ke landa.
-
Nge ke ndima nde nsinga yina Palesa lwatisaka mwana na yandi ya nkento vandaka kigonsa? Sambu na nki?
-
Yo lombaka nde Palesa kusala nki sambu na kuditanina na bademo?
Bakristu ya kieleka ke vandaka ntangu yonso bambeni ya bademo. Beno tanga Bisalu 19:19 mpi 1 Bakorinto 10:21. Na nima beno pesa mvutu na ngiufula yai:
-
Sambu na nki yo kele mfunu na kuyoka to kufwa bima yonso ya kele na kuwakana ti bisalu ya bampeve ya mbi?
6. Nge lenda nunga bitumba ti Satana mpi bademo
Satana kele mfumu ya bademo kansi Mikaele Mfumu ya bawanzio, disongidila Yezu muntu ke twadisaka bawanzio ya Nzambi. Mikaele kele na ngolo ya nki mutindu? Beno tanga Kusonga 12:7-9 mpi na nima beno pesa mvutu na bangiufula yai:
-
Nani kele ngolo mingi, Mikaele ti bawanzio na yandi to Satana ti bademo na yandi?
-
Nge ke yindula nde balongoki ya Yezu fwete wa Satana ti bademo boma?
Nge lenda nunga bitumba ti Satana mpi bademo. Beno tanga Yakobo 4:7 mpi na nima beno pesa mvutu na ngiufula yai:
-
Inki nge fwete sala sambu na kuditanina na Satana mpi bademo?
BANTU YA NKAKA KE TUBAKA NDE: “Yo kele ve mbi na kubula bansaka to kutala bafilme yina ke monisaka bisalu ya bampeve ya mbi. Yo kele kaka nsaka ya mpamba.”
-
Sambu na nki kuyindula mutindu yai kele kibeni kigonsa?
NA BUNKUFI
Bawanzio ya Nzambi ke sadisaka beto. Satana ti bademo kele bambeni ya Yehowa mpi bo ke sadilaka bisalu ya bampeve ya mbi sambu na kukusa bantu.
Inki Nge Me Simba?
-
Inki mutindu bawanzio ya Yehowa ke sadisaka bantu na kuzaba yandi?
-
Satana ti bademo kele banani?
-
Sambu na nki nge fwete buya bisalu ya bampeve ya mbi?
TALA MPI
Tala mambu ya ke monisa nde Yezu kele Mikaele Mfumu ya bawanzio.
“Mikaele Mfumu ya Bawanzio Kele Nani?” (Disolo ya kele na jw.org)
Tala mambu ya ke ndimisa nde Diabulu kele ve kima mosi na bantima ya bantu yina ke pusaka bo na kusala mambu ya mbi.
Tala mutindu nkento mosi katukaka na kimpika ya bademo.
“Yandi Kumaka Kuzinga na Kiese” (Disolo ya kele na Nzozulu ya Nkengi)
Tala mutindu Satana ke sadilaka bisalu ya bampeve ya mbi sambu na kukusa bantu.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
