DILONGI 29
Inki Ke Kuminaka Beto Kana Beto Me Fwa?
Keti muntu mosi ya nge vandaka kuzola mingi me fwaka? Na ntangu yina ya mpasi, mbala ya nkaka nge kudiyulaka nde: ‘Inki ke kuminaka beto kana beto me fwa? Keti beto ta mona diaka bantu ya beto vandaka kuzola mingi yina me fwaka? Na dilongi yai mpi na yina ke landa, beto ta baka bamvutu ya Biblia ya ke pesa kikesa.
1. Inki ke kuminaka beto kana beto me fwa?
Yezu fwanisaka lufwa ti mpongi ya ngolo. Sambu na nki? Sambu kana muntu me lala mpongi ya ngolo, yandi ke zabaka ve mambu yina ke salama na lweka na yandi. Mutindu mosi mpi kana muntu me fwa yandi ke zabaka ve ata kima mpi yandi ke niokwamaka ve ata fioti. Biblia ke tuba nde: “Bafwa ke zabaka kima ve.”—Tanga Longi 9:5.
2. Kuzaba kieleka sambu na bafwa ke natilaka beto nki mambote?
Bantu mingi ke bangaka lufwa mpi nkutu bo ke waka boma ya bantu yina me fwaka. Kansi mambu yina Biblia ke tubaka sambu na lufwa ke pesaka kikesa. Yezu tubaka nde: “Kieleka ta katula beno na kimpika.” (Yoane 8:32) Mabundu ya nkaka ke longaka nde kana muntu me fwa, moyo na yandi ke landaka kuzinga. Kansi yai kele ve mambu ya Biblia ke longaka. Ata muntu mosi ve ke monaka mpasi na nima ya lufwa. Diaka, bafwa lenda sala beto ve mbi sambu bo ke zabaka ve ata kima. Yo yina, yo kele ve mfunu na kusambila bafwa, na kusadila bo mambu sambu bo wila beto ve makasi to mpi na kusamba sambu na bo.
Bantu ya nkaka ke tubaka nde bo ke solulaka ti bantu yina me fwaka. Kansi, mambu yai lenda salama ve ata fioti. Mutindu beto me katuka kumona yo, bafwa ke zabaka ve kima. Na kutuba ya masonga, bantu yina ke tubaka nde bo ke solulaka ti bafwa ke solulaka ti bademo yina ke kudikumisaka bonso bantu yina me fwaka. Yo yina kuzaba kieleka sambu na bafwa ta tanina beto na bademo. Yehowa ke songaka beto na kumeka ve ata fioti kusolula ti bafwa sambu yandi ke zabaka nde kana beto solula ti bademo, bo ta sala beto mbi.—Tanga Kulonga 18:10-12.
LONGUKA MAMBU MINGI
Beto tala mambu mingi ya nkaka yina Biblia ke tubaka sambu na lufwa mpi mutindu kuzaba nde Nzambi ya zola ke niokulaka ve bantu ya me fwaka ta kumisa lukwikilu na nge ngolo.
3. Mutindu muntu ke kumaka kana yandi me fwa
Na ntoto ya mvimba, bantu ke kwikilaka nde mambu ya mutindu na mutindu ke salamaka kana beto me fwa. Ata mpidina, mambu yonso ve ya bo ke kwikilaka ke vandaka ya kieleka.
-
Na kisika ya nge ke zingaka, nki mambu bantu ke kwikilaka sambu na lufwa?
Sambu na kuzaba mambu yina Biblia ke longaka, beno tala VIDEO.
Beno tanga Longi 3:20 mpi na nima beno pesa mvutu na bangiufula yai:
-
Mutindu verse yai me monisa yo, muntu ke kumaka nki mutindu kana yandi me fwa?
-
Keti moyo to mpeve ya muntu ke landaka kuzinga kana yandi me fwa?
Biblia ke tubilaka disolo ya lufwa ya Lazare, nduku ya ngolo ya Yezu. Ntangu beno ke tanga Yoane 11:11-14, beno tala mambu yina Yezu ke tuba sambu na Lazare. Na nima beno pesa mvutu na bangiufula yai:
-
Yezu fwanisaka lufwa ti nki?
-
Yo ke monisa nde muntu ke kumaka nki mutindu kana yandi me fwa?
-
Inki mutindu nge ke kudiwa mpila nge me zaba mambu ya Biblia ke tubaka sambu na bafwa?
4. Kuzaba kieleka sambu na bafwa ke natilaka beto mambote
Beto ta wa diaka ve boma ya bantu yina me fwaka kana beto ke zaba mambu ya kieleka yina Biblia ke tubaka sambu na bo. Beno tanga Longi 9:10 mpi na nima beno pesa mvutu na ngiufula yai:
-
Keti bafwa lenda sala beto mbi?
Kuzaba malongi ya Biblia ke sadisaka beto na kundima ve mambu ya luvunu yina bantu ke salaka sambu bafwa kuwila bo ve makasi to sambu na kusambila bafwa. Beno tanga Yezaya 8:19 mpi Kusonga 4:11. Na nima beno pesa mvutu na ngiufula yai:
-
Nge ke yindula nde Yehowa ke waka nki mutindu kana muntu ke sambila bafwa to ke lomba bo lusadisu?
Kuzaba mambu ya ke kuminaka muntu kana yandi me fwa, ke katulaka beto na kimpika ya mambu yina bantu mingi ke salaka ya ke sepedisaka ve Yehowa
5. Kuzaba kieleka sambu na bafwa ke bwisaka beto ntima
Bo ke longaka bantu mingi nde kana muntu me fwa, yandi ke bakaka ndola sambu na mambu ya mbi yina yandi salaka. Kansi kuzaba nde ata muntu mosi ve ke niokwamaka na nima ya lufwa, ata nkutu muntu yango salaka mambu ya mbi kibeni, ke bwisa kibeni ntima. Beno tanga Baroma 6:7 mpi na nima beno pesa mvutu na ngiufula yai:
-
Biblia ke tubaka nde kana muntu me fwa, yandi me futa mfuka ya masumu na yandi. Nge ke yindula nde bafwa ke niokwamaka sambu na mambu ya mbi yina bo salaka?
Kana beto me zaba kibeni Yehowa mbote, beto ke kumaka mpi kundima mpenza nde yandi lenda niokula ve ata fioti bafwa. Beno tanga Kulonga 32:4 mpi 1 Yoane 4:8. Na nima beno pesa mvutu na bangiufula yai:
-
Keti Nzambi ya kele ti bikalulu yai lenda ndima nde bo niokula bantu yina me fwaka?
-
Keti yo ke bwisa nge ntima mutindu nge me zaba kieleka sambu na bafwa? Sambu na nki?
BANTU YA NKAKA KE TUBAKA NDE: “Mono ke waka boma ya bantu yina me fwaka.”
-
Inki baverse ya Biblia ya ke bwisa ntima, nge lenda tangila bo?
NA BUNKUFI
Kana muntu me fwa, luzingu na yandi me suka. Bafwa ke niokwamaka ve mpi bo lenda sala beto ve mbi.
Inki Nge Me Simba?
-
Inki ke kuminaka beto kana beto me fwa?
-
Kuzaba kieleka sambu na bafwa ke natilaka beto nki mambote?
-
Sambu na nki kuzaba kieleka sambu na bafwa ke bwisaka beto ntima?
TALA MPI
Tala kana ngogo “moyo” ke tendula nki na Biblia.
Tala kana Nzambi ke sadilaka bilungi sambu na kuniokula bantu ya mbi.
Keti Bilungi ya Tiya Kele Mpenza Kisika Yina Bantu Ke Niokwamaka Ngolo? (3:07)
Keti beto fwete wa bantu yina me fwaka boma?
Bampeve ya Bafwa—Keti Bau Lenda Sadisa Nge to Kusala Nge Imbi? Keti ya Kyeleka Bau Kele? (kamukanda)
Tala mutindu bakala mosi bakaka kikesa ntangu yandi zabaka mambu yina ke salamaka kana muntu me fwa.
“Bamvutu ya Mbote mpi ya Pwelele ya Biblia Yitukisaka Mono” (Nzozulu ya Nkengi, Februari 1, 2015)
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
