DILONGI 30
Bantu ya Nge Vandaka Kuzola Yina Me Fwaka Lenda Zinga Diaka!
Lufwa ke pesaka mpasi mpi mawa mingi. Yo yina Biblia ke bingaka yo nde mbeni. (1 Bakorinto 15:26) Na Dilongi 27, beto longukaka nde Yehowa ta katula mbeni yai. Kansi nki yandi ta sala sambu na bantu yina me fwaka dezia? Na dilongi yai, nge ta longuka mambu mingi ya kitoko yina Yehowa ke kana kusala. Yandi ta vutula na luzingu bantu mingi kibeni yina me fwaka sambu bo zinga mvula na mvula na kiese. Yandi ta futumuna bo! Keti mambu yai ta salama mpenza? Keti bantu yina me fwaka ta futumuka sambu na kuzinga na zulu to na ntoto?
1. Inki Yehowa ke kana kusala sambu na bantu yina beto vandaka kuzola yina me fwaka?
Yehowa ke vandaka na nzala ya ngolo ya kuvutula bantu yina me fwaka na luzingu. Yobi, muntu mosi ya vandaka kukwikila mpenza na Nzambi, vandaka kundima kibeni nde Nzambi ta vila yandi ve kana yandi me fwa. Yandi songaka Nzambi nde: “Nge ta binga, mpi mono ta ndima [na maziamu].”—Tanga Yobi 14:13-15.
2. Inki ke ndimisa beto nde bantu yina me fwaka ta futumuka?
Ntangu Yezu vandaka na ntoto, Nzambi pesaka yandi ngolo ya kufutumuna bantu. Yezu futumunaka mwana-nkento mosi ya bamvula 12 mpi mwana-bakala mosi ya nkento ya mufwidi. (Marko 5:41, 42; Luka 7:12-15) Na nima, Lazare nduku ya Yezu fwaka. Ata bilumbu iya lutaka banda Lazare fwaka mpi banda bo zikaka yandi, Yezu vutulaka yandi na luzingu. Yezu sambaka Nzambi mpi tubaka na ndinga ya ngolo nde: “Lazare, kwisa kubasika!” Mpi “muntu yina fwaka kwisaka kubasika.” Lazare vutukaka diaka na luzingu! (Yoane 11:43, 44) Yindula kiese yina banduku ya Lazare mpi bantu ya dibuta na bo waka!
3. Inki kivuvu kele sambu na bantu yina beto vandaka kuzola yina me fwaka?
Biblia ke tubaka nde bantu “ta futumuka.” (Bisalu 24:15) Bantu yina Yezu futumunaka na ntangu ya ntama, kwendaka ve na zulu. (Yoane 3:13) Bo vandaka na kiese ya kuzinga diaka awa na ntoto. Mutindu mosi, Yezu ta futumuna bantu mingi kibeni ntama mingi ve sambu bo zinga na kiese mvula na mvula na paladisu awa na ntoto. Yandi tubaka nde “bantu yonso yina kele na maziamu ya kuyibuka,” nkutu ata bantu yina beto ke yibukaka diaka ve kansi yina kele na mabanza ya Nzambi, ta zinga diaka.—Yoane 5:28, 29.
LONGUKA MAMBU MINGI
Beto tala mambu ya Biblia ke tubaka ya ke ndimisa beto nde bafwa ta futumuka mpi mutindu kuzaba nde bo ta futumuka ke pesaka beto kikesa mpi kivuvu.
4. Yezu monisaka nde yandi kele ti ngolo ya kufutumuna bantu ya kufwa
Beno tala mambu mingi yina Yezu salaka sambu na nduku na yandi Lazare. Beno tanga Yoane 11:14, 38-44 mpi na nima beno pesa mvutu na bangiufula yai:
-
Inki ke ndimisa beto nde Lazare fwaka mpenza?—Tala verse 39.
-
Kana Lazare kwendaka na zulu, nge ke yindula nde Yezu zolaka kuvutula yandi diaka na luzingu awa ntoto?
5. Bantu mingi ta futumuka!
Beno tanga Nkunga 37:29 mpi na nima beno pesa mvutu na ngiufula yai:
-
Bantu mingi yina ta futumuka ta zinga na wapi?
Yezu ta futumuna bantu mingi kibeni, nkutu ata bantu yina vandaka ve kusambila Yehowa. Beno tanga Bisalu 24:15 mpi na nima beno pesa mvutu na ngiufula yai:
-
Banani nge ta zola kumona diaka na luzingu?
Yindula mambu yai: Yezu kele ti ngolo ya kufutumuna bantu kukonda mpasi kaka mutindu tata mosi lenda telemisa mwana na yandi na mpongi
6. Lufutumuku lenda pesa nge kikesa mpi kivuvu
Disolo ya Biblia ya ke tubila mwana ya Yairusi ya nkento ke pesaka kikesa mpi ke lembikaka bantu mingi yina ke bwilaka mafwa. Beno tanga disolo yai ya salamaka mpenza ya kele na Luka 8:40-42, 49-56.
Na ntwala ya kufutumuna mwana ya Yairusi ya nkento, Yezu songaka Yairusi nde: “Kuwa boma ve, vanda kaka na lukwikilu.” (Tala verse 50.) Inki mutindu kivuvu ya lufutumuku lenda sadisa nge . . .
-
kana muntu ya nge vandaka kuzola me fwa?
-
kana luzingu na nge kele na kigonsa?
Beno tala VIDEO mpi na nima beno pesa mvutu na ngiufula ya ke landa.
-
Inki mutindu kivuvu ya lufutumuku pesaka bibuti ya Phelicity kikesa mpi lembikaka bo?
BANTU YA NKAKA KE TUBAKA NDE: “Lufutumuku kele kaka ndosi ya mpamba.”
-
Inki nge ke yindula?
-
Inki verse ya Biblia nge lenda tangila bo sambu na kumonisa nde bantu ta zinga diaka?
NA BUNKUFI
Biblia ke tubaka nde bantu mingi kibeni yina me fwaka ta zinga diaka. Yehowa ke zolaka nde bo vutuka na luzingu mpi yandi me pesaka Yezu ngolo ya kufutumuna bo.
Inki Nge Me Simba?
-
Inki mutindu beto me zaba nde Yehowa ti Yezu ke vandaka ti nzala ya ngolo ya kufutumuna bantu yina me fwaka?
-
Bantu mingi kibeni yina me fwaka ta futumuka sambu na kuzinga na zulu to na ntoto? Sambu na nki nge me tuba mpidina?
-
Inki ke ndimisa nge nde bantu ya nge vandaka kuzola yina me fwaka ta vutuka na luzingu?
TALA MPI
Tala mambu ya mfunu yina nge lenda sala sambu na kukanga ntima na bampasi yina lufwa ke nataka.
“Lusadisu Sambu na Bantu Yina Me Bwila Mpasi ya Lufwa” (Telama! No. 3 2018)
Keti minsiku ya Biblia lenda sadisa mpenza muntu mosi ya me bwila mpasi ya lufwa?
Inki lenda sadisa bana na kukanga ntima ntangu muntu yina bo vandaka kuzola me fwa?
Keti bantu ya nkaka ta futumuka sambu na kuzinga na zulu? Banani ta futumuka ve?
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
