DILONGI 38
Baka Dikabu ya Luzingu na Valere
Luzingu me fuluka ti bima mingi ya kitoko. Ata ntangu beto ke kutanaka ti bampasi, mambu ya nkaka ya luzingu ke pesaka beto kiese. Inki beto fwete sala sambu na kumonisa nde beto ke bakaka dikabu ya luzingu na valere? Inki kele kikuma ya kuluta mfunu ya ke pusaka beto na kusala yo?
1. Sambu na nki beto fwete baka luzingu na valere?
Beto fwete baka luzingu na valere sambu yo kele dikabu yina Yehowa, Tata na beto ya zola, me pesaka beto. Yandi kele “nto ya luzingu” sambu yandi muntu me salaka bima yonso ya ke zingaka. (Nkunga 36:9) “Yandi muntu ke pesaka bantu yonso luzingu, mpema, mpi bima yonso.” (Bisalu 17:25, 28) Yehowa ke pesaka beto bima yonso yina beto ke vandaka na yo mfunu sambu na kuzinga. Katula yina, yandi me yidikaka mambu sambu beto sepela ti luzingu.—Tanga Bisalu 14:17.
2. Inki mutindu beto ke monisaka nde beto ke bakaka na valere dikabu ya luzingu yina Yehowa me pesaka beto?
Yehowa vandaka kutudila nge dikebi banda ntangu mama na nge bakaka divumu na nge. Nkutu Davidi nsadi ya Nzambi, sonikaka mambu yai na nsadisa ya mpeve santu: “Meso na nge monaka mono nkutu ntangu mono vandaka na kati ya divumu.” (Nkunga 139:16) Yehowa ke bakaka luzingu na nge na valere mingi. (Tanga Matayo 10:29-31.) Yandi ke waka mpasi mingi kana muntu mosi me kudifwa to me fwa muntu ya nkaka na luzolo yonso. a (Kubasika 20:13) Diaka, yandi ke waka mpasi kana beto ke tula luzingu na beto na kigonsa kukonda kikuma ya mfunu mpi ke sala ve ata kima sambu na kutanina luzingu ya bantu ya nkaka. Beto ke monisaka nde beto ke bakaka dikabu ya luzingu na valere mingi, kana beto ke tanina luzingu na beto mpi ya bantu ya nkaka.
LONGUKA MAMBU MINGI
Beto tala mambu ya nkaka ya nge fwete sala sambu na kumonisa nde nge ke bakaka luzingu na valere mingi.
3. Tanina sante na nge
Bakristu yina me kudipesaka na Yehowa ke pesaka luzingu na bo ya mvimba sambu na kusadila Yehowa. Yo yina, bo ke taninaka sante na bo sambu na kupesa nitu na bo bonso kimenga ya santu na Nzambi. Beno tanga Baroma 12:1, 2 mpi na nima beno pesa mvutu na bangiufula yai:
-
Sambu na nki nge fwete tanina sante na nge?
-
Tanga mwa mambu ya nge lenda sala sambu na kutanina sante na nge.
4. Tanina luzingu na nge mpi ya bantu ya nkaka
Biblia ke lombaka beto na kubuya mambu ya lenda tula luzingu na beto mosi to ya bantu ya nkaka na kigonsa. Beno tala VIDEO sambu na kumona mwa mambu yina nge fwete sala sambu na kuditanina.
Beno tanga Bingana 22:3 mpi na nima beno tubila mutindu nge mpi bantu ya nkaka lenda kuditanina ntangu beno . . .
-
kele na nzo.
-
kele na kisika ya kisalu.
-
ke sala bansaka.
-
ke pusa kamio, moto, velo, bisi, maswa to ntangu bo ke nata beno.
5. Tanina luzingu ya bebe yina kele na divumu
Davidi tubaka na nkunga mosi nde Yehowa ke tulaka dikebi ya mingi na luzingu ya bebe yina kele na divumu mpi na mutindu yandi ke yelaka. Beno tanga Nkunga 139:13-17 mpi na nima beno pesa mvutu na ngiufula yai:
-
Na meso ya Yehowa, luzingu ya muntu ke yantikaka ntangu mama na yandi me baka divumu na yandi to ntangu yandi me butuka?
Bansiku yina Yehowa pesaka bantu ya Izraele ya ntangu ya ntama vandaka kutanina bamama mpi babebe yina vandaka na mavumu na bo. Beno tanga Kubasika 21:22, 23 mpi na nima beno pesa mvutu na bangiufula yai:
-
Inki mutindu Yehowa vandaka kuwa kana muntu mosi me fwa kukonda kukana bebe yina kele na divumu?
-
Inki mutindu Yehowa vandaka kuwa kana muntu me fwa na luzolo yonso bebe yina kele na divumu? b
-
Mutindu Nzambi ke waka kana muntu mosi me fwa bebe yina kele na divumu ke pusa nge mpi na kuwa nki mutindu?
Ata nkento ya ke bakaka luzingu na valere lenda mona nde kima ya nsuka ya kusala kele kaka kubasisa divumu. Beno tanga Yezaya 41:10 mpi na nima beno pesa mvutu na bangiufula yai:
-
Kana bo ke pusa nkento mosi na kubasisa divumu, yandi fwete sosa lusadisu na nani? Sambu na nki?
BANTU YA NKAKA KE TUBAKA NDE: “Nkento kele nti nswa ya kubasisa divumu to ve sambu yo kele nitu na yandi.”
-
Inki ke ndimisa nge nde Yehowa ke bakaka na valere luzingu ya mama mpi ya mwana yina kele na divumu na yandi?
NA BUNKUFI
Biblia ke longaka beto na kuzola luzingu, kubaka yo na valere mpi kutanina yo sambu yo kele dikabu yina Yehowa me pesaka beto. Yo ke tendula nde beto fwete tanina luzingu na beto mpi ya bantu ya nkaka.
Inki Nge Me Simba?
-
Sambu na nki Yehowa ke bakaka luzingu ya bantu na valere?
-
Inki mutindu Yehowa ke waka kana muntu mosi me fwa muntu ya nkaka na luzolo yonso?
-
Sambu na nki nge fwete baka dikabu ya luzingu na valere mingi?
TALA MPI
Inki mutindu beto lenda pesa Yehowa matondo sambu na dikabu ya luzingu?
Keti Yehowa lenda lolula nkento yina me basisaka divumu? Tala mvutu yina Biblia ke pesa.
“Inki Biblia Ke Tubaka na Yina Me Tala Kubasisa Divumu?” (Disolo ya kele na jw.org)
Tala mutindu beto ke kumaka kupona bansaka ya mbote ntangu beto ke bakisaka nde Nzambi ke bakaka luzingu na valere mingi.
“Keti Beto Fwete Sala ‘Bansaka Yina Ke Tulaka Luzingu na Kigonsa?’” (Disolo ya kele na Telama!)
Tala mutindu Biblia lenda sadisa muntu ya me kuma ti bangindu ya kudifwa.
a Yehowa ke kudiyangisaka mingi sambu na bantu yina kele na mawa. (Nkunga 34:18) Yandi ke bakisaka basusi yina lenda pusa bantu na kukuma ti bangindu ya kudifwa. Yo yina yandi ke zolaka kusadisa bo. Sambu nge mona mutindu yandi ke sadisaka bantu na kukatula bangindu ya kudifwa, tanga disolo “Mono Ke Zola Kufwa—Keti Biblia Lenda Sadisa Mono Ntangu Bangindu ya Kudifwa Ke Kwisila Mono?” na kitini Tala Mpi ya dilongi yai.
b Bankento yina me basisaka mavumu fwete kudiyangisa ve mingi sambu Yehowa lenda lolula bo. Sambu na kuzaba mambu yina Biblia ke tubaka, tanga disolo “Inki Biblia Ke Tubaka na Yina Me Tala Kubasisa Divumu?” na kitini Tala Mpi ya dilongi yai.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
