DILONGI 39
Mutindu Nzambi Ke Tadilaka Menga
Menga kele mfunu mingi kibeni. Ata muntu mosi ve lenda zinga kukonda yo. Nzambi muntu salaka beto, yo yina yandi kele ti nswa ya kusonga beto mutindu beto fwete sadila menga. Inki yandi ke tubaka sambu na menga? Keti beto fwete dia yo to kuvutula yo na nitu? Mpi nki nge lenda sala sambu na kupona balusansu yina ke sepedisaka Yehowa na mambu ya menga?
1. Yehowa ke tadilaka menga nki mutindu?
Yehowa songaka bansadi na yandi ya ntangu ya ntama nde: “Luzingu ya konso kigangwa yina ke zingaka kele menga na yo.” (Levi 17:14) Sambu na Yehowa, menga kele luzingu. Sambu luzingu kele dikabu ya santu yina Nzambi me pesaka beto, menga mpi kele santu.
2. Inki nsiku Nzambi me pesaka sambu na menga?
Yehowa pesaka bansadi na yandi ya ntangu ya ntama nsiku ya kudia ve menga. (Tanga Kuyantika 9:4 mpi Levi 17:10.) Yandi vutukilaka diaka nsiku yai ntangu nto-kimvuka songaka Bakristu na ‘kulanda kubuya . . . menga.’—Tanga Bisalu 15:28, 29.
Kubuya menga ke tendula nki? Yindula mambu yai: Kana munganga me buyisa nge malafu, nge ta nwa yo mpi ve. Ebuna, keti nge ta ndima kudia bima yina bo me vukisa ti malafu to kundima nde bo kotisa nge malafu na nitu na nzila ya misisa? Ata fioti ve. Mutindu mosi mpi ntangu nsiku ya Nzambi ke buyisaka menga, yo ke tendula nde beto fwete nwa ve menga to kudia misuni ya mbisi yina bo me zenga ve mungungu sambu na kubasisa menga to mpi konso kima yina bo me vukisa ti menga.
Inki beto lenda tuba na yina me tala kusadila menga bonso nkisi? Balusansu ya nkaka ya ke lombaka kusadila menga ke fwaka mpenza nsiku ya Nzambi. Mu mbandu, kuvutula muntu menga to kuvutula kitini mosi na kati ya bitini yai ya nene ya menga: Baselile ya mbwaki, baselile ya mpembe, baplaketi mpi plazma. Kansi sambu na balusansu ya nkaka, Biblia ke tubaka ve pwelele kana yo ke fwaka nsiku ya Nzambi to ve. Mu mbandu, kusadila bitini ya fioti-fioti ya menga ya bo me baka na bitini ya nene ya menga. Balusansu ya nkaka ke lombaka kusadila menga ya mbefo yandi mosi. Sambu na balusansu yai, konso muntu na kati na beto fwete baka lukanu yandi mosi. a—Bagalatia 6:5.
LONGUKA MAMBU MINGI
Beto tala mambu ya nge lenda sala sambu na kubaka balukanu ya mbote na balusansu yina ke lombaka kusadila menga.
3. Pona balusansu yina ke sepedisaka Yehowa
Inki nge lenda sala sambu na kupona balusansu yina ke sepedisaka Yehowa na mambu ya menga? Beno tala VIDEO mpi na nima beno pesa mvutu na ngiufula yai: Sambu na nki yo kele mfunu na kusala mambu ya ke landa na ntwala ya kupona balusansu na mambu ya menga?
-
Samba sambu Nzambi kupesa nge mayele.—Yakobo 1:5.
-
Sosa minsiku ya Biblia mpi tala kana yo ke wakana ti balukanu ya nge ke zola kubaka.—Bingana 13:16.
-
Sosa kuzaba balusansu yina bo ke sadilaka menga na kisika ya nge ke zingaka.
-
Sosa kuzaba balusansu yina nge fwete ndima ve ata fioti.
-
Sosa kuzaba kana lukanu yina nge ta baka ta sadisa nge na kulanda kuvanda ti kansansa ya mbote.—Bisalu 24:16. b
-
Kuvila ve nde ata muntu mosi ve, yo vanda bakala to nkento na nge, nkuluntu to mpangi ya ke longaka nge Biblia fwete songa nge lukanu ya kubaka na mambu ya me tala kansansa.—Baroma 14:12.
-
Sonika lukanu ya nge me baka.
4. Bambangi ya Yehowa ke sosaka kubaka lusansu ya mbote
Beto lenda landa kuzitisa bansiku ya Nzambi na yina me tala menga mpi kubaka lusansu ya mbote yina bo me sadila ve menga. Beno tala VIDEO.
Beno tanga Tito 3:2 mpi na nima beno pesa mvutu na ngiufula yai:
-
Sambu na nki beto fwete vanda ntangu yonso luzitu mpi mawete ntangu beto ke solula ti minganga?
|
Mukristu fwete ndima ve |
Mukristu yandi mosi fwete baka lukanu |
|---|---|
|
A. Plazma |
Bitini ya fioti-fioti ya plazma |
|
B. Baselile ya mpembe |
Bitini ya fioti-fioti ya baselile ya mpembe |
|
C. Baplaketi |
Bitini ya fioti-fioti ya baplaketi |
|
D. Baselile ya mbwaki |
Bitini ya fioti-fioti ya baselile ya mbwaki |
5. Kana yo ke lomba kusadila bitini ya fioti-fioti ya menga
Menga ke vandaka ti bitini yai iya ya nene: Baselile ya mbwaki, baselile ya mpembe, baplaketi mpi plazma. Bitini yai iya ya nene ya menga ke vandaka ti bitini mingi ya fioti-fioti. c Bo ke sadilaka bitini ya nkaka ya fioti-fioti ya menga na bankisi yina ke sadisaka menga na kunwanisa bamaladi to yina ke sadisaka yo na kukangama (coagulation) kana muntu me lwala.
Sambu na bitini ya fioti-fioti ya menga, Mukristu yandi mosi fwete baka lukanu na kulanda kansansa na yandi yina yandi me longaka na Biblia. Bakristu ya nkaka lenda buya balusansu yina bo me sadila bitini ya fioti-fioti ya menga. Bankaka kansansa na bo lenda pesa bo nzila ya kundima bitini ya fioti-fioti ya menga.
Ntangu nge ke baka balukanu, kudiyula nde:
-
Sambu na nki mono ke ndima to ke buya nde bo sadila bitini ya nkaka ya fioti-fioti ya menga sambu na kusansa mono? Inki mutindu mono ta tendula yo na munganga yina ta sansa mono?
MUNTU YA NKAKA LENDA YULA NGE NDE: “Kuvutula muntu menga ke gulusaka yandi. Ebuna sambu na nki beno ke tubaka nde yo kele mbi?”
-
Inki mvutu nge ta pesa?
NA BUNKUFI
Biblia ke songaka beto mutindu Yehowa ke zolaka nde beto sadila menga.
Inki Nge Me Simba?
-
Sambu na nki menga kele kima ya santu na meso ya Yehowa?
-
Inki mpila beto me zaba nde bansiku ya Nzambi ya ke buyisaka beto menga ke tadila mpi kuvutula muntu menga?
-
Inki nge lenda sala sambu na kupona balusansu ya mbote na mambu ya menga?
TALA MPI
Inki ta sadisa nge na kupona kana nge ta ndima to ve balusansu yina ke lombaka kusadila menga na nge mosi?
“Bangyufula ya Batangi” (Nzozulu ya Nkengi, Novembri 1, 2000)
Inki nge fwete tadila na ntwala ya kupona kana nge ta ndima to ve bitini ya fioti-fioti ya menga?
“Bangiufula ya Batangi” (Disolo ya kele na Nzozulu ya Nkengi)
Tala mambu ya pusaka munganga mosi na kundima nde Yehowa ke tadilaka menga na mutindu ya mbote.
“Mono Me Ndimaka nde Nzambi Ke Tadilaka Menga na Mutindu ya Mbote” (Disolo ya kele na Telama!)
Tala mutindu bankuluntu yina ke salaka na Bakomite ya Kuwakana ti Balupitalu ke sadisaka bampangi na bo Bakristu.
a Tala Dilongi 35, “Inki Ke Sadisaka Beto na Kubaka Balukanu ya Mbote?”
b Tala kantu-diambu 5 “Kana Yo Ke Lomba Kusadila Bitini ya Fioti-Fioti ya Menga”; Noti 3 “Balusansu ya Ke Lombaka Kusadila Menga.”
c Minganga ya nkaka ke tubaka nde bitini iya ya nene ya menga kele kaka bitini ya fioti-fioti ya menga. Yo yina, yo ta vanda mfunu nde nge tendudila munganga yina ke sansa nge sambu na nki nge ke buya nde bo vutula nge menga to bitini na yo iya ya nene, disongidila baselile ya mbwaki, baselile ya mpembe, baplaketi mpi plazma.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
