DILONGI 43
Inki Biblia ke tubaka Sambu na Malafu?
Bantu yonso ve na ntoto ya mvimba ke tadilaka malafu mutindu mosi. Bantu ya nkaka ke sepelaka kunwa malafu bantangu ya nkaka ti banduku na bo. Bankaka mpi ke zolaka diaka ve kunwa yo ata fioti. Kansi bantu ya nkaka ke nwaka yo mingi mpenza tii kuna bo ke lawukaka. Inki Biblia ke tubaka sambu na malafu?
1. Keti kunwa malafu kele mbi?
Biblia ke buyisaka ve kunwa malafu. Nkutu, ntangu yo ke tubilaka makabu mingi ya kitoko yina Nzambi me pesaka beto, yo ke tubilaka mpi “vinu yina ke pesaka ntima ya muntu kiese.” (Nkunga 104:14, 15) Biblia ke tubaka nde bansadi ya nkaka ya Nzambi yina vandaka kulemfukila yandi vandaka mpi kunwa malafu.—1 Timoteo 5:23.
2. Inki bandongisila Biblia ke pesaka bantu yina ke nwaka malafu?
Yehowa ke buyisaka kulawuka malafu to kunwa yo mingi yo vanda muntu ya me nwa yo me lawuka ve. (Bagalatia 5:21) Ndinga na yandi ke tuba nde: “Kuvanda ve na kati ya bantu yina ke nwaka vinu mingi kibeni.” (Bingana 23:20) Kana beto ke nwa malafu, yo vanda na meso ya bantu to ntangu beto kele beto mosi, beto fwete lutisa ve ndilu. Yo ke tendula nde beto fwete nwa ve na mutindu yina ta sala nde beto yindula diaka ve mbote, beto zaba ve mambu ya beto ke tuba to ke sala mpi na mutindu yina ta bebisa sante na beto. Kana beto ke kuka ve kunwa malafu na kiteso ya me fwana, beto fwete yambula mpenza kunwa yo.
3. Inki beto fwete sala sambu na kuzitisa balukanu ya bantu ya nkaka sambu na malafu?
Konso muntu fwete baka lukanu kana yandi ta nwaka malafu to ve. Yo yina beto fwete sambisa ve muntu yina ke zola kunwa malafu na kiteso ya me fwana mpi beto fwete pusa ve muntu ya nkaka na ngolo na kunwa yo. (Baroma 14:10) Yo ta vanda mbote nde beto buya kunwa malafu kana mutindu na beto ya kunwa yo ke yangisa bantu ya nkaka. (Tanga Baroma 14:21.) Kana beto sala mpidina, beto ta monisa nde beto ke ‘sosaka mambote na beto mosi ve, kansi ya bantu ya nkaka.’—Tanga 1 Bakorinto 10:23, 24.
LONGUKA MAMBU MINGI
Beto tala minsiku ya Biblia yina ta sadisa nge na kupona kana nge ta nwaka malafu to ve, kiteso ya malafu ya nge ta nwaka kana nge me baka lukanu ya kunwa yo mpi mambu ya lenda sadisa nge na kuyambula kikalulu ya mbi ya kunwa malafu mingi.
4. Baka lukanu kana nge ta nwaka malafu to ve
Keti Yezu vandaka kumona nde kunwa malafu kele mbi? Sambu na kubaka mvutu na ngiufula yai, beto tala diambu ya kuyituka ya ntete yina yandi salaka. Beno tanga Yoane 2:1-11 mpi na nima beto pesa mvutu na bangiufula yai:
-
Diambu ya kuyituka yai ya Yezu salaka, ke longa beto nde yandi vandaka kutadila malafu mpi bantu yina vandaka kunwa yo nki mutindu?
-
Sambu Yezu buyisaka ve kunwa malafu, ebuna nki mutindu Mukristu fwete tadila muntu yina ke nwaka yo?
Ata Mukristu kele ti nswa ya kunwa malafu, yo ke tendula ve nde yandi fwete nwa yo konso ntangu. Beno tanga Bingana 22:3 mpi na nima beno tadila mutindu mambu yai ya ke landa lenda sadisa nge na kupona kana nge ta nwa malafu to ve:
-
Nge ke zola kupusa kamio to kusadila masini mosi.
-
Nge kele ti divumu.
-
Munganga me buyisa nge na kunwa malafu.
-
Nge ke kuka ve kunwa malafu na kiteso ya me fwana.
-
Nsiku ya insi na beno ke buyisa nge na kunwa malafu.
-
Nge kele ti muntu mosi ya me buyaka kunwa malafu sambu na bilumbu me luta, yandi salaka bikesa ya kuyambula kunwa malafu mingi.
Keti yo kele mbi na kupesa bantu malafu na bafeti ya makwela to na bafeti ya nkaka? Sambu na kubaka mvutu, beno tala VIDEO.
Beno tanga Baroma 13:13 mpi 1 Bakorinto 10:31, 32. Na nima ya kutanga konso verse, beno pesa mvutu na ngiufula yai:
-
Inki mutindu nge lenda sadila munsiku yai sambu na kubaka lukanu yina ta sepedisa Yehowa?
Konso Mukristu fwete pona kana yandi ta nwaka malafu to ve. Kansi kana yandi me baka lukanu ya kunwaka malafu, bantangu ya nkaka yandi lenda buya mpi kunwa yo
5. Yindula kiteso ya malafu yina nge ta nwaka
Kana nge me baka lukanu ya kunwaka malafu, kuvila ve mambu yai: Yehowa ke buyisaka ve kunwa malafu, kansi yandi ke buyisaka kunwa yo mingi. Sambu na nki yandi ke buyisaka kunwa yo mingi? Beno tanga Ozea 4:11, 18 mpi na nima beno pesa mvutu na ngiufula yai:
-
Inki lenda kumina muntu yina ke nwaka malafu mingi?
Inki lenda sadisa beto na kuyambula kunwa malafu mingi? Beto fwete zaba bandilu na beto to kiteso ya malafu yina beto fwete nwaka. Beno tanga Bingana 11:2 mpi na nima beno pesa mvutu na ngiufula yai:
-
Sambu na nki kuzaba kiteso ya malafu yina nge ta nwaka kele mbote?
6. Nge lenda yambula kunwa malafu mingi
Tala mambu yina sadisaka bakala mosi na kuyambula kunwa malafu mingi. Beno tala VIDEO mpi na nima beno pesa mvutu na bangiufula ya ke landa.
-
Mutindu video me monisa yo, kunwa malafu mingi vandaka kupusa Dmitry na kusala mambu nki mutindu?
-
Keti yandi kukaka kuyambula kunwa yo kaka na mbala mosi?
-
Inki sadisaka yandi nsuka-nsuka na kuvanda diaka ve mpika ya malafu?
Beno tanga 1 Bakorinto 6:10, 11 mpi na nima beno pesa mvutu na bangiufula yai:
-
Sambu na nki kulawuka malafu kele mbi kibeni?
-
Inki ke monisa nde muntu mosi ya ke nwaka malafu mingi lenda yambula kikalulu yai ya mbi?
Beno tanga Matayo 5:30 mpi na nima beno pesa mvutu na ngiufula yai:
-
Ntangu Yezu tubaka nde beto fwete zenga diboko, yandi zolaka kutuba nde beto fwete yambula kusala kima mosi sambu na kusepedisa Yehowa. Inki bikesa nge lenda sala kana nge ke kuka ve kuyambula kunwa malafu mingi? a
Beno tanga 1 Bakorinto 15:33 mpi na nima beno pesa mvutu na ngiufula yai:
-
Inki lenda kumina beto kana beto ke kangama ti bantu yina ke nwaka malafu mingi?
MUNTU YA NKAKA LENDA YULA NGE NDE: “Keti kunwa malafu kele mbi?”
-
Inki mvutu nge ta pesa?
NA BUNKUFI
Yehowa me pesaka beto malafu sambu yo pesa beto kiese. Kansi yandi ke buyisaka kunwa malafu mingi mpi kulawuka yo.
Inki Nge Me Simba?
-
Inki Biblia ke tubaka sambu na malafu?
-
Tanga mwa bigonsa ya kunwa malafu mingi.
-
Inki beto fwete sala sambu na kuzitisa balukanu ya bantu ya nkaka sambu na malafu?
TALA MPI
Inki baleke lenda sala sambu na kubaka balukanu ya mbote sambu na malafu?
Tala mambu ya nge lenda sala sambu na kuyambula kikalulu ya mbi ya kunwa malafu mingi.
“Tula Malafu na Kisika na Yo” (Nzozulu ya Nkengi, Februari 1, 2010)
Keti Bakristu fwete nangula mpi kututisa makopa ya malafu?
“Bangiufula ya Batangi” (Disolo ya kele na Nzozulu ya Nkengi)
Na disolo “Mono Vandaka Kunwa Malafu Mingi Kuluta Bantu ya Nkaka,” tala mambu ya sadisaka bakala mosi na kuyambula kunwa yo mingi.
“Biblia Ke Sobaka Luzingu ya Bantu” (Disolo ya kele na Nzozulu ya Nkengi)
a Bantu yina me kumaka bampika ya malafu lenda sosa lusadisu na minganga sambu bo sadisa bo na kuyambula kikalulu yai ya mbi. Minganga mingi ke tubaka nde bantu yina vandaka ti kikalulu ya kunwa malafu mingi fwete yambula mpenza kunwa yo.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
