KUKUMISA BANTU BALONGOKI
DILONGI 10
Vanda ti Lukanu ya Kukumisa Bantu Balongoki
Munsiku: “Beto vandaka ti lukanu ya kupesa beno kaka nsangu ya mbote ya Nzambi ve, kansi mpi luzingu na beto mosi, sambu beno kumaka bantu ya beto ke zolaka mingi.”—1 Bate. 2:8.
Mambu ya Yezu Salaka
1. Tala VIDEO, to tanga Yoane 3:1, 2. Na nima, tadila bangiufula yai:
-
Mbala ya nkaka, inki pusaka Nikodemo na kukwenda kumona Yezu na mpimpa?—Tala Yoane 12:42, 43.
-
Mutindu Yezu kutanaka ti Nikodemo na mpimpa, inki mutindu yandi monisaka nde yandi vandaka ti lukanu ya kukumisa bantu balongoki?
Mbandu ya Yezu Ke Longa Beto Inki?
2. Beto ta monisa nde beto ke zolaka bantu kana beto kele ti lukanu ya kusadisa bo na kukuma balongoki.
Landa Mbandu ya Yezu
3. Longuka ti longoki na ntangu mpi na kisika ya me fwana sambu na yandi. Yandi lenda zola kulonguka na kilumbu to na ntangu mosi buna. Keti yandi ta kudiwa mbote na kulonguka na kisika na yandi ya kisalu, na nzo na yandi, to na kisika ya bantu mingi ke lutaka? Kana mpila kele, yidika manaka na nge sambu nge longuka ti yandi na ntangu mpi na kisika yina yandi ke zola.
4. Longuka ti yandi mbala na mbala. Kana nge ta zwa ve ntangu, sala yonso sambu beno longuka kaka. Kansi tadila bangindu yai:
-
Keti nge lenda longuka ti yandi na ntangu ya nkaka kaka na mposo yina?
-
Keti nge lenda longuka ti yandi na nzila ya telefone to ya video?
-
Keti nge lenda lomba nsamuni ya nkaka na kulonguka ti yandi?
5. Samba sambu na kuvanda ti mabanza ya mbote. Samba Yehowa sambu yandi sadisa nge na kuyambula ve kulonguka ti longoki na nge, ata yandi ke longukaka ve mbala na mbala to yandi ke sadilaka ve mbala mosi mambu ya yandi me longuka. (Bafil. 2:13) Balongoki na nge lenda vanda ti bikalulu mingi ya mbote; samba sambu nge landa kutudila yo dikebi.
