KUYANTIKA DISOLO
DILONGI 3
Vanda Mawete
Munsiku: “Zola kele . . . ntima-mbote.”—1 Bak. 13:4.
Mambu ya Yezu Salaka
1. Tala VIDEO, to tanga Yoane 9:1-7. Na nima, tadila bangiufula yai:
-
Inki Yezu salaka ntete, yandi belulaka kifwa-meso yina to yandi longaka yandi nsangu ya mbote?—Tala Yoa. 9:35-38.
-
Nge ke yindula nde kana muntu yina ndimaka kuwidikila Yezu, yo vandaka sambu na nki?
Mbandu ya Yezu Ke Longa Beto Inki?
2. Muntu lenda ndima kuwidikila nsangu na beto kana yandi me mona nde beto me tudila yandi dikebi.
Landa Mbandu ya Yezu
3. Kuditula na kisika ya muntu. Meka kudiwa mutindu yandi ke kudiwa.
-
Kudiyula nde: ‘Inki ta vanda ke yangisa yandi? Inki lenda sadisa yandi mpi kupesa yandi kiese?’ Kusala mpidina ta sadisa nge na kumonisa mawete na mutindu ya mbote mpi ya masonga.
-
Widikila muntu sambu na kumonisa nde nge ke tula dikebi na mambu yina kele mfunu sambu na yandi. Kana yandi me songa nge mutindu yandi ke kudiwa sambu na diambu mosi to yandi me songa nge mpasi ya yandi ke kutana ti yo, kusoba ve disolo.
4. Tuba na mawete mpi na luzitu. Kana nge ke wila muntu mawa mpi ke zola kibeni kusadisa yandi, yandi ta bakisa yo na mutindu na nge ya kutuba. Pona bangogo ya mbote mpi mutindu ya mbote ya kutuba, mpi kutuba ve mambu yina ta lwadisa yandi.
5. Sadisa yandi. Sosa mutindu ya kusadisa yandi na mambu yina yandi kele na yo mfunu. Kana nge ke sadila muntu mambu na mawete, yandi lenda ndima kusolula ti nge.
