KUYANTIKA DISOLO
DILONGI 5
Kutuba na Nge Kulwadisa Ve Bantu
Munsiku: “Mambu ya beno ke tuba kuvanda ntangu yonso ya mbote.”—Bakol. 4:6.
Mambu ya Polo Salaka
1. Tala VIDEO, to tanga Bisalu 17:22, 23. Na nima, tadila bangiufula yai:
-
Inki mutindu Polo kudiwaka sambu na mambu ya lusambu ya luvunu yina yandi monaka na Atene?—Tala Bis. 17:16.
-
Na kisika ya kusambisa bantu ya Atene, inki mutindu Polo sadilaka mambu ya bo vandaka kundima sambu na kulonga nsangu ya mbote?
Mbandu ya Polo Ke Longa Beto Inki?
2. Bantu lenda widikila beto kana beto ke pona mbote-mbote mambu ya beto ke tuba, mutindu ya beto ke tuba yo mpi ntangu ya beto ke tuba yo.
Landa Mbandu ya Polo
3. Pona mbote bangogo na nge. Mu mbandu, kana nge ke solula ti muntu yina kele ve Mukristu, nge lenda soba mutindu na nge ya kutubila Biblia to ya kutubila mambu ya Yezu.
4. Kusosa ve kusungika yandi nswalu. Bikila yandi ntangu ya kutuba. Kana yandi me tuba kima mosi ya ke wakana ve ti malongi ya Biblia, kutulana ve ntembe ti yandi. (Yak. 1:19) Kana nge ke widikila yandi, nge ta zaba mambu ya yandi ke ndimaka mpi sambu na nki yandi ke ndimaka yo.—Bing. 20:5.
5. Wakana ti yandi mpi sikisa yandi kana mpila kele. Mbala ya nkaka yandi ke ndimaka nde malongi ya dibundu na yandi kele ya mbote. Sala yonso sambu beno tubila kima yina beno zole ke ndimaka, mpi malembe-malembe, sadisa yandi na kubakisa mambu yina Biblia ke longaka.
