APPENDICE

Nunga Kikalulu ya Kusakana ti Kinama ya Kuvukisila Nitu

TALA NA

Kusakana ti kinama ya kuvukisila nitu kele kikalulu mosi ya mbi na kimpeve yina kenataka muntu na kuyindula kaka mambote na yandi mosi, mpi yo kebebisaka mabanza. * Muntu yina kele ti kikalulu ya kusakana ti kinama na yandi ya kuvukisila nitu lenda kuma kumona bankaka bonso bima ya kuvukisila nitu: bisadilu sambu na kulungisa mpusa ya kuvukisa nitu. Kuvukisa nitu kesalamaka dyaka ve sambu na zola kansi yo kesalamaka kaka kukonda kuyindula sambu na kupesa kyese ya ntangu fyoti mpi kumanisa mpusa ya kuvukisa nitu. Kansi kulembama yai kezingaka ve mingi. Na kutuba ya kyeleka, na kisika ya kufwa bitini ya nitu na yina metala “pite, bamambu ya nsoni, [mpi] nzala ya kusala mambu ya nsoni,” kikalulu ya kusakana ti kinama ya kuvukisila nitu ketedimisaka yo.—Kolosai 3:5.

Ntumwa Polo kusonikaka nde: “Banduku na mono ya mono ke zolaka, . . . beto fweti katula mambu yina yonso ke nataka mbi na nitu na beto ti na ntima na beto, beto fweti tula ngolo na kuvanda mpenza bantu ya Nzambi, beto fweti zitisa Nzambi.” (2 Korinto 7:1) Kana nge kenwana sambu na kuzitisa bangogo yai, kuvidisa ve kivuvu. Yehowa kevandaka ya kuyilama na kulolula mpi na kusadisa. (Nkunga 86:5; Luka 11:9-13) Ya kyeleka, ntima na nge yina kele na kubedisa nge mpi kikesa yina nge kesala sambu na kuyambula kikalulu yai—ata nge kebwa bantangu yankaka—kele kidimbu ya kemonisa nde nge kele ti mabanza ya mbote. Kuvila mpi ve nde, “Nzambi kuluta ntima na beto na nene, yandi mpi zaba mambu yonso.” (1 Yoane 3:20) Nzambi kemonaka kaka ve masumu na beto; kansi yandi kemonaka kimuntu na beto ya mvimba. Nzayilu yai kesadisaka yandi na kuwidikila beto ti mawa ntangu beto kelombaka yandi ndolula na masonga yonso. Yo yina, kulemba ve na kusamba yandi ti kudikulumusa mpi na masonga yonso bonso mwana yina kekwenda na tata na yandi ntangu yandi kele na basusi. Yehowa tapesa nge kansansa ya bunkete. (Nkunga 51:3-14, 19; Yezaya 1:18) Ya kyeleka, yo kelomba nde nge sala na kuwakana ti bisambu na nge. Mu mbandu, nge fwete sala ngolo na kubuya mitindu yonso ya pornografi mpi banduku ya mbi. *

Kana kikalulu na nge ya kusakana ti kinama ya kuvukisila nitu kemana ve, solula dyambu yai ti kibuti na nge yina kele Mukristu to ti nduku mosi ya kuyela na kimpeve mpi ya ketudilaka nge dikebi. *—Bingana 1:8, 9; 1 Tesalonika 5:14; Tito 2:3-5.

^ par. 1 Kikalulu ya kusakana ti kinama ya kuvukisila nitu kele kubweta binama ya kuvukisila nitu, mbala mingi yo kenataka na kyese ya mingi yina muntu kewaka na nima ya kuvukisa nitu.

^ par. 2 Sambu na kulangidila mutindu bo kesadilaka ordinatere ya dibuta, mabuta mingi mebakaka lukanu ya kutula yo na kisika ya bantu yonso. Dyaka, bankaka kesumbaka programe yina kelosaka mambu ya mbi. Kansi, kele ve ti programe yina beto lenda tudila ntima ya mvimba.

^ par. 1 Sambu na bangindu yina lenda sadisa nge na kununga kikalulu ya kusakana ti kinama ya kuvukisila nitu, tala disolo “Les jeunes s’interrogent . . . Comment vaincre cette habitude ?” yina kubasikaka na Réveillez-vous ! ya Novembri 2006, mpi balutiti 178-182 ya mukanda Les jeunes s’interrogent— Réponses pratiques, Buku 1.

“BENO BIKALA NA ZOLA YA NZAMBI”