Inki Biblia Ke Tubaka Sambu na Mbisi ya Bo Ke Bingaka Dinosaure?
Mvutu ya Biblia
Ata verse mosi ve ya Biblia ke tubilaka mbisi yai ya mfinda na pwelele yonso. Kansi Biblia ke tubaka nde Nzambi muntu ‘salaka bima yonso,’ mpidina yo kele pwelele nde mbisi yai kele na kati ya bima yina yandi me salaka. a (Kusonga 4:11) Ata Biblia ke tubilaka ve mbisi yango na pwelele yonso, yo ke tubilaka kimvuka ya bigangwa yina yo lenda vanda nde mbisi yai mpi vandaka na kati:
“Bigangwa ya nene ya nzadi-mungwa,” to “bambisi ya boma.”—Kuyantika 1:21.
“Bambisi yonso ya ke tambulaka divumu na ntoto.”—Kuyantika 1:25.
“Bambisi ya mfinda yina kele na ntoto.”—Kuyantika 1:25.
Keti ba-dinosaure basikaka na bambisi ya nkaka?
Na kisika nde bambisi yai kuyantika kubasika malembe-malembe mutindu dilongi ya evolisio ke tubaka, ba-dinosaure basikaka na mbala mosi mutindu mikwa ya bambisi ya ntama ke monisa yo. Yo ke wakana ti mambu yina Biblia ke tubaka nde, Nzambi salaka bambisi yonso. Mu mbandu, Nkunga 146:6 ke monisa nde Nzambi kele “muntu yina salaka zulu ti ntoto, nzadi-mungwa, mpi bima yonso yina kele na kati na yo.”
Na inki nsungi ba-dinosaure vandaka na luzingu?
Biblia ke monisa nde Nzambi salaka bambisi ya masa mpi ya mfinda na kilumbu ya tanu mpi ya sambanu ya nsungi yina yandi salaka bima. b (Kuyantika 1:20-25, 31) Yo yina na kutadila Biblia, ba-dinosaure salamaka mpi vandaka na luzingu na nsungi ya ntangu mosi ya nda.
Keti bambisi yai Behemoti mpi Leviatani vandaka ba-dinosaure?
Ve. Ata beto me zaba kibeni ve kana bambisi yai ya mukanda ya Yobi ke tubila vandaka inki bambisi, bo ke tubaka nde Behemoti kele kiboko mpi nde Leviatani kele ngandu. Mambu yai ke wakana ti yina Biblia ke tuba na yina me tala mutindu mbisi yango ke vandaka. (Yobi 40:15-23; 41:1, 14-17, 31) Yo vanda mpidina to ve, “Behemoti” ti “Leviatani” lenda vanda ve ata fioti ba-dinosaure. Nzambi songaka Yobi na kutala bambisi yina, mpi Yobi vandaka na luzingu na ntangu yina ba-dinosaure vandaka dezia me vila.—Yobi 40:16; 41:8.
Inki kuminaka ba-dinosaure?
Biblia me tubilaka ve ata kima mosi na yina me tala kuvila ya ba-dinosaure. Kansi yo ke tubaka nde Nzambi salaka bima yonso ‘sambu na luzolo na yandi,’ yo ke monana pwelele nde Nzambi salaka ba-dinosaure sambu na lukanu mosi. (Kusonga 4:11) Ntangu lukanu yango lunganaka, Nzambi bikaka nde ba-dinosaure kuvila na ntoto.
a Mikwa ya bambisi ya mfinda ya ntama ke monisa nde bambisi yai dinosaure vandaka bambisi ya kieleka. Nkutu, mikwa yango ke monisa nde na ntangu mosi buna, bambisi yai vandaka mingi mpi ya mutindu na mutindu; yo vanda babakala to bankento, ya nene to ya fioti.
b Na Biblia, ngogo “kilumbu” lenda monisa nsungi mosi ya bamvula mingi kibeni.—Kuyantika 1:31; 2:1-4; Baebreo 4:4, 11.
Nge Lenda Sepela Mpi Ti
BAMVUTU NA BANGIUFULA YA BIBLIA
Keti Siansi Ke Wakanaka ti Biblia?
Keti Biblia ke tubilaka mambu ya siansi ti bifu?
BAVIDEO YA MALONGI YA MFUNU YA BIBLIA
Keti Nzambi Gangaka Zulu ti Ntoto?
Bantu mingi ke bakisaka ve mambu yina Biblia ke tubaka sambu na mutindu bima yonso yantikaka mpi nkutu bo ke yindulaka nde yo kele masolo ya luvunu. Keti mambu yina Biblia ke tubaka kele ya masonga?
KISINA YA LUZINGU—BANGIUFULA TANU YA ME FWANA NA KUYULA
Inki Mutindu Luzingu Yantikaka?
Kana nge baka mvutu ya mbote na ngiufula yai, yo ta sadisa nge na kukuma kutadila luzingu na mutindu ya mbote.
MALONGI YA MFUNU YA BIBLIA
Sambu na Nki Nzambi Gangaka Ntoto?
Ntoto me fuluka ti bima ya kitoko. Yo kele na kitamina ya me fwana kibeni ti ntangu, yo kele na kisika yina me fwana, mpi yo ke balukaka na vitesi ya me fwana. Sambu na nki Nzambi salaka bikesa ya mingi mutindu yai ntangu yandi gangaka ntoto?
MAMBU YA ME TALA BETO
Lomba nde Mbangi Mosi ya Yehowa Kukwisa Kutala Nge
Tadila ngiufula mosi ya Biblia, to sosa kuzaba mambu mingi na yina me tala Bambangi ya Yehowa.