“Bansapi ya Kimfumu” ke monisa kiyeka ya kukangudila bantu nzila ya ‘kukota na Kimfumu ya Nzambi.’ (Matayo 16:19; Bisalu 14:22) a Yezu pesaka Piere “bansapi ya Kimfumu ya zulu.” Yo ke tendula nde Piere bakaka kiyeka ya kukangula bansangu ya me tala mutindu bantu ya kwikama ta baka dibaku ya kukota na Kimfumu ya zulu kana bo baka mpeve santu ya Nzambi.

Bo sadilaka bansapi yina sambu na banani?

 Piere sadilaka kiyeka ya Nzambi sambu na kukangudila bimvuka tatu ya bantu nzila ya kukota na Kimfumu:

1.   Bayuda mpi Bayuda yina balulaka ntima. Ntangu fioti na nima ya lufwa ya Yezu, Piere siamisaka kimvuka mosi ya Bayuda yina kumaka kukwikila na kundima nde Yezu kele muntu yina Nzambi me pona sambu na kuyala na Kimfumu. Piere songaka bo mambu yina bo fwete sala sambu bo guluka. Na mutindu yina, yandi kangudilaka bo nzila ya kukota na Kimfumu, mpi bantu mingi “ndimaka ndinga na yandi.”​—Bisalu 2:38-41.

2.   Bantu ya Samaria. Na nima, Nzambi tindaka Piere na bantu ya Samaria. b Yandi sadilaka diaka nsapi ya Kimfumu ntangu yandi ti ntumwa Yoane “sambaka sambu bo baka mpeve santu.” (Bisalu 8:14-17) Yo kangudilaka bantu ya Samaria nzila ya kukota na Kimfumu.

3.   Bantu ya makanda. Bamvula tatu ti ndambu na nima ya lufwa ya Yezu, Nzambi songaka Piere nde Bantu ya makanda (bantu yina vandaka ve Bayuda) ta vanda mpi ti dibaku ya kukota na Kimfumu. Yo yina, Piere sadilaka nsapi mosi ntangu yandi zabisaka bantu ya makanda nsangu ya mbote; na mutindu yina, yandi kangudilaka bo kielo sambu bo baka mpeve santu, bo kuma Bakristu, mpi bo baka kivuvu ya kukuma bantu ya Kimfumu.​—Bisalu 10:30-35, 44, 45.

‘Kukota na Kimfumu’ ke tendula nki?

 Bantu yina ke “kota na Kimfumu” ke kuma bantu yina ta yala ti Yezu na zulu. Biblia tubaka na ntwala nde bo ta “vanda na bakiti ya kimfumu” mpi bo ta “yala bonso bantotila na ntoto.”​—Luka 22:29, 30; Kusonga 5:9, 10.

Bangindu ya mbi yina bantu ke vandaka ti yo sambu na bansapi ya Kimfumu

 Ngindu ya mbi: Zulu ke vingilaka Piere sambu yandi pona ntangu ya kusadila bansapi ya Kimfumu.

 Kieleka: Ntangu Yezu tubilaka mambu ya me tala bansapi ya Kimfumu, yandi songaka Piere nde: “Konso kima yina nge ta kanga na ntoto ta vanda kima yina bo me kangaka dezia na zulu, mpi konso kima yina nge ta kangula na ntoto ta vanda kima yina bo me kangulaka dezia na zulu.” (Matayo 16:19) Ata bantu ya nkaka ke yindulaka nde bangogo yai ke tendula nde Piere ke tubaka mambu yina fwete salama na zulu, bisongi-diambu ya Kigreki ya kisina ke monisa nde Piere fwete landa badesizio yina bo me baka dezia na zulu kansi yandi fwete baka ve badesizio na ntwala ebuna zulu kulanda yo. c

 Biblia ke monisa diaka nde Piere landaka bantuma yina katukaka na zulu ntangu yandi sadilaka bansapi ya Kimfumu. Mu mbandu, yandi lemfukaka na bantuma ya Nzambi ntangu yandi sadilaka nsapi ya tatu.​—Bisalu 10:19, 20.