Inki Biblia ke tubaka sambu na bisumbula ya lugangu?

TALA NA

Mvutu ya Biblia

Nzambi ke vandaka ve na kisina ya bisumbula ya lugangu yina ke salamaka bubu yai kansi yandi ke waka mpasi sambu na bantu yina mambu yai ke kuminaka. Bisumbula ya lugangu kele na kati ya mambu yina ke pesaka bantu mpasi yina Kimfumu ya Nzambi ta katula. Nzambi ke pesaka kikesa na bantu yina bisumbula ya lugangu ke bwilaka.—2 Bakorinto 1:3.

Sambu na nki beto lenda ndima nde bisumbula ya lugangu kele ve ndola ya Nzambi?

Biblia ke monisa nde bisumbula ya lugangu me swaswana ti bangolo ya lugangu yina Nzambi vandaka kusadila sambu na kusambisa bantu.

Bisumbula ya lugangu ke fwaka bantu mpi ke bebisaka bima yonso. Kansi, ntangu Nzambi vandaka kusadila bangolo ya lugangu sambu na kusambisa bantu, yandi vandaka kufwa kaka bantu ya mbi. Mu mbandu, ntangu Nzambi fwaka Sodome ti Gomore, yandi gulusaka Loti yina vandaka muntu ya mbote mpi bana na yandi zole ya bankento. (Kuyantika 19:29, 30) Nzambi zabaka bantima ya bantu ya ntangu yina mpi yandi fwaka kaka bantu ya mbi.—Kuyantika 18:23-32; 1 Samuele 16:7.
Bisumbula ya lugangu ke salamaka kukonda nde bantu kuzaba na ntwala. Kansi, Nzambi kebisaka bantu ya mbi na ntwala nde yandi sadila bangolo ya lugangu sambu na kufwa bo. Bantu yina waka balukebisu vandaka ti dibaku ya kutina kisumbula yina.—Kuyantika 7:1-5; Matayo 24:38, 39.
Bantangu ya nkaka, balukanu ya bantu mpi mambu yina bantu ke salaka ke salaka nde bisumbula ya lugangu kusalama. Inki mutindu? Ntangu bo ke bebisaka bisika yina bantu ke zingaka, ke tungaka banzo na bisika yina ntoto ke nikanaka, bisika yina masa ke fulukaka mingi mpi bisika yina ntangu ke vandaka ngolo mpi mvula ke nokaka mingi. (Kusonga 11:18) Beto lenda pesa ve Nzambi foti kana bantu ke baka balukanu ya mbi mpi yo ke natila bo bampasi.—Bingana 19:3.

Keti bisumbula ya lugangu ke monisa nde beto ke zinga na bilumbu ya nsuka?

Ee. Bambikudulu ya Biblia ke monisa nde bisumbula ta salama na “nsukilu ya ngidika ya bima” to na “bilumbu ya nsuka.” (Matayo 24:3; 2 Timoteo 3:1) Mu mbandu, sambu na bilumbu na beto, Yezu tubaka nde: “Nzala ta vanda mpi ntoto ta nikana na bisika ya mutindu na mutindu.” (Matayo 24:7) Ntama mingi ve Nzambi ta katula bampasi yonso na nsi-ntoto, yo vanda bisumbula ya lugangu.—Kusonga 21:3, 4.

Inki mutindu Nzambi ke sadisaka bantu yina bisumbula ya lugangu ke bwilaka?

Nzambi ke pesaka kikesa na bantu yina bisumbula ya lugangu ke bwilaka na nsadisa ya ndinga na yandi Biblia. Biblia ke ndimisa beto nde Nzambi ke tudilaka beto dikebi mpi yandi ke waka mpasi kana beto ke mona mpasi. (Yezaya 63:9; 1 Piere 5:6, 7) Yo ke tuba mpi nde kilumbu kele bisumbula ya lugangu ta vandaka diaka ve.—Tala “ Baverse ya Biblia sambu na kusadisa bantu yina bisumbula ya lugangu me bwila.”
Nzambi ke sadilaka bansadi na yandi sambu na kusadisa bantu yina bisumbula ya lugangu me bwila. Nzambi ke lombaka bansadi na yandi ya kele na ntoto na kulanda mbandu ya Yezu. Biblia tubaka na ntwala nde Yezu ta pesa kikesa na “bantu yina kele na ntima ya kele na mawa” mpi “bantu yonso yina kele na mawa.” (Yezaya 61:1, 2) Bansadi ya Nzambi ke salaka ngolo sambu na kulanda mbandu ya Yezu.—Yoane 13:15.

Nzambi ke lombaka mpi bansadi na yandi na kusadisa bantu yina bisumbula ya lugangu ke bwila.—Bisalu 11:28-30; Bagalatia 6:10.

Bambangi ya Yehowa ke sadisa bampangi ya Porto Rico yina me bwila mpasi ya mupepe ya ngolo

Keti Biblia lenda sadisa beto na kudibongisa sambu na bisumbula ya lugangu?

Ee. Biblia kele ve mukanda yina ke songaka beto mutindu ya kudibongisa sambu bisumbula ya lugangu. Ata mpidina, yo kele ti minsiku ya lenda sadisa beto. Mu mbandu:

Kudibongisa sambu na bisumbula yina lenda salama. Biblia ke tuba nde: “Muntu ya mayele ke monaka kigonsa mpi ke bumbanaka.” (Bingana 22:3) Yo kele mbote na kuzaba nki beto ta sala kana diambu mosi ya mpasi mpi ya kukonda kukana me bwila beto. Kusala mutindu yai ke tendula kuyidika bima yina lenda sadisa nge ti dibuta na nge mpi kuwakana ti dibuta na nge kisika yina beno ta kutana kana kisumbula me salama.
Luzingu kele mfunu mingi kuluta bima yina nge kele ti yo. Biblia ke tuba nde: “Beto nataka ata kima ve na nsi-ntoto, beto lenda kwenda mpi ve ti kima ata mosi.” (1 Timoteo 6:7, 8) Beto fwete ndima kuyambula nzo mpi bima na beto sambu na kugulusa luzingu na beto. Beto fwete vila ve nde luzingu na beto kele mfunu kuluta bima yina beto kele ti yo.—Matayo 6:25.

Baverse ya Biblia sambu na kusadisa bantu yina bisumbula ya lugangu me bwila

Kuyantika 18:25: “Ngindu lenda kwisila [Nzambi] ve ata fioti nde [yandi] . . . sala mutindu yina, nde [yandi] . . . fwa muntu ya lunungu kumosi ti muntu ya mbi . . . Keti Zuzi ya ntoto ya mvimba ta sala ve mambu ya mbote?”

Mambu yina yo ke tendula: Nzambi ke salaka ntangu yonso mambu ya mbote; yo yina kana bantu ya mbote ke fwa na bisumbula ya lugangu, yo kele ve foti na yandi.

Nkunga 46:1, 2: “Nzambi kele kitininu na beto mpi ngolo na beto, lusadisu yina beto lenda baka kukonda mpasi na bantangu ya mpasi. Yo yina beto ta wa boma ve, ata ntoto kusoba.”

Mambu yina yo ke tendula: Na mambu yonso ya ke kumina beto, beto lenda tula ntima nde Nzambi ta pesa beto ngolo.

Yezaya 63:9: “Na ntangu yonso yina bo vandaka kumona mpasi, yo vandaka kupesa yandi mpasi.”

Mambu yina yo ke tendula: Nzambi ke wilaka bantu mawa mpi yandi ke wilaka beto mawa ntangu beto ke monaka mpasi.

Yoane 5:28, 29: “Ntangu ke kwisa ntangu bantu yonso yina kele na maziamu ya kuyibuka ta wa ndinga [ya Yezu] mpi bo ta basika.”

Mambu yina yo ke tendula: Beto lenda vanda ti kivuvu nde beto ta mona diaka bantu ya beto ke zolaka yina me fwaka, sambu Nzambi ta pesa Yezu ngolo ya kuvutula bo na luzingu.

1 Piere 5:6, 7: “Beno kudikulumusa na nsi ya diboko ya ngolo ya Nzambi . . . na ntangu beno ke losa basusi na beno yonso na yandi sambu yandi ke kudibanzaka sambu na beno.”

Mambu yina yo ke tendula: Nzambi ke kudibanzaka kibeni sambu na beto mpi yandi ke zola nde beto samba yandi sambu na basusi na beto.

Kusonga 21:4: “[Nzambi] ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”

Mambu yina yo ke tendula: Nzambi ta katula mambu yonso yina kele na kisina ya bampasi, yo vanda bisumbula ya lugangu.