Ve, Biblia ke longaka ve dilongi ya ke tubaka nde ‘kana muntu me guluka mbala mosi, imene yandi me guluka kimakulu.’ Muntu yina me guluka sambu yandi kwikilaka na Yezu Kristu lenda vanda diaka ve ti lukwikilu mpi kuvidisa kivuvu ya kuguluka. Biblia ke tuba nde yo ke lombaka bikesa ya ngolo to “kunwana ngolo kibeni” sambu na kulanda kuvanda ti lukwikilu. (Yude 3, 5) Bakristu ya mvu-nkama ya ntete ndimaka Kristu, kansi bo songaka bo nde: “Beno landa kusala ngolo sambu na luguluku na beno mosi ti boma mpi matekita.”—Bafilipi 2:12.

Baverse ya Biblia yina ke monisa nde dilongi ya ke tubaka nde ‘kana muntu me guluka mbala mosi, imene yandi me guluka kimakulu’ kele luvunu

•   Biblia ke kebisa beto sambu na masumu ya nene yina lenda sala nde muntu kukota ve na Kimfumu ya Nzambi. (1 Bakorinto 6:9-11; Bagalatia 5:19-21) Balukebisu yai zolaka kuvanda na mfunu ve kana muntu ta guluka kaka ata konso nki mambu yina yandi ke sala. Kansi Biblia ke monisa nde muntu yina me gulukaka lenda vutukila diaka kusala disumu mosi ya nene mpi kubwa. Mu mbandu, Baebreo 10:26 ke tuba nde: “Kana beto ke sala masumu na luzolo na nima ya kuzaba kieleka mbote-mbote, kimenga ya nkaka ya kupesa sambu na masumu na beto kele diaka ve.”—Baebreo 6:4-6; 2 Piere 2:20-22.

•   Yezu monisaka mfunu ya kutanina lukwikilu ntangu yandi pesaka mbandu mosi yina yandi kudifwanisaka ti nti ya vinu mpi yandi fwanisaka balongoki na yandi ti balutangu ya vinu yina. Yandi tubaka nde balongoki na yandi ya nkaka ta monisa nde bo ke kwikila na yandi na bambuma to bisalu na bo, kansi na nima bo ta monisa yo diaka ve yo yina bo ta vidisa kivuvu na bo ya kuguluka mpi “bo ta losa [bo] na nganda bonso lutangu” yina ke butaka ve mbuma. (Yoane 15:1-6) Ntumwa Polo sadilaka mbandu ya mutindu mosi mpi yandi tubaka nde “bo ta zenga” Bakristu yina ke tanina ve lukwikilu na bo.—Baroma 11:17-22.

•   Biblia ke pesa Bakristu nsiku na ‘kulanda kukengila.’ (Matayo 24:42; 25:13) Bantu yina ke lala na kimpeve, yo vanda sambu bo ke sala “bisalu ya mpimpa” to sambu bo ke sala mpenza ve mambu yina Yezu pesaka nsiku na kusala, bo me vidisaka kivuvu na bo ya kuguluka.—Baroma 13:11-13; Kusonga 3:1-3.

•   Baverse mingi ke monisa nde bantu yina me gulukaka fwete landa kukanga ntima na kwikama yonso tii na nsuka. (Matayo 24:13; Baebreo 10:36; 12:2, 3; Kusonga 2:10) Ntangu Bakristu ya mvu-nkama ya ntete waka nde bampangi na bo ya nkaka vandaka kukanga ntima ti lukwikilu, bo monisaka nde bo vandaka na kiese. (1 Batesalonika 1:2, 3; 3 Yoane 3, 4) Kana bantu lenda guluka ata bo kanga ve ntima na kwikama yonso, keti yo ke monana mbote nde Biblia kubenda dikebi ya mingi nde yo kele mfunu na kusala yo?

•   Ntumwa Polo ndimaka nde yandi ta guluka, kansi yo vandaka kaka ntangu yandi kumaka pene-pene ya kufwa. (2 Timoteo 4:6-8) Ntete, yandi vandaka kuzaba nde yandi lendaka kuvidisa kivuvu na yandi ya kuguluka kana yandi kudipesa na bampusa ya kinsuni. Yandi sonikaka nde: “Mono ke bulaka nitu na mono mpi mono ke nataka yo bonso mpika, sambu na nima ya kulonga bantu ya nkaka, mono kuma ve mono mosi na konso mutindu yina muntu yina Nzambi ke ndima ve.”—1 Bakorinto 9:27; Bafilipi 3:12-14.