Kimfumu ya Nzambi Kele Inki?
Mvutu ya Biblia
Kimfumu ya Nzambi kele kibeni luyalu mosi ya kieleka, yina Yehowa me tulaka. Biblia ke bingaka mpi “kimfumu ya Nzambi” nde “kimfumu ya zulu.” Yo ke bingaka yo mpidina sambu yo ke yalaka katuka na zulu. (Marko 1:14, 14; Matayo 4:17) Kimfumu ya Nzambi me fwanana ti baluyalu ya bantu na mambu mingi. Ata mpidina, Kimfumu ya Nzambi me luta baluyalu ya bantu na mambu yonso. Mu mbandu:
Bantwadisi. Nzambi me ponaka Yezu Kristu sambu yandi vanda Ntotila ya Kimfumu, mpi yandi me pesaka yandi kiyeka yina ata muntu mosi ve me vandaka ti yo. (Matayo 28:18) Yezu ke sadilaka kiyeka na yandi kaka sambu na kusala mambu ya mbote. Nkutu yandi me monisaka dezia nde yandi kele mfumu ya me fwana kutudila ntima mpi ya ke wilaka bantu mawa. (Matayo 4:23; Marko 1:40, 41; 6:31-34; Luka 7:11-17) Nzambi ke sadisaka Yezu na kupona babakala mpi bankento ya makanda yonso sambu na kuvanda “bantotila na ntoto” mpi kuyala na lweka na yandi kuna na zulu.—Kusonga 5:9, 10.
Ntangu yina yo ta sala. Kimfumu ya Nzambi me swaswana ti baluyalu ya bantu yina ke yingaka mpi baluyalu ya nkaka ya bantu. Kimfumu ya Nzambi “ta fwa ve ata fioti.”—Daniele 2:44.
Bantu. Bantu yonso ya ke salaka mambu yina Nzambi ke lombaka lenda kuma bantu ya Kimfumu na yandi, yo vanda bantu yango ke zingaka na wapi to bo me butukaka na wapi.—Bisalu 10:34, 35.
Bansiku. Bansiku (to bantuma) ya Kimfumu ya Nzambi ke buyisaka mambu mingi, kansi ve kaka bikalulu ya mbi. Yo ke salaka nde bantu ya Kimfumu yina kutomisa bikalulu na bo ya mbote. Mu mbandu Biblia ke pesa nsiku yai: “‘Nge fwete zola Yehowa Nzambi na nge na ntima na nge ya mvimba, na moyo na nge ya mvimba, mpi na mabanza na nge yonso.’ Yai nsiku ya kuluta nene mpi ya ntete. Ya zole, ya me fwanana ti yo, yo yai: ‘Nge fwete zola nkweno na nge bonso nge mosi.’” (Matayo 22:37-39) Bantu ya Kimfumu ya Nzambi ke zolaka Nzambi mpi bantu yina ke zingaka ti bo. Zola yina ke pusaka bo na kusala yonso sambu na mambote ya bantu yina ke zingaka kisika mosi ti bo.
Malongi. Kimfumu ya Nzambi ke lombaka nde bantu na yo kuvanda ti bikalulu ya kuluta mbote, kansi yo ke pesaka mpi bantu na yo malongi yina kele mfunu sambu na kuvanda ti bikalulu yango.—Yezaya 48:17, 18.
Lukanu. Bantwadisi ya Kimfumu ya Nzambi ke kumaka ve bamvwama na mukongo ya bantu na yo. Lukanu ya Kimfumu yai kele ya kulungisa lukanu ya Nzambi, mingi-mingi mambu yai ya Biblia me tubaka na ntwala nde: Bantu yina ke zolaka Nzambi ta zinga mvula na mvula na Paladisu awa na ntoto.—Yezaya 35:1, 5, 6; Matayo 6:10; Kusonga 21:1-4.
Nge Lenda Sepela Mpi Ti
MALONGI YA MFUNU YA BIBLIA
Kimfumu ya Nzambi Kele Nki?
Ntangu Yezu vandaka kusamuna, yandi longaka mambu ya me tala Kimfumu ya Nzambi kuluta malongi yonso ya nkaka. Na nsungi ya bamvula mingi, bantu ke sambaka sambu Kimfumu yango kukwisa.
NZOZULU YA NKENGI
Nani Kele Ntotila ya Kimfumu ya Nzambi?
Bansoniki mingi ya Biblia sonikaka mambu yina ke sadisaka beto na kuzaba muntu yina ta vanda Ntotila ya Kimfumu ya Nzambi. Na disolo ya luzingu ya bantu, muntu mosi mpamba ke lungisa mambu yina beto me katuka kutubila.
BAMVUTU NA BANGIUFULA YA BIBLIA
Keti Kimfumu ya Nzambi Kele na Kati ya Bantima na Beto?
Ntangu Biblia ke tubaka nde “Kimfumu ya Nzambi kele na kati na beno,” nki yo ke zolaka kutuba?
NTENDULA YA BAVERSE YA BIBLIA
Ntendula ya Matayo 6:33—“Sosa Ntete Kimfumu ya Nzambi”
Keti Yezu tubaka nde Bakristu fwete sala ve kisalu sambu na kuzwa bima ya kuzingila?
MAMBU YA ME TALA BETO
Lomba nde Mbangi Mosi ya Yehowa Kukwisa Kutala Nge
Tadila ngiufula mosi ya Biblia, to sosa kuzaba mambu mingi na yina me tala Bambangi ya Yehowa.