Inki Biblia Ke Tubaka na Yina Me Tala Kukaba
Mvutu ya Biblia
Biblia ke siamisa beto na kukaba na luzolo yonso mpi ti bikuma ya mbote. Yo ke monisa nde kukaba mutindu yai ke pesaka kiese na muntu yina ke kaba mpi na yina ke baka. (Bingana 11:25; Luka 6:38) Yezu tubaka nde: “Kiese ke vandaka mingi na kupesa, kansi na kubaka kiese ke vandaka fioti.”—Bisalu 20:35.
Inki ntangu kukaba ke pesaka Nzambi kiese?
Kukaba ke pesaka kiese kana beto me sala yo na luzolo na beto mosi. Biblia ke tuba nde: “Konso muntu kusala mutindu yandi me kana na ntima na yandi, ti keti-keti ve to sambu bo ke pusa yandi, sambu Nzambi ke zolaka muntu yina ke pesaka na kiese.”—2 Bakorinto 9:7, noti na nsi ya lutiti.
Kukaba na ntima ya mvimba kele na kati ya “lusambu” yina Nzambi ke ndimaka. (Yakobo 1:27) Muntu yina ke sadisaka bantu na luzolo yonso ke sepedisaka Nzambi, mpi Nzambi ke tadilaka yo bonso kima yina bo me defisa yandi. (Bingana 19:17) Biblia ke tuba nde Nzambi yandi mosi ta futa muntu yina ke kaba.—Luka 14:12-14.
Inki ntangu kukaba ke pesaka ve Nzambi kiese?
Kana muntu ke kaba ve ti bangindu ya mbote. Mu mbandu:
Sambu bantu kumona nde yandi ke kabaka.—Matayo 6:2.
Sambu bantu kukabila yandi mpi.—Luka 14:12-14.
Sambu na kusosa luguluku.—Nkunga 49:6, 7.
Kana yo ke pesa maboko na mambu yina Nzambi ke buyaka. Mu mbandu, yo ta vanda mbi kana beto kabila muntu mbongo sambu yandi kwenda kubudila yo nsaka ya mbongo to kusumba bima yina ke lawusaka to malafu ya ngolo. (1 Bakorinto 6:9, 10; 2 Bakorinto 7:1) Kiteso mosi, yo kele mbi na kukabila muntu yina kele ti makuki ya kusala kisalu sambu na kuzwa mbongo kansi yandi ke buya kusala kisalu.—2 Batesalonika 3:10.
Kana beto ke kabila mingi bantu ya nkaka kansi beto ke lungisa ve bampusa ya dibuta na beto. Biblia ke tuba nde bamfumu ya mabuta fwete lungisa bampusa ya mabuta na bo. (1 Timoteo 5:8) Yo ta vanda ve mbote kana mfumu ya dibuta ke kabila mingi bantu ya nkaka mpi ke bika nde dibuta na yandi kumona mpasi. Mutindu mosi, Yezu monisaka nde bantu yina vandaka kubuya kusadisa bibuti na bo yina kumaka minunu ntangu bo vandaka kutuba nde bima yina bo vandaka ti yo, vandaka ‘makabu ya bo me pesaka na Nzambi’ vandaka kusala mbi.—Marko 7:9-13.
Nge Lenda Sepela Mpi Ti
NZOZULU YA NKENGI
Baka Mambote ya Kikalulu ya Kupesa
Kupesa ke natilaka nge mpi bantu ya nkaka mambote. Yo ke yedisaka kuwakana mpi kinduku. Nki mutindu nge lenda vanda muntu yina ke pesaka na kiese?
TELAMA!
Nzila ya Ke Nataka na Kiese—Kusepela ti Bima Yina Beto Kele na Yo mpi Kikalulu ya Kukaba
Bantu mingi ke yindulaka nde kiese ke katukaka na mbongo mpi na bimvwama. Ebuna, keti mbongo mpi bimvwama ke nataka kibeni kiese ya kukonda nsuka? Banzikisa ke monisa nki?
BANGIUFULA YINA BANTU KE YULAKA MINGI
Mbongo Yina Bambangi ya Yehowa Ke Sadilaka Kisalu na Bo Ke Katukaka na Wapi?
Beto ke salaka ve bonso mabundu ya nkaka.
MAMBU YA ME TALA BETO
Lomba nde Mbangi Mosi ya Yehowa Kukwisa Kutala Nge
Tadila ngiufula mosi ya Biblia, to sosa kuzaba mambu mingi na yina me tala Bambangi ya Yehowa.