Luguluku Kele Inki?
Mvutu ya Biblia
Bantangu ya nkaka, bansoniki ya Biblia sadilaka ngogo “kugulusa” mpi ngogo “luguluku” sambu na kutubila muntu yina bo me katuka kugulusa na kigonsa to na lufwa. (Kubasika 14:13, 14; Bisalu 27:20) Kansi mbala mingi, bo ke sadilaka bangogo yai zole sambu na kutubila kugulusa muntu na masumu. (Matayo 1:21) Bantu ke fwaka sambu na disumu, yo yina bantu yina ke guluka na disumu kele ti kivuvu ya kuzinga kimakulu.—Yoane 3:16, 17. a
Inki muntu fwete sala sambu na kuguluka?
Sambu muntu kuguluka, yandi fwete kwikila na Yezu mpi kuzitisa bansiku na yandi sambu na kumonisa lukwikilu yina.—Bisalu 4:10, 12; Baroma 10:9, 10; Baebreo 5:9.
Biblia ke tuba nde sambu muntu kumonisa nde lukwikilu na yandi kele ve ya kufwa, yandi fwete sala mambu yina ke monisa nde yandi kele muntu ya bulemfu. (Yakobo 2:24, 26) Kansi, yo ke tendula ve nde yandi ta baka luguluku sambu na bikesa yina yandi ke sala. Luguluku kele “dikabu ya Nzambi.” Yandi ke pesa yo sambu na ‘ntima na yandi ya mbote ya nene.’—Baefezo 2:8, 9.
Keti muntu lenda vidisa luguluku?
Ee. Kana bo me gulusa muntu yina vandaka kudinda na masa, yandi lenda bwa diaka na masa mpi kuyantika diaka kudinda. Kiteso mosi, kana muntu yina bo me gulusa na disumu ke monisa diaka ve lukwikilu, yandi lenda vidisa luguluku na yandi. Yo yina Biblia ke siamisa Bakristu yina me baka luguluku “na kunwana ngolo kibeni sambu na lukwikilu.” (Yude 3) Yo ke kebisa mpi bantu yina Nzambi me gulusaka nde: “Beno landa kusala ngolo sambu na luguluku na beno mosi ti boma mpi matekita.”—Bafilipi 2:12.
Nani kele Ngulusi—Nzambi to Yezu?
Biblia ke tuba nde Nzambi kele muntu ya ntete yina ke gulusaka bantu. Mbala mingi yo ke bingaka yandi “Ngulusi.” (1 Samuele 10:19; Yezaya 43:11; Tito 2:10; Yude 25) Diaka, Nzambi me sadilaka bantu mingi sambu na kugulusa dikanda ya Izraele ya ntama, mpi Biblia ke bingaka bantu yina “bangulusi.” (Nehemia 9:27; Bazuzi 3:9, 15; 2 Bantotila 13:5) b Kiteso mosi, Biblia ke bingaka Yezu “Ngulusi” sambu Nzambi ke gulusaka bantu na disumu na nzila ya kimenga ya nkudulu ya Yezu Kristu.—Bisalu 5:31; Tito 1:4. c
Keti bantu yonso ta guluka?
Ve, bantu ya nkaka ta guluka ve. (2 Batesalonika 1:9) Ntangu bo yulaka Yezu nde, “Keti bantu yina ta guluka kele fioti?” yandi tubaka nde: “Beno sala ngolo kibeni sambu na kukota na kielo ya fioti, sambu mono ke tubila beno nde, bantu mingi ta sosa kukota kansi bo ta kuka ve.”—Luka 13:23, 24.
Bangindu ya mbi na yina me tala luguluku ya bantu yonso
Ngindu ya mbi: Mukanda ya ntete ya Bakorinto 15:22 ke longa nde bantu yonso ta guluka sambu yo ke tuba nde “na Kristu bantu yonso ta baka luzingu.”
Diambu ya Kieleka: Bangogo yina kele na ntwala mpi na nima ya verse yai ke tubila lufutumuku. (1 Bakorinto 15:12, 13, 20, 21, 35) Yo yina bangogo “na Kristu bantu yonso ta baka luzingu” ke tendula kaka nde bantu yonso yina ta futumuka ta baka lusakumunu yai na nzila ya Yezu Kristu.—Yoane 11:25.
Ngindu ya mbi: Tito 2:11 ke longa nde bantu yonso ta guluka sambu yo ke tuba nde Nzambi ta gulusa bantu yonso.
Diambu ya Kieleka: Na verse yai, ngogo ya Kigreki yina bo me balula nde “yonso” lenda tendula mpi “mitindu yonso.” d Yo yina, ntendula ya mbote ya Tito 2:11 kele nde Nzambi ke pesa bantu ya mitindu yonso dibaku ya kuguluka, yo vanda bantu “ya me katuka na makanda yonso, na mabuta yonso, na bansi yonso, mpi na bandinga yonso.”—Kusonga 7:9, 10.
Ngindu ya mbi: Mukanda ya zole ya Piere 3:9 ke longa nde bantu yonso ta guluka sambu yo ke tuba nde Nzambi “ke zola ve nde ata muntu mosi kufwa.”
Diambu ya Kieleka: Nzambi ke zola nde bantu kuguluka, kansi yandi ke pusa bo ve na kundima dikabu yina ya luguluku. Na kilumbu na yandi ya kusambisa Nzambi ta fwa mpi bantu yina ke vwezaka yandi.—2 Piere 3:7.
a Biblia ke tubaka nde ‘bo me gulusaka beto’ ata disumu mpi lufwa ta katuka kaka na bilumbu ke kwisa.—Baefezo 2:5; Baroma 13:11.
b Na baverse yina bo ke tubila, na kisika ya kusadila ngogo “ngulusi” bambalula ya nkaka ke sadilaka bangogo “muntu ya me nunga,” “muntu ya me gulusa,” “muntu ya me sala kima ya nene,” “ntwadisi,” to nkutu “muntu.” Kansi, na masonuku ya kisina ya Kiebreo ya Biblia, ngogo yina bo me sadila sambu na kutubila bantu yina me gulusaka bantu ya nkaka, bo me sadila yo mpi na baverse ya nkaka ya Biblia yina ke tubaka nde Yehowa Nzambi kele Ngulusi.—Nkunga 7:10.
c Zina Yezu me katuka na zina ya Kiebreo Yehoh·shuʹaʽ, yo ke tendula “Yehowa Kele Luguluku.”
d Tala diksionere Vine’s Complete Expository Dictionary of Old and New Testament Words. Ngogo yina ya Kigreki kele mpi na Matayo 5:11. Na verse yina Yezu tubaka nde bantu ta tuba mambu ya mbi ya “mutindu na mutindu” sambu na balongoki na yandi.
Nge Lenda Sepela Mpi Ti
BAMVUTU NA BANGIUFULA YA BIBLIA
Inki Mutindu Kimenga ya Yezu Kele “Nkudulu Sambu na Bantu Mingi”?
Inki mutindu nkudulu ke katulaka bantu na disumu?
BAMVUTU NA BANGIUFULA YA BIBLIA
Keti Biblia Ke Longaka nde ‘Kana Muntu Me Guluka Mbala Mosi, Imene Yandi Me Guluka Kimakulu’?
Yezu pesaka mbandu mosi ya ke pesa mvutu na ngiufula yina.
BAMVUTU NA BANGIUFULA YA BIBLIA
Keti Nge Fwete Suka Kaka na Kukwikila na Yezu Sambu na Kugulaka?
Biblia ke tubaka nde bantu ya nkaka yina ke kwikilaka na Yezu ta guluka ve. Sambu na nki?
MALONGI YA MFUNU YA BIBLIA
Sambu na Nki Yezu Fwaka?
Biblia ke monisa nde lufwa ya Yezu kele mfunu mingi. Keti Yezu fwaka ti kikuma?
NTENDULA YA BAVERSE YA BIBLIA
Ntendula ya Baroma 10:13—‘Kubinga Zina ya Mfumu’
Nzambi ke pesa bantu yonso dibaku ya kuguluka mpi ya kubaka luzingu ya mvula na mvula, kukonda kutadila insi na bo, mpusu na bo ya nitu, ata kana bo kele bamvwama to bansukami.
MALONGI YA BIBLIA
Meka Kulonguka Biblia ti Beto
Longuka Biblia ti Mbangi Mosi ya Yehowa kukonda kufuta mbongo.