Maria Magdala vandaka longoki ya kwikama ya Yezu. Ziku bo pesaka yandi zina Magdala sambu na kutubila Mbanza Magdala (to Magadani), yina vandaka pene-pene ya nzadi Galilea. Ziku Maria zingaka mpi na Mbanza yina.

 Maria Magdala vandaka mpi na kati ya bankento yina vandaka kutambula ti Yezu mpi balongoki na yandi. Mpi yandi vandaka kusadisa bo. (Luka 8:1-3) Yandi vandaka pana ntangu bo vandaka kufwa Yezu mpi yandi vandaka na kati ya bantu ya ntete yina monaka Yezu ntangu yandi futumukaka.—Marko 15:40; Yoane 20:11-18.

•  Keti Maria Magdala vandaka ndumba?

•  Keti Maria Magdala vandaka “ntumwa ya bantumwa”?

•  Keti Maria Magdala vandaka nkento ya Yezu?

•  Biblia ke tubilaka Bamaria ikwa?

 Biblia ke tubaka ve nde Maria Magdala vandaka ndumba. Kansi Biblia ke tubaka kaka nde Yezu basisaka bademo sambwadi yina vandaka na nitu na yandi.—Luka 8:2.

 Ebuna sambu na nki bantu ke tubaka nde yandi vandaka ndumba? Mbamvula mingi na nima ya lufwa ya Maria Magdala, bantu ya nkaka tubaka nde yandi muntu vandaka nkento (ziku ndumba mosi) yina yobisaka makulu ya Yezu ti mansanga mpi dipaka yo ti nsuki na yandi. (Luka 7:36-38) Kansi ata verse mosi ve na Biblia ke tubaka mambu yai.

 Ve. Bantu ya Eglize ya Katolika ke bingaka Maria nde “Santu Maria Magdala” mpi “ntumwa ya bantumwa” sambu yandi vandaka muntu ya ntete ya songaka bantumwa nde Yezu me futumuka. (Yoane 20:18) Ata mpidina diambu yai kumisaka yandi ve ntumwa. Mpi Biblia ke tubaka ve nde yandi vandaka ntumwa.—Luka 6:12-16.

 Bo manisaka kusonika Biblia pene-pene ya nsuka ya mvu-nkama ya ntete. Bamvula mingi na nima, bamfumu ya mabundu kumaka kubinga Maria Magdala nde “santu.” Mikanda yina bo sonikaka na bamvu 100 tii 300, ke monisa nde balongoki ya nkaka ya Yezu kumaka kuwila Maria Magdala kimpala. Kansi mikanda yango kele ve na kati ya mikanda ya Biblia. Masolo yai ya luvunu me katuka ve na Biblia.

 Ve. Biblia ke monisaka pwelele nde Yezu balaka ve. a