Bikesa yonso ya bantu ke sala ta nata ve ngemba na ntoto. Kimfumu ya Nzambi mpamba muntu ta vutula ngemba na ntoto. Kimfumu ya Nzambi kele luyalu mosi ya kele na zulu mpi Yezu Kristu muntu ke twadisaka yo. Tala mambu yina Biblia ke longa na yina me tala kivuvu yai ya mbote.

1.   Nzambi ta ‘sukisa bitumba na nsi-ntoto yonso,’ mpidina yandi ta lungisa mambu ya yandi tubaka nde yandi ta nata ‘ngemba awa na ntoto na kati ya bantu yina yandi ke ndimaka.’​—Nkunga 46:9; Luka 2:14, Bible en Kituba.

2.   Kimfumu ya Nzambi ta yala ntoto ya mvimba katuka na zulu. (Daniele 7:14) Mutindu yo kele luyalu ya ntoto ya mvimba, yo ta katula kikalulu yina bantu ke vandaka ti yo ya kuzola insi na bo, sambu kikalulu yai ke salaka mbala mingi nde mavwanga kubasika.

3.   Yezu yina kele Ntwadisi ya Kimfumu ya Nzambi, Biblia ke binga yandi “Mfumu ya Ngemba,” mpi yandi ta zikisa nde ngemba ta vanda kukonda nsuka.​—Yezaya 9:6, 7.

4.   Bantu ya nku mpi ya ke zolaka ve kusoba bikalulu ta vanda ve bantu ya Kimfumu yina, sambu “[Nzambi] ke mengaka konso muntu yina ke zolaka mubulu.”​—Nkunga 11:5; Bingana 2:22.

5.   Nzambi ke longa bantu na yandi na kuzinga na ngemba. Inki mbuma malongi yina ya Nzambi ta buta? Biblia ke tuba nde: “Bo ta kumisa makonga na bo bakupu-kupu. Dikanda mosi ta nangula ve mbele ya bitumba sambu na kunwanisa dikanda ya nkaka, bo ta longuka mpi diaka ve bitumba.”​—Yezaya 2:3, 4.

 Nzambi me sadisa bamilio ya Bambangi ya Yehowa na ntoto ya mvimba na kulonguka banda bubu na kuzinga na ngemba. (Matayo 5:9) Bo me katukaka na bisika ya mutindu na mutindu mpi bo kele na bansi mpi bateritware kuluta 230. Kansi, bo ke bakaka ve minduki sambu na kunwanisa bantu ya nkaka.