Bangogo “Yeruzalemi ya Mpa” kele mbala zole na Biblia. Yo kele mbanza mosi ya kifwani yina ke monisa balongoki ya Yezu yina ta kwenda na zulu sambu na kuyala ti yandi na Kimfumu ya Nzambi. (Kusonga 3:12; 21:2) Biblia ke bingaka mpi kimvuka yai ya bantu nde nkento ya Kristu.

1.   Yeruzalemi ya Mpa kele na zulu. Konso mbala yina Biblia ke tubilaka Yeruzalemi ya Mpa, yo ke tubaka nde yo ke kulumuka katuka na zulu, kisika yina bawanzio ke taninaka bakielo ya mbanza yai. (Kusonga 3:12; 21:2, 10, 12) Katula yo, mbanza yai lenda vanda ve na ntoto sambu yo kele kibeni nene. Yo kele kare mpi nene na yo kele “ba stade 12 000” na konso ndambu. a (Kusonga 21:16) Balweka na yo lenda vanda nda bakilometre kiteso ya 560 na kati-kati ya mpwasa (espace).

2.   Bantu ya kele na Yeruzalemi ya mpa kele kimvuka ya balongoki ya Yezu, nkento ya Kristu. Biblia ke binga Yeruzalemi ya Mpa “nkento ya Mwana-dimeme.” (Kusonga 21:9, 10) Na ntendula yai ya kifwani, dimeme kele Yezu Kristu. (Yoane 1:29; Kusonga 5:12) “Nkento ya Mwana-dimeme,” nkento ya Kristu ke monisa Bakristu yina ta vukana ti Kristu na zulu. Biblia ke fwanisa bangwisana yina Yezu kele ti yo ti Bakristu yina ti bangwisana yina nkento ke vandaka ti yo ti bakala na yandi. (2 Bakorinto 11:2; Baefezo 5:23-25) Diaka, na zulu ya matadi yina bo me sadilaka fondasio ya Yeruzalemi ya Mpa, bo me sonikaka “bazina 12 ya bantumwa 12 ya Mwana-Dimeme.” (Kusonga 21:14) Mambu yai ya fioti-fioti ya bo me tubila ke sadisa beto na kuzaba kana Yeruzalemi ya Mpa kele kibeni inki sambu Bakristu yina bo me bingaka sambu na kukwenda kuzinga na zulu, ‘bo me tungaka bo na zulu ya fondasio ya bantumwa mpi ya bambikudi.”​—Baefezo 2:20.

3.   Yeruzalemi ya Mpa kele na kati ya guvernema. Yeruzalemi ya ntama vandaka nto-mbanza ya Izraele, kisika yina Ntotila Davidi, mwana na yandi Salomo, mpi bana na bo yalaka “na kiti ya kimfumu ya Yehowa.” (1 Bansangu 29:23) Yo yina Yeruzalemi yina Biblia vandaka kubinga “mbanza ya santu” vandaka kumonisa kimfumu ya Nzambi yina bantu ya dibuta ya Davidi vandaka kuyala. (Nehemia 11:1) Yeruzalemi ya Mpa yina Biblia ke bingaka mpi “mbanza ya santu,” me salama na bantu yina ta kwenda kukuta Yezu na zulu ‘sambu na kuyala bonso bantotila na ntoto.’​—Kusonga 5:9, 10; 21:2.

4.   Yeruzalemi ya Mpa ta natila bantu balusakumunu awa na ntoto. Biblia ke tubilaka Yeruzalemi ya Mpa bonso nde yo “ke kulumuka katuka na zulu, na Nzambi,” sambu na kumonisa nde Nzambi ke sadila yo sambu na kuyidika mambu kuna ve na zulu, kansi awa na ntoto. (Kusonga 21:2) Mambu yai ke monisa nde Yeruzalemi ya Mpa kele ti kuwakana ti Kimfumu ya Nzambi yina Nzambi ke sadila sambu luzolo na yandi kusalama “na ntoto, bonso na zulu.” (Matayo 6:10) Lukanu ya Nzambi sambu na bantu awa na ntoto ta nata balusakumunu yai:

   •   Masumu ta katuka. “Nzadi ya masa ya luzingu” ke basika na Yeruzalemi ya Mpa mpi ke tinda masa na “banti ya luzingu” yina kele “sambu na kubelula makanda.” (Kusonga 22:1, 2) Kubeluka yina na nitu mpi na kimpeve ta sala nde masumu kukatuka mpi bantu kuvutukila luzingu ya kukuka mutindu Nzambi kanaka yo na luyantiku.​—Baroma 8:21.

   •   Bantu ta vanda ti kuwakana ya mbote ti Nzambi. Disumu me salaka nde bantu kukabwana ti Nzambi. (Yezaya 59:2) Kana disumu me katuka, mambu yai ya Biblia tubaka na ntwala ta lungana na mvimba na yo: “Tenta ya Nzambi kele ti bantu, yandi ta zinga ti bo, mpi bo ta vanda bantu na yandi. Mpi Nzambi yandi mosi ta vanda ti bo.”​—Kusonga 21:3.

   •   Nsuka ya bampasi mpi ya lufwa. Na nzila ya Kimfumu na yandi, Nzambi “ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve.”​—Kusonga 21:4.