Bansaka lenda vanda mbote to mbi sambu na nge. Yo ke tadila nsaka yina nge ke sala, mutindu nge ke sala yo mpi bantangu yina nge ke sala.

•  Inki kele mambote na yo?

•  Inki kele bigonsa?

•  Mambu yina baleke ya nkaka ke tuba

 Kusala bansaka lenda sadisa muntu na kuvanda ti mavimpi ya mbote. Biblia ke tuba nde “ngalasisi ya nitu kele mfunu.” (1 Timoteo 4:8) Leke mosi na zina ya Ryan ke tuba nde: “Kusala bansaka ke sadisaka kibeni na kulanda kuvanda kikesa. Yo kele mbote kuluta kuvanda na nzo sambu na kubula bansaka ya video.”

 Kusala bansaka lenda sadisa bantu na kusala kumosi mpi na kudiyala. Biblia ke sadila mbandu ya nsaka mosi sambu na kulonga diambu mosi ya mfunu. Yo ke tuba nde: “Bantu yina ke bakaka ntinu na nsaka ya kubaka ntinu ke bakaka ntinu bo yonso, kansi muntu mosi mpamba ke bakaka lufutu.” Yo ke tuba diaka nde: “Konso muntu yina ke salaka nsaka ya kutesana ke kudiyalaka na mambu yonso.” (1 Bakorinto 9:24, 25) Inki dilongi beto ke baka? Kudiyala mpi kusala kumosi ke sadisaka bantu na kuzitisa bansiku ya nsaka mosi. Toko mosi na zina ya Abigail ke ndima dibanza yai. Yandi ke tuba nde: “Kusala bansaka me longaka mono mutindu mono lenda sala kumosi ti bantu ya nkaka mpi kusolula mbote ti bo.”

 Kusala bansaka lenda sadisa bantu na kukuma banduku. Bansaka ke vukisaka bantu. Leke mosi na zina ya Jordan ke tuba nde: “Mbala mingi bansaka ke lombaka nde bantu kutesana, kansi kana beno ke baka yo kaka bonso nsaka ya kulutisila ntangu, yo ta sadisa beno na kusala kinduku.”

 Nsaka yina nge ke sala. Biblia ke tuba nde: “Yehowa ke talaka muntu ya lunungu ti muntu ya mbi; yandi ke mengaka konso muntu yina ke zolaka mubulu.”—Nkunga 11:5.

 Bansaka ya nkaka ke vandaka kibeni ya nku. Mu mbandu, toko mosi na zina ya Lauren ke tuba nde: “Kana boksere ke nwana, lukanu na yandi ke vandaka ya kubula boksere ya nkaka. Beto ke nwanaka ve sambu beto kele Bakristu. Ebuna sambu na nki beto fwete ndima kutala bantu ke nwana, kaka sambu yo kele nsaka ya kulutisila ntangu?”

 Mambu ya kuyindulula: Keti nge ke pesaka bikuma sambu na kusala to kutala nsaka mosi ya nku mpi ke yindulaka nde yo ta pusa nge ve na kusala mubulu? Kana mpidina, zaba nde Nkunga 11:5 ke tuba nde Yehowa ke buyaka muntu yina “ke zolaka mubulu” mpi muntu yina ke salaka yo.

 Mutindu nge ke sala yo. Biblia ke tuba nde: “Beno sala ve ata diambu mosi ti mpeve ya kuswana to sambu na kumonisa nde beno me luta bankaka, kansi ti kudikulumusa yonso beno tadila bankaka nde bo me luta beno.”—Bafilipi 2:3.

 Na mutindu mosi buna, konso nsaka yina ke lombaka nde bimvuka zole kusala ke vandaka ti mpeve ya kutesana. Kansi kana bantu ke sosa kaka kununga, nsaka yango ta vanda diaka ve ya kulutisila ntangu. Toko mosi na zina ya Brian ke tuba nde: “Mpeve ya kutesana lenda kwisila nge nswalu. Kana nge ke kuma ngolo na nsaka mosi, nge fwete sala bikesa sambu na kuyedisa kudikulumusa.”

 Mambu ya kuyindulula: Toko mosi na zina ya Chris ke tuba nde: “Beto ke bulaka balon konso mposo mpi bantu ya nkaka ke lwalaka.” Kudiyula nde: ‘Inki ke salaka nde bantu kulwala mingi? Inki mono lenda sala sambu bantu kulwala ve mingi?’

 Bantangu yina nge ke sala. Biblia ke tuba nde: “Zikisa mambu ya kuluta mfunu.”—Bafilipi 1:10.

 Nge fwete zaba mambu ya kutula na kisika ya ntete; mambu ya kimpeve fwete baka kisika ya ntete. Bansaka ya nkaka lenda baka ntangu mingi, yo vanda nge ke sala yo to ke tala yo. Toko mosi na zina ya Daria ke tuba nde: “Mono vandaka kuswana ti mama sambu na ntangu yina mono vandaka kulutisa na kutala bansaka na televizio sambu mono lendaka kusadila ntangu yango mbote.”

 Mambu ya kuyindulula: Keti nge ke waka bibuti na nge ntangu bo ke pesaka nge bandongisila na mambu yina nge fwe tula na kisika ya ntete? Toko mosi na zina ya Trina ke tuba nde: “Kana mono ti bampangi na mono ke tala bansaka na televizio mpi ke sala ve mambu ya mfunu, mama ke yibusaka beto nde bo ke futaka bantu yina ke sala bansaka yo vanda beto ke tala bo to ve. Yandi ke yulaka beto: ‘Ebuna beno, nani ke futaka beno?’ Yandi ke zolaka kutuba nde: Bantu yina kele dezia ti kisalu. Kansi kana beto ke sala ve badevware na beto mpi bisalu ya nkaka, beto ta kuka ve kulungisa bampusa na beto na bilumbu ke kwisa. Na kutuba ya mbote, mama vandaka kuzabisa beto nde kutala bansaka to kubula yo fwete vanda kima ya kuluta mfunu na luzingu na beto.”