“Ata mpukumuna mosi ve me kwisilaka beno yina bantu ya nkaka me kutanaka na yo ve. Kansi Nzambi kele ya kwikama, mpi yandi ta pesa ve nzila nde beno kutana ti mpukumuna kuluta yina beno lenda kangila ntima, kansi ntangu mpukumuna ke kwisa yandi ta yidika mpi nzila sambu beno kuka kukangila yo ntima.”—1 Bakorinto 10:13, Mbalula ya Nsi-Ntoto ya Mpa.

 “Konso mpukumunu yina me kwisila beno, yo kele kaka bonso bampukumunu yina ke kwisilaka bantu yonso. Ebuna Nzambi ke salaka kaka mambu yina ya yandi me tubaka, sambu yandi ta bika beno ve nde Satana kumeka beno na kumeka yina me luta ngolo na beno. Kansi, kana mpukumunu me kwisila beno, kaka na ntangu yo yina Nzambi ta pesa beno ngolo; mpidina mpukumunu lenda bwisa beno ve.”—1 Bakorinto 10:13, Bible en Kituba.

 Verse yai ke tubila kikalulu mosi ya mfunu mingi ya Nzambi, disongidila kwikama na yandi. Bantu ya ke sambilaka Nzambi na kwikama yonso lenda tula ntima nde yandi ta sadisa bo, mingi-mingi kana bo ke kutana ti bampasi to bampukumuna.

 “Ata mpukumuna mosi ve me kwisilaka beno yina bantu ya nkaka me kutanaka na yo ve.” Bantu ya ke sambilaka Nzambi lenda kutana ti mpukumuna ya kusala kima mosi ya Nzambi ke zolaka ve. Ata bampukumuna yina lenda vanda ya ngolo, yo kele kaka yina bantu mingi me kutanaka ti yo. a Yo yina, bantu ya ke sambilaka Nzambi lenda tula ntima nde bo mpi lenda kangila yo ntima.

 “Kansi Nzambi kele ya kwikama.” Yehowa b Nzambi kele muntu ya me fwana na kutudila ntima. Yandi me lungisaka ntangu yonso mambu yina yandi silaka nde yandi ta yambula ve bantu yina ke zolaka yandi, ke bikalaka ya kwikama na yandi mpi ke lemfukilaka yandi. (Kulonga 7:9; Nkunga 9:10; 37:28) Yo yina, bantu yina ke sambilaka yandi lenda tula ntima nde yandi ta lungisa balusilu zole ya mfunu ya kele na verse yai.

 “Yandi ta pesa ve nzila nde beno kutana ti mpukumuna kuluta yina beno lenda kangila ntima.” Nzambi ke monisaka kwikama na yandi na mutindu yandi ke pesaka ve nzila nde bampasi kukuma ngolo kibeni na mpila nde muntu lenda kangila yo ve ntima. Yandi ke ke zabaka mambu yonso konso nsadi na yandi lenda kuka kusala to ve.—Nkunga 94:14.

 “Ntangu mpukumuna ke kwisa yandi ta yidika mpi nzila sambu beno kuka kukangila yo ntima.” Nzambi lenda katula mpasi mosi to kupesa bantu ya ke sambilaka yandi mambu yina bo kele ti yo mfunu sambu na kukangila yo ntima. Mu mbandu, yandi lenda pesa bo lutwadisu na nzila ya mpeve santu, kupesa bo kikesa na nzila ya Biblia, to kupesa bo lusadisu ya me fwana na nzila ya bampangi Bakristu.—Yoane 14:26; 2 Bakorinto 1:3, 4; Bakolosai 4:11.

 Verse yai kele na mukanda yina ntumwa Polo sonikilaka dibundu ya Korinto. Na kitini yai ya mukanda na yandi, Polo sadilaka disolo ya dikanda ya ntama ya Izraele bonso mbandu ya ke kebisa sambu na Bakristu ya Korinto. (1 Bakorinto 10:11) Polo tangaka mambu ya mpasi mpi bampukumuna mingi yina bantu ya Izraele kutanaka ti yo, ata mpi lusambu ya biteki mpi pite. (1 Bakorinto 10:6-10) Bankaka bwaka na bampukumuna yai. Polo sadilaka mbandu na bo sambu na kuyibusa Bakristu nde bo fwete kuditudila ve ntima kuluta ndilu, mpi kuyindula nde bo ta bwa ve ata fioti na mpukumuna. (1 Bakorinto 10:12) Kansi, yandi bwisaka bo ntima ti mambu yina kele na mukanda ya 1 Bakorinto 10:13. Bantu ya ke sambilaka Nzambi na kwikama yonso lenda kanga ntima na konso diambu ya mpasi.

 Tala video yai ya nkufi sambu na kumona na bunkufi mambu yina kele na mukanda ya 1 Bakorinto.