“Ntima ya mbote ya nene ya mono me monisila nge me fwana, sambu ngolo na mono ke kuma ya kukuka ntangu nge kele ya kulemba.”—2 Bakorinto 12:9, Mbalula ya Nsi-Ntoto ya Mpa.

 “Kuzola ya nene ya mono ke zolaka nge kele mambu yonso ya nge ke na yo mfunu, sambu ngolo na mono ke lutaka kumonika na ntangu yina ya nge ke na kikesa ve.”—2 Bakorinto 12:9, Bible en Kituba.

 Nzambi silaka na kupesa ntumwa Polo ngolo yina yandi vandaka ti mfunu na yo sambu na kukanga ntima na bampasi.

 “Ntima ya mbote ya nene ya mono me monisila nge me fwana.” Beto lenda balula mvutu ya Nzambi pesaka na bisambu yina Polo vandaka kusala mbala na mbala mutindu yai: “Ntima na mono ya mbote kele mambu yonso ya nge kele na yo mfunu.” Na kutuba ya nkaka, ntima ya mbote ya nene ya Nzambi lungaka na kusadisa Polo na kukanga ntima na bampasi na yandi. Inki mutindu? Ngogo ya bo me balula nde “ntima ya mbote ya nene,” to “kuzola ya nene,” ke tendula dikabu yina Nzambi me pesa muntu na luzolo na yandi mosi kansi muntu yango me sala kima mosi ve sambu na kuzwa yo. Mikanda ya Polo ke monisa nde yandi bakaka mambote mingi na ntima ya mbote ya nene ya Nzambi. Ata Polo vandaka ntete kumonisa Bakristu mpasi, Nzambi pesaka yandi ngolo yina yandi vandaka ti yo mfunu sambu na kusoba bikalulu na yandi mpi kusadisa bantu ya nkaka na kukuma Bakristu. (1 Bakorinto 15:9, 10; 1 Timoteo 1:12-14) Polo lendaka kutula ntima ya mvimba na lusadisu ya Nzambi sambu na kununga konso mpasi yina yandi lenda kukutana ti yo.

 “Sambu ngolo na mono ke kuma ya kukuka ntangu nge kele ya kulemba.” Yehowa a yibusaka Polo nde ngolo ya Nzambi ke monanaka pwelele ntangu yandi ke sadilaka yo sambu na kusadisa bantu ya kukonda ngolo mpi ya kukonda kukuka. (2 Bakorinto 4:7; 12:8) Ntangu Bakristu ke zabaka nde bo kele ngolo ve mpi ke sosaka lusadisu ya Yehowa, bo ke pesaka ngolo ya Nzambi nzila ya kusadisa bo mbote-mbote. (Baefezo 3:16; Bafilipi 4:13) Na mutindu yina, ngolo ya Nzambi ke monanaka na kukonda ngolo to kulemba ya bantu.

 Polo sonikilaka Bakristu ya Korinto mukanda na ngolo ya mpeve santu pene-pene ya mvu 55 ya ntangu na beto. Na kitini ya nsuka ya mukanda yina, yandi tendulaka nde yandi vandaka ti kiyeka ya kuvanda ntumwa. Yandi monaka nde yandi fwete sala mutindu yina sambu bantu ya nkaka yina vandaka kudibinga balongi tubaka mambu ya mbi sambu na yandi; mbala ya nkaka bo tubaka mambu ya mbi sambu na mutindu yandi vandaka kumona to sambu na makuki na yandi ya kutuba.—2 Bakorinto 10:7-10; 11:5, 6, 13; 12:11.

 Sambu na kudinungisa, Polo tendulaka nde na ngolo na yandi mosi, yandi lendaka ve kusala kisalu na yandi ya kulonga mpi kukanga ntima na mambu mingi ya mpasi. (2 Bakorinto 6:4; 11:23-27; 12:12) Na kapu 12, yandi tubilaka na mutindu ya kifwani “nsende na nsuni,” mbala ya nkaka kima mosi yina vandaka kupesa yandi mpasi na nitu to kuyangisa yandi na mabanza. (2 Bakorinto 12:7) Ata Polo tubaka ve kana mpasi yango vandaka nki, yandi vandaka ti lukanu ya kukangila yo ntima ti lusadisu ya Nzambi.

 Bubu yai, Bakristu lenda kutana ti bampasi mpi mbangika. Bo ke bakaka kikesa sambu bo ke zabaka nde ngolo ya Nzambi lenda sadisa bo na kukanga ntima na konso mpasi yina bo lenda kutana ti yo. Bonso Polo, bo lenda tuba na ntima ya mvimba nde: “Ntangu mono ke vandaka ya kulemba, na ntangu yo yina mono ke vandaka ngolo.”—2 Bakorinto 12:10.

 Tala video yai ya nkufi sambu na kumona na bunkufi mambu yina kele na mukanda ya 2 Bakorinto.