“Sambu ndinga ya Nzambi kele ya moyo mpi ngolo mpi yo kele makasi kuluta konso mbele ya bitumba ya makasi zole mpi yo ke kotaka tii na kukabisa moyo ti mpeve, mpi binkoso ti butomfu, mpi yo lenda sala luswaswanu na kati ya mabanza mpi bangindu ya ntima.”​—Baebreo 4:12, Mbalula ya Nsi-Ntoto ya Mpa.

 “Nsangu ya Nzambi kele ya moyo, yo ke salaka konso ntangu. Makasi na yo me luta makasi ya mbele ya makasi zole. Makasi yina ke kotaka tii na kisika ya moyo ti mpeve kele, tii na kisika madikulu ti nluka kele. Nsangu yina yo ke sambisaka nzala ya ntima na beto ti mabanza ya ntima na beto.”​—Baebreo 4:12, Bible en Kituba.

 Nsangu ya Nzambi me tindilaka bantu, yina bo me sonikaka na Biblia, kele ti ngolo ya kubasisa pwelele bangindu mpi banzala na beto ya kieleka. Nsangu yina lenda tomisa mpi luzingu ya bantu.

 “Ndinga ya Nzambi kele ya moyo.” Bangogo “ndinga ya Nzambi” ke tubila balusilu ya Nzambi, to lukanu na yandi ya yandi me tubaka, mutindu bo me sonikaka yo na Biblia. a Kitini mosi ya mfunu ya lukanu yina kele nde bantu ya bulemfu ta zinga mvula na mvula na ntoto; bo ta vanda na ngemba mpi bumosi ya kieleka.​—Kuyantika 1:28; Nkunga 37:29; Kusonga 21:3, 4.

 Inki mutindu ndinga ya Nzambi, to lukanu na yandi ya yandi me tubaka kele ya “moyo”? Sambu, yo kele bupusi ya mingi kibeni na bantima ya bantu yina ke ndimaka; yo ke salaka nde bo vanda ti kivuvu mpi lukanu na luzingu. (Kulonga 30:14; 32:47) Ndinga ya Nzambi kele mpi ya “moyo” sambu Nzambi ya moyo kele na kusala mambu sambu na kulungisa mbote-mbote mambu yonso ya yandi me silaka. (Yoane 5:17) Na kuswaswana ti bantu, Nzambi ke silaka ve mambu ebuna na nima yandi vila yo to yandi kwisa kuzaba nde yandi lenda lungisa yo ve. (Kutanga 23:19) Ndinga na yandi “ta vutuka ve na [yandi] kana yo buta ve mbuma.”​—Yezaya 55:10, 11.

 “Ndinga ya Nzambi kele . . . ngolo.” Beto lenda balula mpi bangogo “kele . . . ngolo” nde “ke salaka,” to “ke lungisaka mambu yonso yina yo lombaka nde [ndinga yina] kulungisa.” Yo yina, konos kima yina Yehowa b Nzambi ke tuba to ke sila fwete lungana kibeni. (Nkunga 135:6; Yezaya 46:10) ya kieleka, Nzambi lenda lungisa balusilu na yandi na mitindu yina me luta mpila beto vandaka kuvingila.​—Baefezo 3:20. c

 Ndinga ya Nzambi ‘kele mpi ngolo’ na mutindu yo ke sadisaka bantu yina ke ndimaka mfunu na yo na kusala bansoba ya mbote na luzingu mpi na bikalulu na bo to na kutomisa yo. Malongi ya Nzambi ke kotaka na kimuntu na bo, disongidila yo ke vandaka ti bupusi na bangindu na bo, na luzingu na bo mpi na balukanu na bo. (Baroma 12:2; Baefezo 4:24) Na mutindu yina, “ndinga ya Nzambi . . . ke salaka mpi na” bantu yina ke ndimaka nde yo me katukaka na Nzambi.​—1 Batesalonika 2:13.

 “Ndinga ya Nzambi . . . kele makasi kuluta konso mbele ya bitumba ya makasi zole.” Na mutindu ya kifwani, ndinga ya Nzambi kele makasi kuluta sambu na ngolo na yo ya kuvanda ti bupusi na luzingu ya bantu. Ndinga ya Nzambi lenda kota to kuvanda ti bupusi na ntima, disongidila kimuntu ya kati, na mutindu yina malongi mosi ve ya bantu lenda sala. Yo ke monana na mambu yina Baebreo 4:12 ke tuba na nima.

 “Ndinga ya Nzambi . . . ke kotaka tii na kukabisa moyo ti mpeve, mpi binkoso ti butomfu.” Na Biblia, bo lenda sadila “moyo” sambu na kutubila lenda mutindu yina muntu ke monana nde yandi kele, kansi bo lenda sadila “mpeve” sambu na kutubila mutindu yandi kele mpenza na kati. (Bagalatia 6:18) Na kutuba ya kifwani, “ndinga ya Nzambi” ke kotaka tii na “butomfu,” disongidila mawi mpi bangindu na beto ya kati kibeni. Muitndu malongi ya Yehowa ke monisaka mutindu beto kele kibeni na kati, kisika yina muntu mosi ve ke monaka, malongi yina lenda pusa beto na kusala bansoba ya mbote. Yo ke pesaka Ngangi na beto kiese mpi yo ke pesaka beto mosi kiese.

 “Ndinga ya Nzambi . . . lenda sala luswaswanu na kati ya mabanza mpi bangindu ya ntima.” Mambu ya muntu ke salaka na nima ya kuwa ndinga ya Nzambi lenda monisaka bangindu na yandi ya kieleka, ata nkutu mabanza to bikuma ya ke pusaka yandi na kusala mambu, mambu yai ke vandaka ti bupusi na bikalulu na yandi. Mu mbandu, kana muntu mosi kundima mambu yina ndinga ya Nzambi ke longa mpi kusala bansoba ya me fwana na luzingu na yandi, yandi ta monisa nde yandi kele muntu ya kudikulumusa mpi ya masonga. Yandi ke zolaka kusepedisa Ngangi na yandi. Kansi, kana yandi ke sosa kuzwa bifu na ndinga ya Nzambi, yandi lenda monisa bifu na yandi ya mbi, mu mbandu lulendo to bwimi ya kuluta ndilu. Mbala ya nkaka yandi ke sosa kupesa bikuma sambu yandi ke salaka diambu mosi yina Nzambi ke ndimaka ve.​—Yeremia 17:9; Baroma 1:24-27.

 Mutindu mukanda mosi ke tuba, ndinga ya Nzambi “lenda kuma tii na kati na beto kibeni.” Kele ve ti diambu mosi ya kimuntu na beto ya kati yina Nzambi ke monaka ve mpi yina ndinga na yandi lenda basisa ve pwelele. Baebreo 4:13 ke tuba nde: “Bima yonso kele kinkonga mpi ke monikaka pwelele na meso ya muntu yina beto fwete vutula munoko.”

 Polo sonikaka mukanda ya Baebreo pene-pene ya mvu 61 ya ntangu na beto na ngolo ya mpeve santu; yandi sonikilaka yo na Bakristu ya Bayuda yina vandaka na Yeruzalemi mpi na Yudea.

 Na kapu 3 mpi 4, Polo ke monisa mutindu mbandu ya bantu ya Izraele ya ntama kele lukebisu sambu na Bakristu. (Baebreo 3:8-12; 4:11) Yehowa tubaka nde yandi ta katula bantu ya Izraele na kimpika mpi ta tula bo na ntoto yina bo zolaka kuzinga na “lutaninu.” (Kulonga 12:9, 10) Kansi, mbala na mbala, bantu ya Izraele yina basikaka na Ezipte landaka kukwikila ve na balusilu ya Nzambi mpi bo vandaka ti kikalulu ya kufwa bansiku na yandi. Yo yina, bo ‘kotaka ve na kupema ya Nzambi’ mpi bo vandaka ve ti kinduku ya mbote ti Nzambi. Kansi, bo fwaka na ntoto ya zelo na zelo. Ata bana na bo bakaka Ntoto ya Lusilu, bana na bo mpi landaka kikalulu ya kukolama ya bibuti na bo. Na nima, diambu yai natilaka dikanda ya mvimba bampasi mingi.​—Nehemia 9:29, 30; Nkunga 95:9-11; Luke 13:34, 35.

 Polo ke tendula nde Bakristu fwete baka malongi na bantu ya kukonda bulemfu ya bantu ya Izraele. Na kuswaswana ti bo, beto lenda kota na kupema ya Nzambi kana beto ke zitisa ndinga na yandi mpi kana beto ke tula ntima ya mvimba na balusilu na yandi.​—Baebreo 4:1-3, 11.

 Tala video yai ya nkufi sambu na kumona na bunkufi mambu yina kele na mukanda ya Baebreo.