“Mambu yonso yina beno ke sala, beno sala yo na moyo ya mvimba bonso sambu na Yehowa, kansi sambu na bantu ve.”—Bakolosai 3:23, Mbalula ya Nsi-Ntoto ya Mpa.

 “Konso kisalu yina ya beno ke sala, beno fweti sala yo na ntima mosi ya mbote, bonso nde beno ke sadila kaka bantu ve, kansi ti Mfumu Yesu mpi.”—Bakolosai 3:23, Bible en Kituba.

 Mukristu fwete sala ngolo sambu mutindu yandi ke tadilaka kisalu kele na kuwakana ti mutindu yandi ke sambilaka Yehowa Nzambi.

 “Mambu yonso ya beno ke sala.” Bantu yina ke zolaka kusambila Yehowa, ke zitisaka mambu ya Biblia ke tubaka na mambu yonso ya bo ke salaka. Bo ke salaka yonso na kuvanda kikesa, masonga, mpi bantu ya bo lenda tudila ntima na bisalu ya bo ke salaka konso kilumbu na nzo, na kisalu, mpi na ekole.—Bingana 11:13; Baroma 12:11; Baebreo 13:18.

 “Beno sala yo na moyo ya mvimba.” Bangango “na moyo ya mvimba” me katuka na bangogo ya Kigreki ya “ke tendula mutindu muntu ke kudipesa na kusala to kulungisa luzolo ya Nzambi na ngolo na yandi yonso.” a

 Yo yina, muntu ya mutindu yai ke sadilaka ngolo na yandi yonso ya nitu mpi mayele na yandi yonso ntangu yandi ke sala kisalu mosi. Bambalula ya nkaka ya Biblia ke balulaka bangogo yina nde “na ntima ya mvimba” (New Catholic Bible) to “na ntima yonso” (King James Version).—Tala “ Bakolosai 3:23 na Bambalula ya Nkaka.”

 “Sambu na Yehowa, kansi sambu na bantu ve.” Ata Bakristu ke sala konso kisalu yina, bo ke bakaka yo ve na nsaka sambu bo ke zabaka nde mutindu bo ke tadilaka kisalu ke vandaka ti bupusi na kinduku na bo ti Yehowa Nzambi. Susi na bo ya ntete-ntete ke vandaka ya kupesa yandi kiese, kansi ve ya kupesa kiese na mfumu na bo ya kisalu to na muntu ya nkaka. Kana Mukristu ke sala ngolo mpi kele ti bikalulu ya mbote ya kisalu, yo ta vanda na bupusi ya mbote na yandi mosi mpi na Nzambi yina yandi ke sambilaka. Na mutindu yina, Mukristu ke salaka yonso sambu “bantu kutuba ve ata fioti mambu ya mbi sambu na zina ya Nzambi.”—1 Timoteo 6:1; Bakolosai 3:22.

 Ntumwa Polo muntu sonikaka mukanda ya Bakolosai na Bakristu yina vandaka na mbanza ya ntama ya Kolosai. b Yo ke monana nde yandi sonikaka yo pene-pene ya nsuka ya ntangu yina yandi kotaka boloko na mbala ya nsuka na Roma, pene-pene ya mvu 60-61 T.B.

 Mukanda ya Bakolosai kele ti bandongisila yina ke sadisaka Bakristu yonso na kusambila Nzambi na bumosi. (Bakolosai 3:11) Yo ke longaka bo na kumonisa bikalulu ya Nzambi, mu mbandu zola, ntima-mbote mpi kuwila bantu mawa. (Bakolosai 3:12-14) Yo ke tendulaka mpi mutindu lusambu ya Nzambi ke vandaka ti bupusi na mambu yonso ya luzingu ya muntu.—Bakolosai 3:18–4:1.

 “Mambu yonso ya beno ke sala, beno sala yo na ntima ya mvimba, bonso nde beno ke sala yo sambu na Mfumu kansi ve sambu na bankaka.”—New Catholic Bible.

 “Mpi mambu yonso ya beno ke sala, beno sala yo na ntima yonso, bonso sambu na Mfumu, kansi ve sambu na bantu.”—King James Version.

 “Konso kima ya beno ke sala [ata beno kele ti konso kisalu], beno sala yo na moyo [disongidila, beno sala ngolo kibeni], bonso nde [yo kele kima ya beto ke sala] sambu na Mfumu kansi sambu na bantu ve.”—The Amplified Study Bible, bo bantu me yika ba crochet.

 “Ata beno kele ti konso kisalu, beno sala yo na ntima mpi na moyo ya mvimba, bonso na kisalu ya beno ke sala sambu na Mfumu kansi ve kaka sambu na bantu.”—The New Testament in Modern English, ya J. B. Phillips.

 Tala video yai ya nkufi sambu na kumona na bunkufi mambu yina kele na mukanda ya Bakolosai.