“Sambu lufutu yina disumu ke pesaka kele lufwa, kansi dikabu yina Nzambi ke pesaka kele luzingu ya mvula na mvula na nzila ya Mfumu na beto Kristu Yezu.”—Baroma 6:23, Mbalula ya Nsi-Ntoto ya Mpa.

 “[Salere] ya masumu kele lufwa; kansi makabu yina ya Nzambi ke pesaka beto na luzolo na yandi, yo kele moyo ya mvula na mvula ya beto ke na yo na kimvuka ti Mfumu na beto Yesu Kristo.”—Baroma 6:23, Biblia en Kituba.

 Na bangogo yai, ntumwa Polo ke tendula nde bantu ke fwaka sambu bo kele bantu ya masumu. Kansi, Nzambi ke pesa bantu ya kwikama ya ke sambilaka yandi kivuvu ya kitoko, disongidila dikabu ya luzingu ya mvula na mvula.

 “Lufutu yina disumu ke pesaka kele lufwa.” Bantu yonso ke butukaka ya kukonda kukuka, yo yina bo ke vandaka ti kikalulu ya kusala masumu. a (Nkunga 51:5; Longi 7:20) Sambu bantu ke butukaka bantu ya masumu, yo yina bo yonso ke nunaka mpi ke fwaka.—Baroma 5:12.

 Sambu na kutendula diambu yai, Polo ke fwanisa disumu ti mfumu mosi yina ke futaka basalere. Mutindu muntu ya kisalu ke vingilaka nde bo futa yandi salere sambu na kisalu na yandi, mutindu mosi bantu lenda vingila nde bo ta fwa sambu bo kele bantu ya kukonda kukuka.

 Ata mpidina, Polo ke tendula diaka nde muntu “yina me fwa me futa mfuka ya disumu na yandi.” (Baroma 6:7) Kana muntu me fwa, yandi ke katukaka na kimpika ya masumu yina yandi salaka. Yo yina beto lenda yindula ve nde bafwa ke landaka kumona mpasi kisika mosi buna sambu na bifu na bo ya ntama. Biblia ke tubaka pwelele nde bafwa ke yindulaka ve, bo ke salaka kima ve, mpi bo ke waka ve.—Longi 9:5.

 “Kansi dikabu yina Nzambi ke pesaka kele luzingu ya mvula na mvula na nzila ya Mfumu na beto Kristu Yezu.” Na kuswaswana ti “lufutu” yina disumu ke futaka, Nzambi ke pesa bantu dikabu ya luzingu ya mvula na mvula. Bo lenda balula mpi ngogo ya ndinga ya kisina ya bo ke sadilaka sambu na “dikabu” nde “dikabu ya muntu me fwana ve na kubaka” to “dikabu ya nene.” Yo ke tubila kima mosi ya bo me pesa muntu kansi yandi me sala ve ata kima mosi sambu na kuzwa yo. Muntu mosi ve ya masumu lenda guluka mpi kubaka luzingu ya mvula na mvula na ngolo na yandi mosi. (Nkunga 49:7, 8) Kansi, Nzambi ke pesa na ntima ya mvimba dikabu yai ya mfunu ya luzingu ya mvula na mvula na bantu yina ke kwikilaka na Yezu.—Yoane 3:16; Baroma 5:15, 18.

 Polo sonikilaka Bakristu ya Roma mukanda yai pene ya mvu 56 T.B. Yo ke monana nde bantu ya nkaka na kati ya Bakristu yango vandaka ti bangindu ya mbi na yina me tala mawa ya Nzambi. Sambu bo vandaka kundima filozofi ya Bagreke, mbala ya nkaka bo vandaka kuyindula nde kana bo ke sala masumu mingi, Nzambi ta lolula bo mpi mingi. (Baroma 6:1) Mbala ya nkaka, bankaka vandaka kundima ve nde Nzambi ta pesa bo ndola sambu na bifu na bo sambu bo vandaka diaka ve na nsi ya Nsiku ya Moize. (Baroma 6:15) Na mukanda yai, Polo bulaka munsonso nde Nzambi lenda lolula ve Bakristu kana bo ke bika nde masumu kuyala luzingu na bo.—Baroma 6:12-14, 16.

 Mambu ya Polo sonikaka ke bwisa ntima ya bantu ya ke sambilaka Nzambi bubu yai nde ata bo ke butukaka bantu ya masumu, bo kele ti kivuvu. Kana bo ke zitisa bansiku ya Nzambi ya bikalulu ya mbote mpi kana bo ke kudibika ve na banzala na bo ya mbi, Nzambi ke sila nde yandi ta pesa bo luzingu ya mvula na mvula.—Baroma 6:22.

 Tala video yai ya nkufi sambu na kumona na bunkufi mambu yina kele na mukanda ya Baroma.