“Yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”—Kusonga 21:4, Mbalula ya Nsi-Ntoto ya Mpa.

 “Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.”—Kusonga 21:4, Biblia en Kituba.

 Nzambi ke sila na kukatula bampasi yina bantu ke kutanaka ti yo bubu yai mpi kisina ya bampasi yango.

 “Yandi ta kusula mansanga yonso na meso na bo.” Mambu yai ke ndimisa mambu ya Yehowa a silaka yina profete Yezaya sonikaka. Yandi tubaka nde Yehowa “ta kusula mansanga na baluse yonso.” (Yezaya 25:8; Kusonga 7:17) Mambu yai ke monisa zola ya mingi ya Nzambi sambu na bantu yonso yina ke dila sambu muntu ya bo vandaka kuzola me fwa to sambu na bampasi ya nkaka.

 “Lufwa ta vandaka diaka ve.” Bo lenda balula mpi mambu yai nde “lufwa ta mana” to “lufwa ta vandaka diaka ve ata fioti.” Nzambi ke sila nde yandi ta katula lufwa mpi bampasi yina yo ke nataka. Diaka, yandi ta futumuna bantu ya me fwaka. (1 Bakorinto 15:21, 22) Yo yina, yandi “ta katula lufwa.”—1 Bakorinto 15:26.

 “Mawa, bidilu, mpi mpasi ta vandaka diaka ve.” Mambu yai ya Nzambi ke sila ke tendula ve nde bantu ta waka diaka ve mpasi, ata mpasi ya beto ke waka na nitu sambu na kusonga beto nde kigonsa kele to nde beto lenda lwala. Kansi, lusilu yai ke songa nde bampasi yonso ya me katukaka na disumu b mpi na kukonda kukuka ta vanda diaka ve.—Baroma 8:21, 22.

 “Mambu ya ntama me vila.” Mambu yai ya kele na nsuka ya verse ke monisa nsoba ya nene yina bantu ta kutana ti yo. Mukanda mosi ke tuba nde: “Luzingu ya ntama ya bantu, yina bo vandaka kukutana ntangu yonso ti lufwa, kudila mpi mpasi ta vanda diaka ve; Nzambi ta yingisa yo ti luzingu ya mpa.” Na ntangu yina, bantu ta zinga luzingu ya kitoko mvula na mvula na ntoto mutindu Nzambi kanaka na luyantiku.—Kuyantika 1:27, 28.

 Na luyantiku ya kapu 21, ntumwa Yoane ke tubila mambu yina yandi monaka na mbona-meso: “Mono monaka zulu ya mpa ti ntoto ya mpa.” (Kusonga 21:1) Yandi ke sadila kutuba ya kifwani sambu na kutendula nsoba ya nene yina baverse ya nkaka ya Biblia ke tubila. (Yezaya 65:17; 66:22; 2 Piere 3:13) Luyalu yina Nzambi ta tula na zulu, disongidila “zulu ya mpa,” ta yinga baluyalu yonso ya bantu mpi ta yala “ntoto ya mpa,” disongidila, kimvuka ya mpa ya bantu yina ta zinga na ntoto.—Yezaya 65:21-23.

 Inki ke monisa nde mbona-meso yina ke tubila ntoto? Ya ntete, lusilu yai ya Nzambi ke yantika ti mambu yai: “Tenta ya Nzambi kele ti bantu.” (Kusonga 21:3) Yo yina, Nzambi pesaka ve lusilu yai na bawanzio ya ke vandaka na zulu, kansi na bantu awa na ntoto. Ya zole, mbona-meso ke tubila insi yina “lufwa ta vandaka diaka ve.” (Kusonga 21:4) Lufwa me vandaka ntete ve na zulu, kansi yo ke niokulaka kaka bantu na ntoto. (Baroma 5:14) Yo yina, yo me fwana na kutuba nde verse yai ke tubila mambu yina ta vanda na ntoto na bilumbu ke kwisa.

 Tala video yai ya nkufi sambu na kumona na bunkufi mambu yina kele na mukanda ya Kusonga.