“Sambu mambu ya Nzambi ke tubaka ta lungana.”​—Luka 1:37, Mbalula ya Nsi-Ntoto ya Mpa.

 “Sambu Nzambi lunga sala mambu yonso.”​—Luka 1:37, Bible en Kituba.

 Nzambi Nkwa-Ngolo Yonso lenda sala mambu yina bantu ke monaka nde yo lenda salama ve. Kima mosi ve lenda kanga yandi nzila ya kulungisa mambu yina yandi ke tuba to ke sila.

 Ngogo ya ndinga ya kisina ya bo me balula nde “mambu” lenda tendula mpi “ngogo” to “ndinga”​—na mbandu yai, yo kele ngogo to ndinga ya Nzambi. Yo lenda tadila mpi mambu yina mambu ya Yehowa a Nzambi me tuba lenda basisa. Sambu mambu ya Nzambi ke tubaka ke lunganaka ntangu yonso, beto lenda balula Luka 1:37 mpi nde: “Sambu mambu ya Nzambi ke silaka ke lunganaka kaka” to “Sambu na Nzambi, mambu yonso ke lunganaka.” Mutindu yai ya kubalula mambu ya kele na ndinga ya Kigreki ya kisina ke tubila kaka kieleka mosi ya mfunu: Diambu mosi ve ya Nzambi ke tubaka to ke silaka ta konda kulungana, sambu Nzambi lenda sala mambu yonso.​—Yezaya 55:10, 11.

 Beto ke kuta balusilu ya mutindu mosi bisika mingi na Biblia ya mvimba. Mu mbandu, na nzila ya wanzio mosi, Yehowa tubaka nde Sara, nkento ya Abrahami yina vandaka ve ti mwana, ta baka divumu na kimununu. Nzambi yikaka nde: “Keti kele ti diambu ya kuluta mpasi sambu na Yehowa?” (Kuyantika 18:13, 14) Na nima ya kuyindula bima ya Nzambi me salaka, Yobi ndimaka nde: “Ata kima mosi ve ya nge ke yindula kusala kele mpasi sambu na nge.” (Yobi 42:2) Mpi ntangu balongoki ya Yezu vandaka ti badute nde bo ta lungisa ve mambu ya Nzambi ke lombaka sambu na kuguluka, Yezu yibusaka bo nde “Nzambi lenda sala mambu yonso.”​—Matayo 19:25, 26. b

 Wanzio mosi, zina na yandi Gabriele songaka mambu ya kele na Luka 1:37 na mwense mosi, zina na yandi Maria. Gabriele songaka yandi kaka nde yandi ta buta “Mwana ya Muntu ya Kuluta Zulu” mpi yandi fwete “pesa yandi zina Yezu.” Yandi zolaka kukuma Ntotila ya Kimfumu ya Nzambi; Kimfumu yango ta yala kimakulu.​—Luka 1:26-33; Kusonga 11:15.

 Maria yulaka nki mutindu diambu ya mutindu yai lenda salama sambu yandi balaka ntete ve mpi yandi “me vukisaka ntete ve nitu ti bakala.” (Luka 1:34, 35) Gabriele vutulaka nde Nzambi ta sadila mpeve santu na yandi. Na ntangu yina, Yezu vandaka mwana ya Nzambi mpi vandaka ti nitu ya kimpeve na zulu. Yo yina, Yehowa sadilaka mpeve santu na yandi sambu na kukatula luzingu ya Mwana na yandi na zulu mpi kukotisa yo na divumu ya Maria. (Yoane 1:14; Bafilipi 2:5-7) Yo yina yandi bakaka divumu na mutindu ya kuyituka. Sambu na kukumisa ngolo lukwikilu na yandi na ngolo ya Nzambi, wanzio songaka yandi nde mpangi na yandi Elizabeti me katuka kubaka divumu mpi ta buta mwana ya bakala “na kimununu na yandi.” Elizabeti ti bakala na yandi, Zekaria, vandaka ve ti mwana sambu Elizabeti vandaka mukobo. (Luka 1:36) Mwana na bo kumaka Yoani-Mbotika, mpi Yehowa tubilaka na ntwala kisalu na yandi ya kulonga.​—Luka 1:10-16; 3:1-6.

 Na nima, wanzio Gabriele tubaka mambu ya kele na Luka 1:37, mbala ya nkaka yandi vandaka kuyindula Maria mpi Elizabeti. Mambu yai ke ndimisa bantu ya ke sambilaka Yehowa bubu yai nde yandi ta landa kulungisa mambu ya yandi ke sila. Yo ke tadila mpi lusilu na yandi ya kukatula baluyalu ya bantu mpi ya kuyingisa yo na luyalu ya mbote ya mwana na yandi, Yezu Kristu, Ntotila ya Kimfumu ya zulu.​—Daniele 2:44; 7:13, 14.

 Tala video yai ya nkufi sambu na kumona na bunkufi mambu yina kele na mukanda ya Luka.