“Yo yina, mono ke tubila beno nde, bima yonso ya beno ke lomba na kisambu, beno vanda na lukwikilu nde beno me baka yo, mpi beno ta baka yo.”​—Marko 11:24, Mbalula ya Nsi-Ntoto ya Mpa.

 “Yo yina mono ke tubila beno nde: Konso kima ya beno ta lomba na bisambu na beno, beno fweti tula ntima nde beno me baka yo, ebuna Nzambi ta pesa beno yo.”​—Marko 11:24, Bible en Kituba.

 Na nsadisa ya bangogo yina, Yezu songaka balongoki na yandi nde yo kele mfunu mingi nde bo vanda ti lukwikilu ya ngolo na ngolo yina kisambu ke vandaka ti yo. Yandi bwisaka bo ntima nde Nzambi ke waka bisambu na bo mpi yandi ke pesaka mvutu na bisamu yina. Muntu yina ke samba na masonga yonso na kuwakana ti luzolo ya Nzambi lenda ndima nde mambu yina yandi ke lomba na kisambu ta lungana mpenza. Yo kele bonso nde Nzambi me pesa deja mvutu na kisambu yina.

 Yezu monisaka nde yo kele mfunu na kuvanda ti lukwikilu ntangu beto ke samba. Yandi tubaka nde muntu yina ke samba fwete “tula ntembe ve na ntima na yandi” kansi yandi fwete vanda ti “lukwikilu nde mambu yina yandi ke tuba ta salama.” (Marko 11:23) Sambu na nki? Sambu bantu yina ke tulaka ntembe lenda “tula ntima ve nde yandi ta baka konso kima yina na Yehowa.” a​—Yakobo 1:5-8.

 Muntu ya kele ti lukwikilu ke sambaka na mabaku mingi. (Luka 11:9, 10; Baroma 12:12) Na mutindu yai, yandi ke monisaka nde yandi kele mpenza na mfunu ya mambu yina yandi ke lomba mpi nde yandi ke ndimaka mpenza nde Nzambi lenda pesa mvutu na kisambu na yandi. Ya kieleka, yandi ke ndimaka mpi nde Nzambi lenda pona na kupesa mvutu na kisambu na yandi na mutindu ya me swaswana ti mutindu yina yandi vandaka kuyindula mpi Nzambi lenda pesa mvutu yina na ntangu ya me swaswana ti ntangu yina muntu yango vandaka kuyindula.​—Baefezo 3:20; Baebreo 11:6.

 Kansi, mambu ya Yezu tubaka ke tendula ve nde konso muntu yina lenda vingila nde yandi ta baka mambu yonso ya yandi ke lomba Nzambi na kisambu. Yezu vandaka kusolula ti balongoki na yandi, bantu ya vandaka ti lukwikilu mpi yina vandaka kusala ngolo sambu na kusambila Yehowa Nzambi na mutindu yina yandi ke zolaka. Biblia ke tuba nde Yehowa ke waka kaka bisambu yina kele na kuwakana ti luzolo na yandi. (1 Yoane 5:14) Yandi ke waka ve bisambu ya bantu yina ke fwaka bansiku na yandi na nku yonso mpi yina ke salaka mambu ya mbi kukonda kubalula ntima. (Yezaya 1:15; Mika 3:4; Yoane 9:31) Sambu na kuzaba mambu mingi ya me tala bisambu yina Yehowa ke ndimaka, tala video yai ya nkufi.

 Na bilumbu ya nsuka ya kisalu ya Yezu awa na ntoto, yandi solulaka ti balongoki na yandi diambu ya me tala mfunu ya kuvanda ti lukwikilu ya ngolo na Nzambi. Yandi sadilaka mbandu mosi sambu na kumonisa nde yo kele mfunu mingi. Ntangu yandi vandaka kukwenda na Yeruzalemi, yandi monaka nti mosi ya bafige yina basisaka matiti na ntwala ya nsungi na yo. Kansi, nti yango vandaka ve ti bambuma, yo yina Yezu singaka yo. (Marko 11:12-14) Mutindu nti yina vandaka kumonana bonso nde yo kele ti bambuma kansi yo vandaka ve ti bambuma vandaka kumonisa mutindu dikanda ya Izraele ya ntama, yina vandaka kumonana bonso nde yo ke sambila Nzambi, vandaka ve ti lukwikilu na Nzambi. (Matayo 21:43) Ntangu fioti na nima, nti ya bafige yina yumaka; diambu yai monisaka nde mambu yina zolaka kukumina dikanda ya Izraele ya kukonda lukwikilu ntama mingi ve.​—Marko 11:19-21.

 Kansi, Yezu vandaka kundima nde balongoki na yandi ta kuma ti lukwikilu yina bo kele ti yo mfunu sambu na kununga bampasi mpi kusala mambu ya kuyituka. (Marko 11:22, 23) Bandongisila ya Yezu ya ke tubila kisambu vandaka mfunu mpenza mpi yo fwanaka sambu na balongoki sambu lukwikilu na bo zolaka kumekama ntama mingi ve. Yo lombaka nde bo kanga ntima na lufwa ya Yezu mpi lufwa yina zolaka kusala nde bo kutana ti bampasi mingi na kisalu na bo ya kulonga. (Luka 24:17-20; Bisalu 5:17, 18, 40) Bubu yai, balongoki ya Yezu lenda nunga mpi mambu ya mpasi ntangu bo ke kwikila na Nzambi mpi na ngolo yina kisambu ke vandaka ti yo.​—Yakobo 2:26.

 Tala video yai ya nkufi sambu na kumona na bunkufi mambu yina kele na mukanda ya Marko.