“Sambu na mambu yonso, mono kele ti ngolo na nzila ya muntu yina ke pesaka mono ngolo.”—Bafilipi 4:13, Mbalula ya Nsi-Ntoto ya Mpa.

 “Mono me lunga kusala mambu yonso na ngolo yina ya Kristo ke pesaka mono.”—Bafilipi 4:13, Bible en Kituba.

 Mambu yai ya Polo sonikaka ke ndimisaka bantu yina ke sambilaka Nzambi nde bo ta baka ngolo sambu na kusala luzolo ya Nzambi.

 Bambalula ya nkaka ya Biblia ke tubaka nde Kristu muntu pesaka Polo ngolo. Kansi, ngogo “Kristu” kele ve na verse yai na maniskri ya ntama kibeni ya Kigreki. Yo yina, bambalula mingi ya bilumbu na beto ke sadilaka bangogo bonso “muntu yina ke pesaka mono ngolo” (Mbalula ya Nsi-Ntoto ya Mpa), “yandi muntu ke pesaka mono ngolo” (New International Version), mpi “yandi kisina ya ngolo na mono” (New American Bible). Polo vandaka kuyindula nani ntangu yandi sonikaka mambu yai?

 Mambu ya kapu yai ke tubila ke monisa nde Polo vandaka kutubila Nzambi. (Bafilipi 4:6, 7, 10) Na ntwala, kaka na mukanda yina, Polo sonikilaka Bafilipi nde: “Sambu Nzambi muntu ke pesaka beno kikesa. . ., mpi yandi ke pesaka beno . . . ngolo ya kusala mambu.” (Bafilipi 2:13) Mpi na 2 Bakorinto 4:7, yandi sonikaka nde Nzambi muntu pesaka yandi ngolo sambu na kusala kisalu na yandi. (Fwanisa ti 2 Timoteo 1:8.) Yo yina, beto kele ti bikuma ya mbote ya kutuba nde Polo vandaka kutuba nde Nzambi kele “muntu yina ke pesaka mono ngolo.”

 Inki Polo zolaka kutuba ntangu yandi sonikaka nde yandi ta baka ngolo “sambu na mambu yonso”? Yo ke monana nde, mambu ya Polo vandaka kutubila kele mambu ya mutindu na mutindu yina yandi kutanaka ti yo ntangu yandi vandaka kusala luzolo ya Nzambi. Yo vanda ntangu yandi vandaka ti bima mingi ya kinsuni to bima fioti, yandi vandaka kutula ntima na Nzambi sambu na kusadisa yandi. Yo yina, Polo longukaka na kusepela ti mambu yonso yina yandi vandaka kukutana ti yo.—2 Bakorinto 11:23-27; Bafilipi 4:11.

 Mambu ya Polo sonikaka lenda bwisa ntima ya bantu yina ke sambilaka Nzambi bubu yai. Nzambi ta pesa bo ngolo yina bo kele ti yo mfunu sambu na kukanga ntima na bampasi mpi sambu na kusala luzolo na yandi. Nzambi lenda pesa bo ngolo na nzila ya mpeve santu na yandi, na nzila ya bampangi na bo Bakristu mpi na nzila ya Ndinga na yandi, Biblia.—Luka 11:13; Bisalu 14:21, 22; Baebreo 4:12.

 Mambu yai kele na kati ya mambu ya nsuka ya kele na mukanda yina Polo sonikilaka Bakristu ya Filipi. Yandi sonikaka mukanda yai pene-pene ya mvu 60-61 ya ntangu na beto, ntangu yandi vandaka na boloko na mbala ya ntete na Roma. Na nsungi mosi ya me zabana ve, Bakristu ya Filipi vandaka kukuka ve kupesa ntumwa Polo bima ya kinsuni sambu na kusadisa yandi. Kansi ntangu yai, bo vandaka kutindila Polo makabu sambu yandi lungisa bampusa na yandi.—Bafilipi 4:10, 14.

 Polo sikisaka na masonga yonso Bakristu ya Filipi sambu na kikalulu na bo ya kukaba mpi yandi ndimisaka bo nde yandi vandaka ti bima yina yandi vandaka ti mfunu na yo. (Bafilipi 4:18) Yandi sadilaka mpi dibaku yina sambu na kuzabisa bo diambu mosi ya mfunu ya luzingu ya Bukristu: Bakristu yonso, bo vanda bamvwama to bansukami, lenda vanda na kiese ya kieleka kana bo ke tula ntima na lusadisu ya Nzambi.—Bafilipi 4:12.