“Pesa mambu yonso ya nge ke sala na Yehowa, ebuna balukanu na nge ta nunga.”—Bingana 16:3, Mbalula ya Nsi-Ntoto ya Mpa.

 “Songa MFUMU NZAMBI bangindu na nge, mpidina nge ta bonga.”—Bingana 16:3, Bible en Kituba.

 Verse yai ke ndimisa bantu yina ke sambilaka Nzambi ya kieleka nde balukanu na bo ta nunga kana bo ke tudila yandi ntima mpi ke sosa lutwadisu na yandi.

 “Pesa mambu yonso ya nge ke sala na Yehowa.” Na ntwala ya kubaka balukanu, bantu ya ke sambilaka a ke sosaka lutwadisu na yandi na kudikulumusa yonso. (Yakobo 1:5) Sambu na nki? Sambu, mbala mingi bantu ke vandaka ve ti kiyeka to bo ke vandaka ti kiyeka fioti na mambu ya ke salamaka na luzingu na bo. (Longi 9:11; Yakobo 4:13-15) Diaka, bo ke vandaka ve ti mayele ya kulungisa balukanu na bo. Yo yina, na mayele yonso, bantu mingi ke pesaka Nzambi mambu ya bo ke sala. Inki mutindu bo ke salaka yo? Bo ke sambaka yandi sambu na kulomba lutwadisu na yandi mpi bo ke salaka mambu na kuwakana ti mambu yina yandi me monisaka na Ndinga na yandi, Biblia.—Bingana 3:5, 6; 2 Timoteo 3:16, 17.

 Bangogo “songa MFUMU NZAMBI b bangindu na nge” ke tendula ntete-ntete “bikila MFUMU NZAMBI bisalu na nge.” Mukanda mosi ke tuba nde, bangogo yai ke pesa dibanza ya “muntu mosi yina ke katula kilo ya kele na mukongo na yandi mpi ke tula yo na mukongo ya muntu ya me fwana mpi ya kele ti ngolo mingi sambu na kunata yo.” Bantu yina ke tulaka ntima na kudikulumusa yonso na Nzambi lenda ndima nde yandi ta sadisa bo mpenza.—Nkunga 37:5; 55:22.

 Bangogo “bangindu na nge” ke tendula ve nde Nzambi ta ndima to ta sakumuna bangindu yonso yina bantu kele ti yo. Sambu Yehowa kusakumuna bo, bangindu na bo fwete wakana ti bansiku mpi luzolo na yandi. (Nkunga 127:1; 1 Yoane 5:14) Nzambi ke sakumunaka ve muntu kana yandi me kolama. Na kutuba ya kieleka, yandi “ke bebisaka balukanu ya bantu ya mbi.” (Nkunga 146:9) Kansi, yandi ke sadisaka bantu yina ke lemfukilaka yandi mpi ke zitisaka bansiku na yandi yina kele na Biblia.—Nkunga 37:23.

 “Ebuna balukanu na nge ta nunga.” Bambalula ya nkaka ke balulaka bangogo yai nde “mpidina bangindu na nge ta bonga.” Na Masonuku ya Kiebreo, to yina bantu ke bingaka mbala mingi nde Kuwakana ya Ntama, ngogo ya bo me balula na Kikongo nde “bonga” ke pesa ngindu ya kutula fondasio, mpi mbala mingi yo ke tubilaka mutindu bima ya Nzambi me salaka ke vandaka ngolo. (Bingana 3:19; Yeremia 10:12) Mutindu mosi, Nzambi ta kumisa ngolo balukanu ya bantu yina yandi ke monaka nde bo kele bantu ya mbote, yandi ta sadisa bo sambu bo vanda ti luzingu ya mbote, ya kitoko mpi ya kiese.—Nkunga 20:4; Bingana 12:3.

 Ntotila Salomo, yina sonikaka baverse mingi ya kele na mukanda ya Bingana, muntu sonikaka verse yai. Yandi vandaka kutuba mafunda ya bingana sambu na mayele yina Nzambi pesaka yandi.—1 Bantotila 4:29, 32; 10:23, 24.

 Na kapu 16, Salomo ke yantika na kukumisa mayele ya Nzambi mpi yandi ke monisa mutindu Nzambi ke mangaka bantu ya lulendo. (Bingana 16:1-5) Na nima, baverse ya ke landa ke sadisa muntu ya ke tanga na kubakisa diambu mosi ya mfunu; bo ke vutukila diambu yai mbala mingi na mukanda ya Bingana: Bantu lenda vanda mpenza mayele mpi bo lenda nunga kaka kana bo kele ya kudikulumusa, mpi kana bo ke bika nde Nzambi kutwadisa luzingu na bo. (Bingana 16:3, 6-8, 18-23) Bo ke vutukilaka kileka yai mbala mingi na Biblia.—Nkunga 1:1-3; Yezaya 26:3; Yeremia 17:7, 8; 1 Yoane 3:22.

 Tala video yai ya nkufi sambu na kumona na bunkufi mambu yina kele na mukanda ya Bingana.