“Longa mwana-bakala na nzila yina yandi fwete kwenda; ata ntangu yandi ta kuma mbuta, yandi ta yambula yo ve.”—Bingana 22:6, Mbalula ya Nsi-Ntoto ya Mpa.

 “Longa mwana mutindu yandi fweti zinga, ebuna ntangu yandi me kuma mbuta yandi ta vila yo ve.”—Bingana 22:6, Bible en Kituba.

 Bibuti yina ke longaka bana na bo na kuzola Nzambi mpi na kuzitisa bansiku na yandi lenda vingila nde malongi yina kusadisa bana na bo luzingu ya mvimba.

 “Longa mwana-bakala na nzila yina yandi fwete kwenda.” Bo lenda balula bangongo yai nde “yantikisa mwana na nzila ya mbote.” Baverse mingi ya mukanda ya Bingana ke siamisaka bibuti na kulonga bana na bo mambu ya mbote mpi mambu ya mbi banda na kileke mpenza. (Bingana 19:18; 22:15; 29:15) Kansi, bibuti yina ke zolaka bana na bo ke zabaka nde bana, bonso bambuta, ke vandaka ti kimpwanza ya kupona mambu ya bo ta sala. Yo yina, na kisika ya kusonga bana kaka mambu yina bo fwete sala, bo ke yindulaka ti bo mpi ke sadisaka bo na kukuma bambuta yina lenda baka balukanu ya mbote bo mosi.—Kulonga 6:6, 7; Bakolosai 3:21.

 Bantu ya nkaka ya mayele ya ke tendulaka Biblia ke tuba nde bangogo yai ke tendula “longa mwana na kuwakana ti kimuntu na yandi,” to na kuwakana ti bikalulu na yandi. Ntendula yai lenda monana bonso nde yo kele ya mbote, kansi bangogo ya Kiebreo ya bo balulaka nde “na nzila yina yandi fwete kwenda” lenda tadila mbala ya nkaka luzingu yina kele ya mbote mpi ya lunungu. Mukanda ya Bingana ke monisa pwelele banzila zole yina muntu lenda landa. Yo ke binga nzila mosi “nzila ya bantu ya mbote,” “nzila ya mayele,” mpi “nzila ya mbote.” (Bingana 2:20; 4:11; 23:19) Yo ke binga nzila yina ya nkaka “nzila ya bantu ya mbi,” “nzila ya zoba,” mpi “nzila ya mbi.” (Bingana 4:14; 12:15; 16:29) Yo yina, nzila yina mwana “fwete kwenda” kele “nzila ya mbote,” disongidila mutindu ya luzingu yina Ndinga ya Nzambi, Biblia ke longaka.—Nkunga 119:105.

 “Ata ntangu yandi ta kuma mbuta, yandi ta yambula yo ve.” Kana bibuti ke longa mwana na bo bansiku ya Nzambi ya bikalulu ya mbote, chance kele mingi nde mwana yina kubikala na nzila ya mbote luzingu na yandi ya mvimba. Kansi, yo ke tendula ve nde mwana yina bo me longa yandi mbote ta “yambula” ve ata fioti nzila ya mbote to nde yandi ta buya ve kuzitisa bansiku ya Nzambi. Mu mbandu, kana muntu ke lutisa ntangu ti bantu yina ke siamisaka bantu ya nkaka na kusala mambu ya mbi, yandi lenda yambula nzila ya “banzila ya kusungama” mpi kusala mambu ya mbi. (Bingana 2:12-16; 1 Bakorinto 15:33) Ata kana yo salama mutindu yina, kana bibuti kulonga bana na bo na kuzitisa bansiku ya Nzambi ya bikalulu ya mbote, bo ta pesa bo dibaku ya mbote ya kununga na luzingu.—Bingana 2:1, 11.

 Bingana kapu 22 kele kimvuka ya bangogo ya nkufi yina ke sadisa beto na kusadila mayele ya Nzambi na mambu mingi ya beto ke kutanaka ti yo na luzingu. Bangogo yango ke benda dikebi na mfunu ya kuvanda ti lukumu ya mbote na meso ya Yehowa; a muntu lenda kuma ti lukumu yina kana yandi ke monisa kudikulumusa, kikalulu ya kukaba mpi ke sala ngolo. (Bingana 22:1, 4, 9, 29) Kansi, baverse ya nkaka ke monisa nde bantu yina ke buyaka kuzitisa bansiku ya Nzambi mpi ke nyokulaka bansukami ta kutana ti malandi ya mbi.—Bingana 22:8, 16, 22-27.

 Ata baverse mingi ya Bingana kapu 22 ke tubilaka ve kulonga mwana, yo ke tendulaka mutindu ya luzingu yina ke salaka nde Nzambi kundima muntu mpi muntu kubaka kiese ya kieleka. (Bingana 22:17-19) Kana bibuti ke longa bana na bo na kuzinga mutindu yina, bo ke monisaka nde bo ke zola bana na bo kuvanda ti luzingu ya kuluta mbote.—Baefezo 6:1-3.

 Tala video yai ya nkufi sambu na kumona na bunkufi mambu yina kele na mukanda ya Bingana.