NTENDULA YA BAVERSE YA BIBLIA

Matayo 6:33—“Sosa Ntete Kimfumu ya Nzambi”

TALA NA

“Yo yina, beno landa kusosa ntete Kimfumu ti lunungu na yandi, ebuna yandi ta yika beno bima yina yonso ya nkaka.”—Matayo 6:33, Mbalula ya Nsi-Ntoto ya Mpa.

“Kansi, beno sosa ntete kimfumu ya Nzambi ti lunungu na Yandi, ebuna bo ta yikila beno bima yonso yai.”—Matayo 6:33, New King James Version.

Ntendula ya Matayo 6:33

Kimfumu ya Nzambi kele luyalu mosi ya kele na zulu yina ta lungisa luzolo ya Nzambi na ntoto. (Matayo 6:9, 10) Muntu ke sosaka ntete Kimfumu kana yandi me kumisa yo kima ya kuluta mfunu na luzingu na yandi. a Yo ke tendula nde yandi fwete suka ve kaka na kuvanda ti nzala ya ngolo ya kulonguka mambu ya me tala Kimfumu ya Nzambi kansi yandi fwete zabisa mpi bantu ya nkaka mambu ya mbote yina yo ta sala. (Matayo 24:14) Muntu yina ke sosaka Kimfumu ke sambaka mpi sambu yo kwisa.—Luka 11:2.

Lunungu ya Nzambi ke tadila mpi bansiku na yandi ya ke tubila bikalulu ya mbote mpi ya mbi. (Nkunga 119:172) Yo yina, muntu ke sosaka lunungu ya Nzambi kana yandi ke zinga na kuwakana ti bansiku ya Nzambi ya bikalulu ya mbote, yina ke natilaka beto mambote ntangu yonso.—Yezaya 48:17.

Bangogo yandi ta yika beno bima yina yonso ya nkaka ke lusilu yina Nzambi ke pesa ya kulungisa bampusa ya bantu yina ke tula Kimfumu mpi bansiku na yandi na kisika ya ntete na luzingu na bo.—Matayo 6:31, 32.

Mambu ya Bo Ke Tubila na Matayo 6:33

Yezu tubaka mambu yai na disolo yina bantu mingi ke bingaka Disolo na Zulu ya Ngumba; yo kele na Matayo kapu 5-7. Ntembe kele ve nde bantu mingi yina vandaka kuwidikila Yezu vandaka bansukami. Ziku bo vandaka kuyindula nde bo fwete kudipesa ntete-ntete na kusosa bima ya kuzingila; kana bo sala mpidina zolaka kuvanda ve ti ntangu mingi sambu na kusosa Kimfumu. Kansi Yezu siamisaka bo na kutala mutindu Nzambi ke kebaka banti na bambisi. Nzambi ke sila na kusala mutindu mosi sambu na bantu yina ke sosa ntete Kimfumu na yandi.—Matayo 6:25-30.

Bangindu ya Luvunu na Yina Me Tala Matayo 6:33

Ngindu ya Luvunu: Muntu yina ke sosaka Kimfumu ta kuma mvwama.

Diambu ya Kieleka: Yezu tubaka nde bantu yina ke tula Kimfumu ya Nzambi na kisika ya ntete ta vanda ti bima yina bo ke na yo mfunu, mu mbandu madia mpi bilele. (Matayo 6:25, 31, 32) Kansi, yandi tubaka ve nde bo ta vanda ti luzingu ya biese, yandi tubaka mpi nde bo fwete vanda ti bima mingi ya kinsuni sambu na kutuba nde Nzambi ke sakumuna bo. Ya kieleka, Yezu buyisaka bantu yina vandaka kuwa yandi na kusosa bimvwama, sambu bimvwama lenda kanga mpenza muntu nzila ya kusosa ntete Kimfumu. (Matayo 6:19, 20, 24) Ntumwa Polo salaka ngolo kibeni sambu na Kimfumu ya Nzambi, ata mpidina bantangu ya nkaka yandi vandaka ve ti bima mingi ya kuzingila. Bonso Yezu, yandi kebisaka bantu ya nkaka nde yo kele kigonsa na kusala ngolo sambu na kukuma bamvwama.—Bafilipi 4:11, 12; 1 Timoteo 6:6-10.

Ngindu ya Luvunu: Bakristu fwete sala ve kisalu sambu na kuzwa bima ya kuzingila.

Diambu ya Kieleka: Biblia ke tuba nde Bakristu fwete sala kisalu sambu na kulungisa bampusa na bo mosi mpi bampusa ya mabuta na bo. (1 Batesalonika 4:11, 12; 2 Batesalonika 3:10; 1 Timoteo 5:8) Yezu tubaka ve nde balongoki na yandi fwete sosa kaka Kimfumu; kansi, yandi tubaka nde bo fwete sosa ntete Kimfumu.

Bantu yina ke sosaka ntete Kimfumu ya Nzambi mpi yina ke salaka kisalu sambu na kuzwa bima ya kuzingila lenda tula ntima nde Nzambi ta sadisa bo na kuzwa bima ya mfunu ya kuzingila.—1 Timoteo 6:17-19.

a “Beno landa kusosa,” bo me balula yo katuka na verbe mosi ya Kigreki yina ke monisa kima ya muntu fwete landa kusala, mpi bo lenda balula yo nde “sosa ntangu yonso.” Yo yina, Kimfumu fwete vanda na kisika ya ntete kansi ve kima mosi ya muntu fwete tudila dikebi kaka na ntangu fioti.