“Beno kudiyangisa ve ata fioti sambu na kilumbu yina ke landa, sambu kilumbu yina ke landa ta vanda ti basusi na yo. Konso kilumbu ke vandaka ti bampasi na yo.”—Matayo 6:34, Mbalula ya Nsi-Ntoto ya Mpa.

 “Beno mona mpasi ve sambu na mambu yina ke kwisa mbasi; kilumbu ya mbasi ta vanda na mpasi na yo mosi ya kufwana. Konso kilumbu ke natilaka beto mpasi.”—Matayo 6:34, Bible en Kituba.

 Yezu muntu tubaka mambu yai mpi yandi ndimisaka bantu yina vandaka kuwidikila yandi nde bo fwete kudiyangisa ve kuluta ndilu sambu na mambu yina bo ta kutana ti yo na bilumbu ke kwisa. Kansi, bo ta baka mambote kana bo ke yindula mambu ya kilumbu mosi mpamba.

 Yezu tubaka ve nde beto fwete yindula ve kilumbu yina ke landa to kudibongisa sambu na bilumbu ke kwisa. (Bingana 21:5) Kansi, yandi vandaka kusadisa beto na kudiyangisa ve mingi kuluta ndilu, to na kuvanda ve ti basusi mingi kuluta sambu na mambu yina lenda salama na kilumbu yina me landa. Basusi ya mutindu yina lenda katula kiese na beto mpi kusala nde beto sala ve bisalu yina beto kele na yo. Yo ke tendula ve nde beto ta yidika mambu ya beto ta kutana ti yo na bilumbu ke kwisa kana beto ke kudiyangisa sambu na yo bubu. Mpi mbala mingi mambu yina beto ke kudiyangisaka sambu na yo ke salamaka ve to ke vandaka ve mbi mutindu beto yindulaka.

 Mambu yai ya Yezu tubaka kele na kati ya Disolo na Zulu ya Ngumba yina me zabanaka mingi; disolo yango kele na Matayo kapu 5-7. Na disolo yina, Yezu tubaka nde kudiyangisa kuluta ndilu lenda tomisa ve luzingu na beto to kukumisa yo nda. (Matayo 6:27) Yandi tubaka mpi nde kana beto ke tula Nzambi na kisika ya ntete na luzingu na beto, beto fwete kudiyangisa ve kuluta ndilu sambu na kilumbu ya ke landa. Nzambi ke kebaka banti ti bambisi; yandi ta keba mpi bantu yina ke sadilaka yandi.—Matayo 6:25, 26, 28-33.