NTENDULA YA BAVERSE YA BIBLIA

Nkunga 23:4—“Ata Mono Kwenda na Nzila ya Mpimpa Mingi Bonso Lufwa”

TALA NA

“Ata mono ke tambula na muwanda ya mpimpa ya ngolo, mono ke waka ve boma ya kima ya mbi, sambu nge kele ti mono; nti na nge mpi muhangu na nge ke bwisaka mono ntima.”—Nkunga 23:4, Mbalula ya Nsi-Ntoto ya Mpa.

“Mfumu, mono lenda wa boma ve ata mono kwenda na nzila ya mpimpa mingi bonso lufwa, sambu nge kele ti mono; nge ke nataka mono ti nti na nge, nge ke taninaka mono; yo ke pesaka mono kikesa.”—Nkunga 23:4, Bible en Kituba.

Ntendula ya Nkunga 23:4 a

Nzambi ke taninaka mpi ke kudiyangisaka sambu na bantu yina ke sambilaka yandi, ata ntangu bo ke kutanaka ti mambu ya mpasi. Verse yai ke fwanisa mutindu ngungudi ke taninaka mameme ti mutindu Nzambi ke taninaka bansadi na yandi. b Bo ke kudiwaka ve nde bo kele bo mosi kana bo me kutana ti mambu ya mpasi mingi, yina verse yai ke binga kisika ya mpimpa to mudidi ya ngolo mpi kana bo me kutana ti kigonsa ya lufwa. Bo ke kudiwaka na lutaninu, bonso nde Nzambi kele na lweka na bo.

Na ntangu ya ntama, ngungudi vandaka kusadila nti to muhangu na yandi sambu na kutanina mameme na miyibi. Yandi vandaka kusadila nti yina nsongi na yo vandaka bonso ndobo sambu na kutwadisa mameme to kukatula yo na kigonsa. Mutindu mosi, Yehowa Nzambi ke bonso Ngungudi ya zola yina ke taninaka mpi ke twadisaka bantu yina ke sambilaka yandi. Ata na bantangu ya mpasi mingi na luzingu na bo, Yehowa ke kebaka bo na mitindu mingi.

Yandi ke longaka bo mpi ke pesaka bo kikesa na nzila ya Ndinga na yandi, Biblia.—Baroma 15:4.
Yandi ke waka bisambu na bo, mpi ke pesaka bo ngemba ya mabanza mpi ya mawi.—Bafilipi 4:6, 7.
Yandi ke sadilaka bampangi na bo Bakristu sambu na kupesa bo kikesa.—Baebreo 10:24, 25.
Yandi ke pesaka bo kivuvu ya kitoko sambu na bilumbu ke kwisa, ntangu yandi ta katula bampasi yonso yina bo ke kutana ti yo bubu yai.—Nkunga 37:29; Kusonga 21:3-5.

Mambu Yina Bo Ke tubila na Baverse ya Kele na Ntwala mpi na Nima ya Nkunga 23:4

Davidi muntu sonikaka Nkunga 23; yandi vandaka ngungudi na kileke mpi na nima yandi kumaka ntotila ya dikanda ya Izraele ya ntama. (1 Samuele 17:34, 35; 2 Samuele 7:8) Na luyantiku, nkunga yai ke monisa nde Yehowa kele Ngungudi yina ke twadisa, ke disa, mpi ke pesa bansadi na yandi kikesa, kaka mutindu ngungudi ya kieleka ke salaka sambu na mameme na yandi.—Nkunga 23:1-3.

Na Nkunga 23:4, ntangu yandi tubilaka lutaninu ya Nzambi, Davidi yambulaka kubinga Nzambi (yandi) mpi kumaka kubinga yandi (nge). Kusoba yina ke monisa kinduku ya ngolo yina Davidi vandaka na yo ti Yehowa. Davidi zabaka nde Nzambi ta keba yandi mpi nde Nzambi vandaka kuzaba bampasi na yandi. Yo yina, Davidi vandaka ve na boma.

Na baverse zole ya ke landa ya Nkunga 23, disongidila na verse 5 mpi 6, yandi ke sadila diaka ve mbandu ya ngungudi ti mameme kansi yandi ke sadila mbandu ya muntu ya me yamba bantu ti munzenza na yandi. Bonso muntu ya ke kabaka yina me yamba bantu, Yehowa ke baka Davidi bonso munzenza ya lukumu. Bambeni ya Davidi vandaka ve ti ngolo ya kukanga Nzambi nzila ya kukeba yandi. Na nsuka ya nkunga yai, Davidi ke ndima nde Nzambi ta monisila yandi bumbote mpi ta zola yandi luzingu na yandi ya mvimba.

Kutuba ya kifwani yina bo me sadila na Nkunga 23 ke monisa mutindu Nzambi ke landaka kuzola mpi kukeba bansadi na yandi.—1 Piere 2:25.

a Babiblia ya nkaka ke tubaka nde Nkunga yai kele nimero 22. Ata Bankunga yonso kele 150, Babiblia ya nkaka ke tulaka banimero na yo na kulanda masonama ya Kiebreo yina Bayuda ya bo ke bingaka ba masorete sonikaka, kansi bankaka ke tulaka banimero na yo na kulanda mbalula ya Kigreki ya La Septante, mbalula mosi ya masonama ya Kiebreo yina bo manisaka kusonika na mvu-nkama ya zole na ntwala ya ntangu na beto.

b Mbala mingi na Biblia, bo ke monisaka Nzambi, yina zina na yandi kele Yehowa, bonso Ngungudi ya zola. Bansadi na yandi, yina bo ke monisaka bonso mameme, ke vandaka na mfunu ya lutaninu mpi ya lusadisu na yandi.—Nkunga 100:3; Yezaya 40:10, 11; Yeremia 31:10; Ezekiele 34:11-16.