“Mono me tubila beno mambu yai sambu na nzila na mono beno vanda na ngemba. Na nsi-ntoto beno ta vanda na mpasi, kansi beno vanda kikesa! Mono me nunga nsi-ntoto.”—Yoane 16:33, Mbalula ya Nsi-Ntoto ya Mpa.

 “Mono me tubila beno mambu yina yonso sambu beno kuvanda na ngemba yina ke katukaka na kati ya kimvuka na beno ti mono. Beno ta mona mpasi mingi awa na nsi-ntoto. Kansi beno vanda na kikesa! Mono me bedisaka mbi ya nsi-ntoto yai.”—Yoane 16:33, Bible en Kituba.

 Na nsadisa ya mambu yai, Yezu ndimisaka balongoki na yandi nde bo mpi lenda pesa Nzambi kiese ata bo ke kutana ti bampasi mpi mbangika.

 “Mono me tubila beno mambu yai sambu na nzila na mono a beno vanda na ngemba.” Mambu ya me bikala ya kele na verse yai ke monisa nde ngemba yai ke tadila ve kukonda mavwanga to kukonda bitumba. Kansi, yo kele ngemba ya ntima mpi ya mabanza. Beto lenda baka ngemba yai ya kati kaka “na nzila ya” Yezu, yina silaka nde yandi ta tinda mpeve santu. “Nsadisi” yai ya kele ngolo zolaka kusadisa balongoki ya Yezu na kununga ata bo me kutana ti konso mpasi yina.—Yoane 14:16, 26, 27.

 “Na nsi-ntoto beno ta vanda na mpasi, kansi beno vanda kikesa!” Yezu ndimaka na masonga yonso nde balongoki na yandi ta kutana ti bampasi, mu mbandu bantu ta sadila bo mambu ya nku mpi ta niokula bo. (Matayo 24:9; 2 Timoteo 3:12) Ata mpidina, bo vandaka ti kikuma ya ‘kuvanda kikesa.’—Yoane 16:33.

 “Mono me nunga nsi-ntoto.” Na verse yai, ngogo “nsi-ntoto” ke tubila bantu ya mbi yina me kabwanaka ti Nzambi. b Mukanda ya 1 Yoane 5:19 ke tuba nde: “Nsi-ntoto ya mvimba kele na nsi ya kiyeka ya muntu ya mbi,” to Satana. Yo yina, bantu ya “nsi-ntoto” yai, ke yindulaka mpi ke salaka mambu kukonda kuzitisa luzolo ya Nzambi.—1 Yoane 2:15-17.

 Satana ti nsi-ntoto na yandi mekaka kukanga Yezu nzila na kusala luzolo ya Nzambi; luzolo ya Nzambi vandaka kulomba nde yandi longa bantu mambu ya Nzambi mpi yandi pesa luzingu na yandi ya kukuka bonso kimenga. (Matayo 20:28; Luka 4:13; Yoane 18:37) Kansi, Yezu bikaka ve nde nsi-ntoto kubebisa bangindu na yandi mpi kupusa yandi na kuyambula Nzambi. Yandi bikalaka ya kwikama tii na lufwa. Yo yina, Yezu lendaka kutuba nde yandi nungaka nsi-ntoto mpi nde Satana, “mfumu ya nsi-ntoto,” vandaka ve ti “kiyeka” na zulu na yandi.—Yoane 14:30.

 Yezu sadilaka mbandu na yandi mosi sambu na kusonga balongoki na yandi nde bo mpi lendaka kubikala ya kwikama na Nzambi ata ntangu kwikama na bo me mekama. Ya kieleka, Yezu vandaka kutuba nde: “Kana mono nungaka nsi-ntoto, beno lenda nunga yo mpi.”

 Yezu tubaka mambu yai na mpimpa, na ntwala ya kilumbu yina bo fwaka yandi. Sambu yandi zabaka nde yandi ta fwa ntama mingi ve, yandi sadilaka dibaku yina sambu na kupesa bantumwa na yandi ya kwikama mwa bandongisila ya mfunu. Na nsuka, yandi tubilaka ndambu ya bakieleka ya mfunu: Bo ta mona yandi diaka ve, mpi bantu ta monisa bo mpasi, nkutu bantu ta fwa bo. (Yoane 15:20; 16:2, 10) Sambu mambu yai lendaka kupesa bantumwa na yandi boma, Yezu sukisaka disolo yina ti mambu ya kele na Yoane 16:33 sambu na kupesa bo kikesa mpi kubwisa bo ntima.

 Mutindu mosi, bangogo ya Yezu mpi mbandu na yandi lenda pesa balongoki na yandi ya bubu kikesa. Bakristu yonso lenda bikala ya kwikama na Nzambi ata bo ke kutana ti bampasi.