Ã TỸ ŨN TO HÁ TỸ TER KỸ, Ã HÃ REN KỸ TAR NĨNH MŨ?

Ajũna há tãvĩ ũn tỹ ũn to há tỹ ter ja ãn ag mỹ

TI VEN NĨ

ŨN KANHRÓ AG TỸ TO KANHRÃNRÃN MÁG NỸTĨ, VẼSỸRÉNH TI TO, ŨN TỸ ŨN TO HÁ TỸ TER KỸ. Hã ra, ẽg tỹ ũn kanhró tag ag vẽnh jyvẽn mẽn kỹ, ẽg tỹ Bíblia vẽnh jyvẽn ag mĩ ãkrén tĩ. Tag vỹ ẽg mỹ ven tĩ, jérĩn mỹ Bíblia vỹ si nĩ, ge ra ti tỹ ũri ẽg ajũna ke tĩ. Hã ra Bíblia vỹ nén ũꞌũ ag to kãmén tĩ, ũn ag tỹ vẽsỹrénh tĩ ag ajũna ke jé, ag tỹ ũn to há tỹ ter kỹ. Ha vé tag to:

Ẽg tỹ ũn to há tỹ ter ja ag pi vẽsỹrinhrénh tĩ

Bíblia vỹ ke tĩ, “ũn kãgter ag vỹ nén ũ ki kagtĩg kar nỹtĩ” kar “ag tỹ nén to jykrén mũ vỹ tũg kenh ke mũ”. (Eclesiastes 9:5; Salmo 146:4) Hã kỹ Bíblia vỹ ke tĩ, ũn tỹ ter kỹ ti tỹ nũr nỹ ri ke nĩ. — João 11:11.
Ẽg tỹ Topẽ tỹ ẽg to há kri fin kỹ, tag vỹ ẽg jagãgtãn mũ

Bíblia vỹ ke tĩ: ‘Topẽ [Jeová a, TNM] tóg ũ tỹ vẽnh jykre há han mũ ag ve há han tĩ. Kỹ tóg ag tỹ ti mỹ nén to vĩ mũ jẽmẽg tĩ.’ (Salmo 34:15) Ẽg tỹ Topẽ mré vĩn kỹ, tag vỹ ẽg mỹ há han tĩ. Hã ra nén ũ há tãvĩ ẽg mỹ hãn ri ke tĩ gé. Ẽg tỹ Topẽ mỹ ẽg fe kã ki nén ũ ãn tugtó kỹ, ãn tỹ ẽg ajũna ke tĩ, ẽg tỹ tỹ ti amigo nỹtĩ jé. Kỹ ti tar tỹ ẽg jagãgtãn tĩ.
Nén ũ há tỹ ẽg mỹ hãn ri kenh ke mũ ag ti.

Ha to ãkrén nĩ, ga kri ẽg tỹ mỹ sigsér nỹtĩnh mũ, ẽg tỹ ũn to há tỹ kãgter ja ãn ag tỹ rĩnrĩr mãn nỹtĩn kỹ. Bíblia vỹ kurã ãn to kãmén há han tĩ. Ti vỹ ẽg mỹ ke tĩ: ‘Topẽ tỹ ag kanẽ var tỹ tũꞌ he kãn jé tóg ke mũ ha. Ũ tóg ter mãn ke tũ pẽ nĩ ha. Hã kỹ ũ tóg fe kaj nĩ mãn ke tũ nĩ gé, jagtar ke tũ, kaganh ke tũ. Vẽnh ven mãn ke tũ ti nĩ ha, ẽprã vẽjykre ti.’ — Nén venh ke 21:3, 4.

Ũn e ag tỹ Jeová kri fi tĩ, ag tỹ tar nỹtĩ, ag tỹ ũn to há tỹ ter kỹ, ag tỹ Topẽ vĩ kri fi tugnĩn. Ann fi tỹ fi mén mré jagnẽ mré nỹtĩgtĩ 65 ano ag kãmĩ, kar fi mén ti tỹ ter ja nĩ. Fi vỹ ke tĩ: “Bíblia tỹ inh mỹ ke tĩ, ẽg tỹ ũn to há tỹ ter ja nytĩ ag pi vẽsỹrinhrénh tĩ, kar Topẽ vỹ ag rĩnrĩr mãn han ke mũ. Sỹ inh mén mĩ ãkrén kỹ, sỹ Topẽ vĩ ãn to jykrén tĩ. Tag vỹ inh ajũna ke tĩ, sỹ nén ũ jagy ãn vẽnh pãtá rãg há han jé!”

Tina fi vỹ ke tĩ: “Timo tỹ ter ke kar, Topẽ tỹ inh tar han tĩ. Jeová tỹ inh ajũna ke tãvĩ tĩ, kurã jagy tag kãmĩ. Bíblia vỹ ẽg mỹ ke tĩ, ũn kãgter ag vỹ rĩnrĩr mãn ke mũ. Sỹ tag kri fi pẽ tĩ. Tag vỹ inh tar han tĩ, sỹ tĩg há han jé. Kỹ kejẽn, sỹ Timo venh mãn ke mũ.”

Ũn e ag tỹ Bíblia kri fi tĩ, ag tỹ ge to jykrén tĩ gé. Hã re mũn, ã mỹ Bíblia tỹ nén ũ há to kãmén tag tĩ, ã mỹ tỹ vẽnh pétĩ nĩ, ke tũ nĩn kỹ tag tỹ há tãvĩ nĩ, ti tỹ tỹ vẽnh ki há nĩ jé. Hã ra ã tỹ Bíblia tỹ nén ũ há to kãmén tĩ tugnỹm kỹ, ã tỹ venh ke mũ, Bíblia hã vỹ tỹ nén ũ há kãfór nĩ, ũn tỹ vẽsỹrénh tĩ, ag tỹ ũn to há tỹ ter ja tugnĩn, ag ajũna ke jé.