Ũn tỹ vẽsỹrénh nĩn kỹ, ti tỹ ũn to há tỹ ter ja tugnĩn, ti tỹ ti vẽsỹrénh mré ke tỹ tỹꞌũ nĩ nĩ, pi tỹ jagnã hã nĩ nĩ. Tag tỹ ti mỹ hãn ri ken kỹ ti mỹ vẽsỹrénh sĩ han tĩ hãn? Ke tũ nĩn kỹ ti mỹ ũn ag mỹ ven sór tũ nĩ ti vẽsỹrénh hãn? Vaꞌ! Ũn ag tỹ ũn ag mỹ tó kỹ, ag vẽsỹrénh to, tag tỹ ag ajũna ke tĩ. Hã ra, nén ũ tỹ ũn mỹ há han tĩ, hã re mũn tag pi ũnꞌũ mỹ há han tĩ, ũn ag pi jagnã hã nỹtĩ tugnĩn.

Ũn tỹ ti tỹ ũn to há tỹ ter kỹ, ti pi prỹg ũ ãn ag kã, nén ũ tỹ ti mỹ hãn ri kenh ke to ki kanhró nĩ. Ũn ag tỹ jagnã ri ke nỹtĩ, nén ũ jagy ag tỹ kato tẽgtẽ ag tỹ tĩ, tag vỹ ag mỹ hãn ri ken kỹ. Ha vem nĩ, hã re mũn nén ũ jagy tag tỹ ag mỹ hãn ri kenh.

Ũn ag tỹ nén ũ vẽnh mỹ mẽg tĩ. Ũn e tỹ fỹ mág mũ, kar kãnhmar ag tỹ fe krónh nỹtĩ, ag tỹ ũn to há tỹ ter ja ãn ki ãkrén mág ag tỹ tĩ. Hã re mũn ã tỹ fe krónh mág nĩnh mũ, ã tỹ ũn to há tỹ ter ja mĩ ãkrén kỹ, kar ã tỹ ti ve kỹ ã vẽnh pétĩ ag ki. Hã re mũn, ã pi kri fi tĩ nén ũ tỹ ã mỹ hãn ri ke ja to. Ha ve ra Tina fi kãme ti. Fi mén ti, Timo, kãnhmar tỹ ter ja nĩ. Fi vỹ ke tĩ: “Inh pi ki kanhró nĩ vã, sỹ ne han ke tĩ. Inh pi fỹ tĩ vỹ. Kejẽn inh mỹ jagy tãvĩ tĩ nĩ, kỹ tỹ kejẽn sỹ hã ren kỹ jẽnger há han ke tũ nĩ nĩ. Inh pi nén ũ tỹ inh mỹ hãn ri ké kri fi tĩ vã.”

Ũn ag tỹ krĩ kufy gy nỹtĩ, ũn ag tỹ jũgjũ kamã nỹtĩ, kar ũn ag tỹ ag jykre ki, ag ke tũ nĩn kỹ ũnꞌũ tỹ nén ũ kórég han ja nĩ. Ivan vỹ ke tĩ: “Ẽg kósin Eric ti tỹ ter ja nĩ, ti tỹ 24 ano ra. Ãn ki ẽg tỹ jũgjũ kamã nỹtĩ sir! Tag tỹ ẽg mỹ e han tĩ vỹ, inh kar inh prũ fi Yolanda ẽg pi jũgjũ kamã ja nỹtĩ vỹ. Ẽg tỹ krĩ kufy gy nỹtĩ vã, ẽg jykre ki, ẽg tỹ ẽg kósin ti ajũna ke mág kenh ke nỹtĩ vã.” Alejandro prũ fi tỹ kaga nĩ mág mỹ, hã ra fi tỹ kar ter mỹ. Hã tugnĩn, Alejandro ti tỹ krĩ kufy gy ja nĩ gé. Ti vỹ ke tĩ: “Inh jykre ve ki, Topẽ tỹ nén ũ jagy ãn mỹ hej ké, isỹ tỹ ũn jykre kórég ja nĩn kỹ. Tag vỹ inh mỹ jagy nĩ, sỹ ge to jykrén kỹ, sỹ nén ũ jagy ãn tỹ inh mỹ hãn ri ké, Topẽ tugnĩn, ke tĩ vã.” Kar Kostas vỹ ke tĩ: “Kejẽn sỹ Sophia fi to jũ nĩ vỹ, fi tỹ ter ja tugnĩn. Kar sir, jykre ãn inh mỹ kórég han tĩ vã. Ki kanhró mỹ inh, fi pi nén ũ han ja nĩ, fi tỹ ter jé.”

Jykre vẽnh mỹ ag. Ũn tỹ vẽsỹrénh tĩ, ti tỹ ũn to há tỹ ter ja tugnĩn, kejẽn ti tỹ jykre vẽnh mỹ ag nĩ. Hã re mũn, ti jykre ki, ti tỹ ũn tỹ ter ja vĩ mẽ tĩ, ke tũ nĩn kỹ ti ve tĩ. Ke tũ nĩn kỹ ti pi nén ũ to jykrén há han tĩ, kar ti tỹ nén ũ ag kã jatun nĩ gé. Tina tỹ to kãmén tĩ: “Kejẽn, sỹ ũn mré vĩ nĩ ra, inh krĩ tỹ kuvar há tỹ nĩ vỹ, sỹ nén ũꞌũ to jykrén tĩ vã! Sỹ krĩ kufy nĩ vã, sỹ nén kar tỹ inh mỹ hãn ri ke ja mĩ ãkrén tĩ vã, Timo tỹ ter kỹ. Inh pi nén ũ to jykrén há han kỹ, tag tỹ inh mỹ jagy tãvĩ nĩ vã.”

Ũn ag tỹ pir mỹ nỹtĩ sór tĩ. Ũn tỹ vẽsỹrénh tĩ, ti tỹ ũn to há tỹ ter ja tugnĩn, ti tỹ ũn ag mré nĩn kỹ, hã re mũn, ti tỹ jũ kamã nĩ, kar ti pi ũn ag mré nĩ sór tĩ. Tag to, Kostas tỹ ke tĩ: “Isỹ inh mré ke prũgprũg ag mré nĩn kỹ, inh mỹ jagy nĩ vã. Hã ra inh mỹ jagy ja nĩ gé, isỹ inh mré ke tỹ pir mỹ nỹtĩ ag mré nĩn kỹ.” Ivan prũ fi, Yolanda, mĩ ãkrén tĩ: “Inh mỹ jagy tãvĩ tỹ tĩ nĩ vã, sỹ ũn ag mré nĩn kỹ, ag tỹ inh mỹ ag vẽsỹrénh to vãmén tĩ vã. Sỹ to ãkrén tĩ vã: ‘Inh vẽsỹrénh tỹ mág tãvĩ nĩ, kãfór tãvĩ tỹ nĩ, inh jykre ki.’ Inh mỹ jagy ja nĩ gé, mỹnh fag tỹ inh mỹ ken kỹ, fag krẽ tỹ nén ũ há han kỹ. Jérĩn mỹ isỹ fag to mỹ sér tĩ, hã ra sỹ ãn jẽmẽg kỹ tỹ inh mỹ jagy tĩ nĩ vã. Ẽg pi vẽnh vĩ ãn mẽ sór nĩ vã.”

Ũn ag tỹ corpo kaga nỹtĩ. Ũn ag tỹ vẽjẽn ko mág tĩ, jo ũn ag tỹ sĩn kỹ vẽjẽn ko tĩ. Ũn ag tỹ mág kamã nỹtĩ nĩ, jo ũn ag tỹ kyjo kamã nỹtĩ nĩ. Ũn ag tỹ nũgnũr vãnh nỹtĩ, jo ũnꞌũ ag tỹ nũgnũr kamã  nỹtĩ. Aaron tỹ nén ũ tỹ ti mỹ hãn ri ke ja ãn to kãmén tĩ, prỹg ve ki, ti panh tỹ ter kar: “Inh mỹ jagy nĩ vã, sỹ nũr jé. Kuty kar mĩ sỹ rĩr nĩ vã, inh panh ter ja to jykrén tĩ vã, óra ãn ki.”

Alejandro tỹ ti corpo ki nén ũ vẽnh mỹ mẽg tĩ vã. Ti vỹ ke tĩ: “Ãn ki, médico tỹ inh ve kỹ, ti vỹ inh mỹ ke tĩ vã: ‘Ã pi kaga nĩ.’ Kỹ sỹ ãn to ãkrén ja nĩ: ‘Tag mẽg nĩ sỹ nĩ, inh prũ fi tỹ ter ja tugnĩn’, ke sỹ tĩ.” Ti tỹ ti corpo ki nén ũ vẽnh mỹ mẽg tĩ ãn, kejẽn ti tỹ tũꞌ ke mỹ. Ge ra, Alejandro tỹ ki hã han mỹ, ti tỹ médico ra vyr ja tugnĩn. Ũn tỹ vẽsỹrénh tĩ, ti tỹ ũn to há tỹ ter ja tugnĩn, hãn ri ke mũn tag tỹ ti corpo tỹ krónh ke tĩ, ke tũ nĩn kỹ ti tỹ kaga nĩnh mũ.

Ũn ag mỹ jagy nĩ, ag tỹ nén han ke nỹtĩ ãn han jé. Ivan vỹ ke tĩ: “Eric tỹ ter kar, ẽg tỹ ũn e ag mỹ tugtó ke nỹtĩ vã, tag to, ẽg kanhkã ag mỹ, ti patrão mỹ. Kar ẽg tỹ documento e ag ki ránrán ke nỹtĩ vã. Ẽg tỹ Eric ti tỹ nén ũ ki rĩr ke nỹtĩ vã. Ẽg tỹ vãsãnsãn mág ke nỹtĩ vã, ẽg tỹ tag han jé. Hã ra, tag vỹ ẽg mỹ jagy nĩ vã, ẽg tỹ vẽsỹrinhrénh mág ja nỹtĩ tugnĩn, ẽg corpo ki, kar ẽg jykre ki, kar ẽg fe ki.”

Ũn ag tỹ to ãkrén tĩ, nén ũ jagy mág tỹ kar kãtĩg tĩ. Tag tỹ ag mỹ jagy tĩ, ag tỹ hyn han jé, nén ũ tag tỹ tỹ ũn tỹ ter ja ãn tỹ hyn han fã nĩ vỹ. Tag tỹ hãn ri ké Tina fi mỹ. Fi vỹ ke tĩ: “Timo hã vỹ tỹ banco ra tĩg tĩ vã, kar ti hã vỹ tỹ ẽg jãnkamy ki rĩr tĩ vã. Ũri inh hã tỹ nén ũ kar tag tỹ rĩr tĩ, hã kỹ sỹ krĩ kufy gy nĩ. Sỹ vẽnh ki jẽmẽg tĩ vã: ‘Inh mỹ nén ũ ãn ki rĩr há han ke mũ hãn?’”

Ũn tỹ vẽsỹrénh tĩ, ti tỹ ũn to há tỹ ter ja tugnĩn, hãn ri ke mũn, ag tỹ krĩ kufy gy nỹtĩ, nén ũ jagy tag tugnĩn. Hã ra ti tỹ ki kanhró nĩn kỹ, nén ũ jagy ãn ũn ag mỹ hãn ri ke tĩ gé, tag vỹ ti ajũna ke tĩ, ti tỹ nén ũ ãn vẽnh pãtá rãg há han jé. Hã ra ũn ag pi nén ũ jagy ãn kar kato tẽgtẽ tĩ. Ũn ag tỹ ag tỹ ũn to há tỹ ter kỹ ag tỹ jatun nỹtĩgtĩ ag tỹ ki kanhró nỹtĩn kỹ, ag tỹ nén ũ mẽg nỹtĩ ãn ti, ũn ag tỹ ag ri ke mẽg tĩ gé.

Nén ũ tỹ ne ã mỹ hãn ri kenh mũ: Ã pi kurã kar mĩ vẽsỹrénh mág ke mũ. Hã ra tỹ kejẽn ã mỹ jagy tĩ, kar ã pi ã tỹ ũn to há tỹ ter ja ãn kã jatun ke mũ. Hã ra komẽr ã tỹ vẽsỹrénh tĩ tag tỹ kónẽg kenh. Hã re mũn tỹ ã mỹ jagy kenh mãn, ã tỹ ũn tỹ ter ja ãn to ãkrén kỹ, ãjag régre tỹ jagnẽ mré nén ũ há han ja ti. Ge ra, tempo ãn tỹ tĩg kar, ũn e ag tỹ vẽnh mỹ há mãn nỹtĩ, kar ag tỹ nén han ke nỹtĩ ãn há han mãn tĩ. Tag tỹ hãn ri ke tĩ, ag família kar ag amigo ag tỹ ag ajũna ken kỹ. Kar ũn tỹ vẽsỹrénh tĩ, ti tỹ ũn to há tỹ ter ja tugnĩn, ag tỹ nén ũ hyn han kỹ, ag tỹ mỹ há nỹtĩ jé.

Hã re kã isỹ vẽsỹrénh tĩ tag ti tũꞌ kenh? Ũn ag tỹ há sĩ nỹtĩ, kysẽ pipir ag kar. Hã ra ũn e ag tỹ mỹ há mãn nỹtĩ, prỹg pir ke kar, ke tũ nĩn kỹ prỹg régre ke kar. Hã ra ũnꞌũ ag tỹ mỹ há mãn nỹtĩ, tempo mág ke kar. a Alejandro vỹ ke tĩ: “Sỹ vẽsỹrénh mág ja nĩ, prỹg tẽgtũ ag kãmĩ.”

Krĩ kusa nĩm nĩ, fũrũn tãvĩ tũ nĩ. Mĩ ãkrén nĩ, ã vẽsỹrénh ãn pi hã ki tĩ ke mũ, kurã kar ki. Mỹ nén ũ nĩ hãn ã tỹ han jé, ã tỹ vẽsỹrénh mág tũ nĩ jé?