Ẽg tỹ ũn to ti jykre há ag ki kanhró nĩn kỹ, tag vỹ ẽg ajũna ke tĩ, ẽg tỹ ti mré há nỹtĩ jé. Tag hã ri ke, ẽg tỹ Jeová ti nén há e ki há nĩ ki kanhró há han kỹ, tag vỹ ẽg ajũna ke tĩ, ẽg tỹ ti mré há nỹtĩ jé. Topẽ tỹ nén ũ há e ki há nĩ, hã ra nén ũ ag tỹ vẽnh kãgra tỹ nén ãn kãfór nĩ: ti tar, ti tỹ kanhró mág nĩ, ti tỹ jykre há nĩ kar ti to há mũ ti.

‘Ó Jeová, inh Topẽ, ã tar nĩn kỹ, ã tỹ nén kar han kanhró nĩn kỹ ã tóg ga ti han, kanhkã mré hã.’— JEREMIAS 32:17.

Topẽ tỹ nén kar hyn han ja ti vỹ ẽg mỹ ven tĩ, Topẽ tỹ tar tãvĩ nĩ. Ha to ãkrén nĩ, verão ki, ã tỹ ã ĩn re tá nĩ nĩn kỹ, tá fẽnja tũ nĩ, rã gy tãvĩ nĩ, kera? Rã ti tỹ ã mỹ ven tĩ, Jeová tỹ tar tãvĩ nĩ. Hã ren kỹ sir? Rã ti kuju ki, temperatura tỹ tỹ 15 milhão ag rã hã graus Celsius ki. Minuto kar ki, rã tỹ tar tãvĩ han tĩ, bomba nuclear explosão 100 milhão ag kãfór ri ke nĩ.

Hã ra, universo ki, ẽg rã tỹ sĩ nĩ. Krĩg ũ ag vỹ ti mág kãfór nỹtĩ. Ha vé, krĩg tỹ UY Scuti mág tãvĩ ti nĩ. Cientista ag vỹ ãkrén tĩ, krĩg tỹ UY Scuti ti diâmetro tỹ ẽg rã ti diâmetro 1.700 mág kãfór nĩ. Tag vỹ ẽg ajũna ke tĩ, ẽg tỹ Jeremias tỹ nén tó ja ki kanhrãn há han jé: ‘Jeová tóg ti tar tỹ, ga ti kar kanhkã ti hyn han mũ.’

Topẽ tar ti hã ren kỹ ẽg mỹ há han tĩ? Topẽ tỹ nén kar hyn han ja ti, rã kar nén ũꞌũ ag vỹ ẽg ajũna ke tĩ, ẽg tỹ rĩnrĩr nỹtĩ jé. Kar sir, Topẽ tỹ ti tar usa ke tĩ, ti tỹ vẽnh kar ajũna ke jé. Ti hã ri ken kỹ ge han  tĩ? Jesus tỹ Ga kri tĩ nĩn kã, Topẽ tỹ ti kuprĩg nĩm ja, ti tỹ milagre ag hyn han jé. Bíblia vỹ ke tĩ: “ũn kyvó ag vỹ, isugrĩn ẽvãnh há nỹtĩ. Ũn kãnhgrĩ ag vỹ mũ há nỹtĩ, ũ tỹ vẽnh kaga kren vãnh han mũ ẽn ag krenkren han inh tĩ. Ũn kutu ag vỹ ẽmẽ há nỹtĩ ha, ũn kãgter mũ ag vỹ rĩnrĩr mãn kỹ nỹtĩ.” (Mateus 11:5) Hã ra Topẽ ne ẽg mỹ han tĩ, ũri? Ti tỹ “ũn ron ja tar han mãn” tĩ. Bíblia vỹ ke tĩ gé, Jeová tỹ ‘ũ tỹ ti to há nỹtĩ ag tóg tar nỹtĩ mãn’ han tĩ. (Isaías 40:29, 31) Kar sir, “ũn tỹ ẽg tar han mũ vỹ tỹ Topẽ ti nĩ”, ẽg tỹ nén ũ jagy ag vẽnh pãtá rãg há han jé. (2 Corinto 4:7) Topẽ tỹ ti tar ẽg mỹ nĩm, ti tỹ ẽg ajũna ke jé. Ã hã mỹ, ã tỹ ti mré há nĩn kỹ, tag tỹ tỹ há tãvĩ nĩ, kera?

‘Jeová, nén kar han ã, kỹ tóg sĩnvĩ nỹtĩ, ã tỹ nén han kar.’— SALMO 104:24.

Ẽg tỹ Jeová tỹ nén hyn han ja ag to kanhrãnrãn kỹ, tag vỹ ẽg mỹ ven tĩ, Jeová tỹ tỹ kanhró mág nĩ. Ciência tỹ biomimética ki, cientista ag vỹ Jeová tỹ nén kar hyn han ja ag to kanhrãnrãn tĩ, ag tỹ nén ãn kãgran jé, ag tỹ nén ũ ag hyn han kỹ, zíper kar avião ri ke nĩ.

Nén ũ há tãvĩ nĩ tỹ ẽg mỹ ven tĩ, Jeová tỹ tỹ kanhró mág nĩ vỹ ẽg corpo nĩ. Ha to ãkrén nĩ, ũn sĩ tỹ fi mỹnh nug kã kã nĩ kã, kar ti tỹ mog nĩn kỹ to. Começo ki, mỹnh nug kã kã nĩ, célula ũn pir tãvĩn vỹ nĩ. Ti kã ki, DNA vỹ nĩ. Tag pãte, célula ãn vỹ vẽnh kãpãm tĩ, célula ũꞌũ ag ki. Kar kỹ, ag tỹ vẽsỹ célula ag tỹ ũꞌ nỹtĩ han tĩ, ag tỹ kyvénh, kugjej, kuka kar nén ũꞌũ hyn han jé. Kãnhmar, kavó ag vỹ mogmog tĩ kar ag tỹ rãnhrãj hyn han nĩ gé. Kysé tỹ 9 kar, célula ũn pir ãn tỹ vẽsỹ ũn sĩ han tĩ. Tag tugnĩn, ũn e ag tỹ tugtó tĩ, ũn tỹ Bíblia rán ja ri ke: “Inh han ã mỹr . . . Ã mỹ sóg vĩ há han.”— Salmo 139:14.

Topẽ tỹ kanhró mág nĩ tag hã ren kỹ ẽg mỹ há han tĩ? Ũ tỹ ẽg hyn han fã ti vỹ ki kanhrãn tĩ, ẽg ne han ke nỹtĩ ti, ẽg tỹ mỹ sigsér nỹtĩ jé. Bíblia kã ki, ti tỹ ẽg jyvẽn tĩ. Bíblia tỹ ẽg mỹ ke tĩ: “Jagnẽ mỹ vẽnh pãte fón nĩ.” (Colossos 3:13) Vẽnh jyvẽn tag mỹ ẽg mỹ há han nĩ hãn? Háv! Médico e ag vỹ ke tĩ, ẽg tỹ jagnẽ vẽnh pãte fón kỹ, tag vỹ ẽg saúde mỹ há han tĩ, ẽg tỹ nũrnũr há han ke mũ, ẽg pi pressão alta nỹtĩnh mũ, ke tũ nĩn kỹ, depressão nỹtĩnh mũ gé kar nén ũꞌũ há ag tỹ ẽg ki hãn ri kenh mũ. Topẽ tỹ tỹ ũn amigo kanhró mág ri ke nĩ, ti tỹ ẽg kar to kanẽ jur tĩ kar ti tỹ ẽg mỹ vẽnh jyvẽn há ag vin tĩ. (2 Timóteo 3:16, 17) Ã mỹ Topẽ mré há nĩ sór tĩ?

‘Jeová tóg nén há kar to há nĩgtĩ.’— SALMO 37:28.

Topẽ tỹ nén há kar hyn han tĩ. Bíblia vỹ ke tĩ: “Topẽ ti, ũ tỹ ti tỹ nén han sór mũ han tĩ ti vỹ nén ũ kórég han tũ nĩgtĩ, kỹ tóg ẽg mỹ vẽjykre kórég han vãnh nĩgtĩ.” (Jó 34:10, 12) Jeová tỹ ũn ag jykre tugnỹgnỹm nĩn kỹ, ti tỹ tỹ ũn jykre há nĩ. Ũn tỹ Topẽ Vĩ Rá rán ja vỹ ke tĩ: “Vẽnh kar ag jé ã jykre kuryj to mỹ sér nỹtĩ.” (Salmo 67:4) Jeová tỹ “ag jykre (fe) hã tugnỹm tĩ.” Kỹ ũn ag tỹ tỹ jykre régre nỹtĩn kỹ, Jeová tỹ tag ve tĩ. (1 Samuel 16:7) Hã kỹ, ga kri, ũn ag tỹ nén kórég ag hyn han tĩn kỹ, Topẽ  tỹ tag vég tĩ, kar ti tỹ ẽg mỹ ke tĩ: “Topẽ tóg ũn jykre kórég ag kãgtén ke mũ . . . ẽg tỹ ẽg jakré krẽgnũnh ri ke.”— Provérbios 2:22.

Hã ra, Jeová pi juiz jũ ri ke nĩ. Ti tỹ ẽg vẽnh pãte fón tĩ. Bíblia vỹ ẽg mỹ kãmén tĩ, Jeová vỹ “há nĩ, ẽg jagãgtãn ti tĩ.” Ũn tỹ nén ũ kórég han tĩ, hã ra ti tỹ ti jykre kórég ãn tovãnh tĩ, kỹ Jeová tỹ ti vẽnh pãte fón tĩ. Topẽ tỹ tỹ ũn jykre há tãvĩ nĩ, kera?— Salmo 103:8; 2 Pedro 3:9.

Topẽ tỹ tỹ ũn jykre há nĩ, tag hã ren kỹ ẽg mỹ há han tĩ? Apóstolo tỹ Pedro vỹ tó ja: “Topẽ mỹ nén ũ tũ vẽ, Judeu he mũ ẽn ag, fóg he mũ ẽn ag ke gé, kanhgág ag ke gé, Judeu jykre han tũ kar ag. Ũ tỹ ti kamẽg mũ hã vỹ ti mỹ há nỹtĩ, ũ tỹ vẽjykre kuryj han mũ ag kar, povo kar kã mĩ. Povo tỹ Israel ag mỹ tóg ti vĩ ẽn jẽnẽ ja nĩ. Ẽg mỹ tóg tó, ẽg tỹ jatu nỹtĩ jé, ti tỹ Jesus Cristo tugrĩn ẽg to há nĩn kỹ. Jesus ẽn vỹ tỹ vẽnh kar Senhor nĩ.” (Han kãme 10:34-36) Tag tỹ ẽg mỹ ven tĩ, Topẽ vẽnh kar to há tĩ. Kỹ ũn tỹ tỹ fóg nĩn kỹ, ũn tỹ tỹ kanhgág nĩn kỹ, ũn tỹ tỹ riko nĩn kỹ, ke tu nĩn kỹ ũn tỹ jãnkamy sĩ nĩn kỹ, ẽg kar tỹ Jeová mỹ rãnhrãj sór nỹtĩn kỹ, ẽg tỹ ti mré há nỹtĩnh mũ.

Topẽ tỹ ẽg tỹ ti jykre há ki kanhrãn há han ve sór tĩ, kar tag vỹ ẽg mỹ há han tĩ gé. Jeová tỹ ẽg hyn han kỹ, ‘ti tỹ nén tó ja ẽn vỹ ẽg kã kã nĩ.’ Bíblia vỹ ke tĩ, ẽg jykre tỹ lei ri ke nĩ, ẽg krĩ kã ki. ‘Hã kỹ tóg ẽg mỹ sér tĩ, ẽg tỹ nén ũ há han kỹ. Jãvo tóg ẽg mỹ e tĩ, ẽg tỹ ti kórég han kỹ.’ (Roma 2:15) Tag hã ren kỹ ẽg mỹ há han tĩ? Ẽg tỹ ẽg jykre ki han tĩn kỹ, ẽg pi nén ũ kórég ag hyn han ke tĩ. Kar sir, ẽg tỹ kygnẽ han nỹtĩn kỹ, ẽg jykre vỹ ẽg ajũna ke tĩ, ẽg tỹ vẽjykre kórég tovãnh jé. Ẽg tỹ Jeová tỹ tỹ jykre há nĩ ki kanhrãn kỹ, tag vỹ ẽg ajũna ke tĩ, ẽg tỹ Topẽ mré há nỹtĩ jé!

“Topẽ jykre vẽ, hã vỹ: ẽg to há, he mũ.”— 1 JOÃO 4:8.

Bíblia vỹ ẽg mỹ ke tĩ, Topẽ tỹ tar tãvĩ nĩ, ti tỹ tỹ ki kanhró mág nĩ kar ti tỹ tỹ ũn jykre há nĩ. Hã ra ti  tỹ ẽg mỹ ke tĩ gé, Topẽ jykre vẽ: ẽg to há. Hã ren kỹ sir? Topẽ tỹ nén kar hyn han tĩ, ti tỹ tỹ tar tãvĩ nĩ kar ti tỹ tỹ ki kanhró mág tugnĩn. Kar sir, ti tỹ nén kar há hyn han tĩ, ti tỹ tỹ ũn jykre há tugnĩn. Hã ra, ti tỹ nén kar ãn hyn han tĩ, ti tỹ ẽg to há tãvĩ tugnĩn. Topẽ jykre ki, ti to há mũ ti vỹ tỹ nén há kãfór nĩ. Jeová tỹ vẽnh kar to há tãvĩ tugrĩn, ti tỹ nén kar hyn han tĩ. Ha vé.

Jeová tóg ẽprã ke ag kar anjo ag hyn han mũ, ti tỹ ag ki rĩr jé, ti to há mũ ti tugnĩn. Ti tỹ ag hyn han tũ ke, ti tỹ pir mỹ nĩ vã, hã ra ti pi fe krój nĩ. Jeová tỹ ti to há tãvĩ tugnĩn, Ga há han mũ, ẽprã ke ag vỹ ãn ki ẽmãnmãn nỹtĩ jé. Kar sir Topẽ “hã ne tóg rã hanꞌ, ti tỹ vẽnh kar kri jẽngrẽg kỹ san jé, ũn jykre kuryj ag kri, ũn jykre pãno ag kri ke gé, fag kri ke gé. Ta han ti ke gé, ti tỹ vẽnh kar há han jé, ũn jykre kuryj ag, ũn jykre pãno ag ke gé, fag ke gé. Ver tóg vẽnh kar to há nĩ, Topẽ ti.”— Mateus 5:45.

Jo Jeová tóg ‘ẽg jagãgtãn mũ, ti tỹ ẽg jagtar nỹtĩ ven kỹ. Kỹ tóg sir ẽg jagãgtãn tovãnh tũ nĩgtĩ.’ (Tiago 5:11) Jeová tỹ ũn tỹ ti mré há sór tĩ ag ki rĩr há han tĩ. Kar ti tỹ vẽnh kar to kanẽ jur tĩ. Kỹ, ‘ti hã vỹ ã ki rĩr nĩgtĩ.’— 1 Pedro 5:7.

Topẽ tỹ ẽg to há nĩ, tag hã ren kỹ ẽg mỹ há han tĩ? Ha to ãkrén nĩ, rã tỹ pun ke nĩn kỹ, ũn sĩ tỹ vẽnh nyg nĩn kỹ, ke tũ nĩn kỹ ã família tỹ jagnẽ to há nỹtĩn kỹ, nén ũ tag ag tỹ tỹ há tãvĩ nĩ, kera? Ẽg pi nén ãn ag nỹtĩ ke nỹtĩ, ẽg tỹ rĩnrĩr nỹtĩ jé, hã ra ag vỹ ẽg mỹ sigsér han tĩ.

Topẽ tỹ ti to há mũ ti ẽg mỹ ven tĩ gé, ẽg tỹ ti mré vĩn kỹ. Bíblia vỹ ke tĩ: “Krĩ kufy nỹtĩ tũg nĩ. Nén kar tóm nĩ, Topẽ mỹ, ti mré vĩn kỹ. Kỹ ti mỹ nén kar to vĩm nĩ gé, ãjag tỹ nén ve sór mũ kar to. Kỹ ti mỹ nén kar to: ‘há ti nĩ,’ hem nĩ gé, ãjag tỹ ti mỹ agradecer hen kỹ.” Jeová vỹ panh fe há ri ke nĩ. Ẽg tỹ krĩ kufy nỹtĩn kỹ, ti tỹ ẽg tỹ ti mré vĩ tĩ ve sór tĩ. Ẽg tỹ ge han kỹ, ti tỹ ẽg krĩ tỹ kuprãꞌ henh ke mũ. “Ẽg tỹ nén kar to jykrén há ra ẽg tóg vẽsóg ki ẽg krĩ kuprãg ki kagtĩg nỹtĩ.”— Filipos 4:6, 7.

Ẽg tóg ã mỹ kãmén mũ, Topẽ tar ti to, Topẽ tỹ ki kanhró mág nĩ to, Topẽ tỹ tỹ ũn jykre há nĩ to kar Topẽ tỹ ẽg to há nĩ to. Jo ẽg tỹ nén ũ ãn ag tỹ ã ajũna ke tĩ ve sór tĩ, ã tỹ Topẽ ki kanhró mág nĩ jé. Ã tỹ ki kanhrãn kỹ, Topẽ ne hyn han ja ti kar Topẽ ne hyn han ke mũ ti, tag vỹ ã ajũna ke tĩ gé, ã tỹ Topẽ ki kanhrãn há han jé.