à tỹ ũn ki kanhrãn há han sór nĩn kỹ, ã tỹ ti tỹ nén hyn han ja ag to kanhrãn tĩ. Tag hã ri ke, ã tỹ Topẽ ki kanhrãn há han sór nĩn kỹ, ã tỹ ti tỹ nén hyn han ja ag to kanhrãn ke nĩ. Topẽ tỹ nén hyn han ja, ti tỹ ã ajũna ke jé, kar ã tỹ rĩr krỹg ja tũ ve jé. à tỹ tag to kanhrãn kỹ, tag tỹ ã mỹ há han ke mũ.

Jeová tỹ tỹ nén kar hyn han fã nĩ, kar ti “tóg nén ũ kar han, ẽg tỹ nén vég mũ kar. Ẽn vigve kỹ ẽg tóg ti jykre mág nĩ ẽn ki kanhró nĩ sir.” (Roma 1:20) “Ti tar nĩn kỹ ẽg Senhor Topẽ vỹ kanhkã mré ga han; ti ki kanhró mág nĩn kỹ tóg ga kar ti han.” (Jeremias 10:12) Topẽ tỹ nén hyn han ja ag vỹ Topẽ nén ũ e ki há nĩ ẽg mỹ ven tĩ, kar sir ag vỹ Topẽ tỹ vẽnh kar to kanẽ jur tĩ ẽg mỹ ven tĩ gé.

Ha vé, Jeová tỹ ẽg hyn han ja, ‘ti ri kén’. (Gênesis 1:27) Kỹ, ẽg tỹ ti nén ũ há ag kar ti jykre kãgran sór tĩ. Ẽg tỹ vãsãnsãn kỹ, Jeová vĩ jẽmẽ há han jé, ẽg tỹ mỹ sigsér nỹtĩ. Kar sir, Topẽ tỹ ẽg hyn han ja, ẽg tỹ ti mré há nỹtĩ jé.

Ẽg tỹ Ga kar mĩ tugnỹgnỹm kỹ, ki kanhró ẽg tỹ nỹtĩ, Jeová tỹ ẽg to há nĩ. Apóstolo tỹ Paulo vỹ ke tĩ, Topẽ to: “Ge ra tóg ag ki rĩr há han mũ, Topẽ ti, ag tỹ tag to vãhã ti ki kanhrãn jé. Hã jé tóg ta jẽnẽ, kỹ ãjag jakré tóg mogmog mũ. Kỹ ãjag tóg konh ke mũ. Kỹ ãjag fe tóg háꞌ he mũ sir. Ãjag mỹ tóg sér tĩ sir, ti tỹ ãjag mỹ vẽjẽn han kỹ, Topẽ ti.” (Han kãme 14:17) Topẽ tóg nén ũ há e ẽg mỹ vin mũ, ẽg tỹ rĩnrĩr nỹtĩ jé. Ti tỹ nén ũ há e hyn han ja, ẽg tỹ mỹ sigsér nỹtĩ jé gé. Nén ũ ãn tỹ ẽg mỹ ven tĩ, ti tỹ ẽg tỹ mỹ há nỹtĩ ve sór tĩ.

Jeová tóg Ga han mũ, ẽprã ke ag vỹ, ãn ki, ẽmãnmãn hã ki nỹtĩ jé. Bíblia vỹ ke tĩ, Topẽ “tóg ga ti ẽg mỹ nĩm”; “Ti tỹ ga han kar kỹ tóg ti kuprã nĩ ve sór ja tũ nĩ, hã kỹ tóg ũ tỹ kri mũ hyn han gé.”  (Salmo 115:16; Isaías 45:18) Hã ra ũ nỹ Ga kri nỹtĩnh mũ, kar prỹg tỹ hã re ki? Bíblia tỹ tag to ẽg mỹ kãmén tĩ: “Ũn jykre há ag tóg Topẽ tỹ ag mỹ ga há ven ke ẽn hã ki ẽmãnmãn ke mũ, jatun mỹ ag tóg tá mũnh ke mũ.”— Salmo 37:29.

Jeová tỹ ti jykre Ga to kar ẽprã ke ag to han mũ, ti tỹ ũn minmén ve han mũ kã, Adão kar Eva fi, kỹ Topẽ tóg “ũn ve ti fẽg, ti tỹ Éden ki rĩr jé, ti tỹ tá nén kar krãn jé.” (Gênesis 2:8, 15) Topẽ tỹ fag mỹ tó ja, fag tỹ nén ũ há han jé: “Krẽm e tãvĩ han nĩ, ga kar mĩ mũm nĩ, tỹ ãjag ga tãn nĩ.” (Gênesis 1:28) Adão kar Eva fi tỹ rĩnrĩr krỹg ja tũ ke mũ vã. Hã ra, fag tóg kuprãg mũ, fag tỹ Topẽ vĩ jãmã há han tũ nỹtĩ jé. Tag tugnĩn, ag pi tỹ ‘ũn jykre há’ nỹtĩ, ag tỹ ‘ga kri emãnmãn’ hã ki mũ jé. Jãvo vãsỹ Jeová tỹ nén to jykrén ja ãn ri ke nĩ ver, Adão kar Eva fag tỹ Jeová vĩ mranh ja ra. Kar kỹ ẽg tỹ tag to kanhrãnrãn ke vẽ, hã ra mũ nỹ Topẽ tỹ ẽg mỹ nén ũꞌũ han ja ti to kanhrãnrãn jé.

Ũn e ag tỹ Bíblia to “Topẽ vĩ”, ke tĩ. Jeová ne tugnĩn Bíblia ẽg mỹ nĩm ja? Ti tỹ ẽg tỹ ti to kanhrãn há han ve sór tĩ. (Provérbios 2:1-5) Bíblia pi vẽnh ki jãmã kar ag Topẽ to ẽg mỹ kãmén tĩ, livro ũꞌũ pi tag han tĩ gé. (Eclesiastes 3:11) Hã ra, Bíblia tỹ nén tó ja ag vỹ ẽg ajũna ke tĩ, ẽg tỹ Topẽ ki kanhró há han jé. Bíblia kã ki, ẽg tỹ le ke tĩ, Topẽ hã ren kỹ ũn ag ki rĩr tĩ to, Topẽ tỹ ũn ag tỹ ne tó há tĩ to. (Salmo 15:1-5) Topẽ vĩ tỹ ẽg mỹ ke tĩ gé, Topẽ ne adoração ag to jykrén ti to, nén ũ ag tỹ ti mỹ há han tĩ, kar nén ũ ag tỹ ti mỹ kórég han tĩ to, jãnkamy to kar nén ũꞌũ ag to. Kar sir, ti tỹ ẽg mỹ kãmén tĩ Topẽ kósin to, Jesus ti, ti tỹ nén tó ja ag to, ti tỹ nén hyn han ja ag to. Bíblia vỹ ẽg ajũna ke tĩ, ẽg tỹ Jeová ti nén ũ e ki há nĩ ki kanhrãn há han jé. — João 14:9.

Jeová tỹ ẽg mỹ Bíblia nĩm ja, ẽg tỹ mỹ sigsér nỹtĩ jé. Bíblia kã ki, Jeová tỹ ẽg mỹ kãmén tĩ, ẽg ne han ke nỹtĩ ti, ẽg família tỹ mỹ sigsér nỹtĩ jé, ẽg nén vég mỹ vỹ ẽg mỹ há nĩ jé, kar ẽg pi krĩ kufy jagy nỹtĩ jé. Kar kỹ ẽg tỹ venh mũ, Bíblia tỹ ẽg mỹ nén ũ tag ag to kãmén tĩ: ẽg ne tugnĩn vẽsỹrirénh nỹtĩ? Ne nỹ tỹ hãn ri kenh mũ? Kar ti tỹ ẽg mỹ kãmén tĩ gé, Topẽ tỹ ne hyn han ja ti, ti tỹ ti jykre Ga to kar ẽprã ke ag to han kãn jé.

Mũ nỹ ve jé, nén ũꞌũ ag tỹ ẽg mỹ ven tĩ, Bíblia tỹ tỹ nén ũ há tãvĩ nĩ. Prỹg tỹ 1.600 kãmĩ, ũn tỹ 40 kãfór ag tóg Bíblia ránrán mũ. Ge ra ti vẽnh kãpãm ag vỹ vẽnh kygse ja. Tag vỹ hã ri ke, Bíblia tỹ Topẽ tũ nĩn kỹ. Tag vỹ ẽg mỹ ven tĩ, Topẽ hã tóg ti jykre ẽg mỹ ven mũ Bíblia kã ki. (2 Timóteo 3:16) Livro si ag tỹ ũꞌ nĩ, hã ra tag pi Bíblia ki hãn ri ke tĩ, manuscrito si ag tỹ tag ẽg mỹ ven tĩ. Kar sir ũn ag tóg vãsãnsãn mũ, ag tỹ tradução kutãm jé. Ag pi ũn tỹ Bíblia nĩ kar ti le ke tĩ ve sór tĩ vã. Ge ra ũn e ag vỹ Bíblia nỹtĩ ag vĩ ki ke pẽ ki. Kỹ ti vỹ livro kar kãfór tag vỹ ẽg mỹ ven, “Topẽ [vĩ, TNM] tóg tũgꞌ henh ke tũ pẽ nĩ.”— Isaías 40:8.

Topẽ tỹ nén hyn han ja, ti tỹ ti jykre ẽprã ke ag to han kãn jé. Topẽ tỹ ẽprã ke ag tỹ rĩnrĩr krỹg ja tũ ve sór tĩ, ẽg tỹ tag to kanhrãn huri. Hã ra Adão tỹ Topẽ vĩ mranh kỹ nĩ, ti kar ti nón ke ag vỹ kãgter mũ, ag pi rĩnrĩr krỹg ja tũ venh ke mũ vã. Bíblia vỹ ke tĩ: “ũn pir vỹ Topẽ vĩ mranh vén. Kỹ Topẽ vĩ mranh vỹ kã nĩ nĩ sir. Ti vĩ mranh tugrĩn tóg ter ja nĩ gé. Ũ tỹ ti vĩ mranh vén ja ẽn ri ke ẽg nỹtĩ. Topẽ vĩ mranh kãn ja ẽg tóg nĩ gé. Kỹ ẽg tóg kãgter kãn ke mũ gé, Topẽ vĩ mranh kỹ.” (Roma 5:12) Adão tóg Topẽ vĩ mranh mũ kã, Topẽ mỹ ti jykre tovãnh ke hãn, ẽprã ke ag kar Ga to? Ti ne han ke?

Jeová tỹ tỹ ũn jykre há nĩ, tag tugnĩn ti tỹ Adão kar Eva fi mỹ ke ja, fag tóg Topẽ vĩ mranh han mũ. Jeová tỹ ti to há tãvĩ tugnĩn, ti tóg nén ũ han mũ, ti tỹ Adão ti nón ke ag ajũna ke jé. Ti tỹ ki kanhró mág nĩ, kỹ ti tóg kuprãg mũ, ti ne han ke mũ ti, ti tỹ nén ũ jagy ãn vẽnh pãtá rãg há han jé, kar ti tỹ to fũrũn tag tó ja. (Gênesis 3:15) Topẽ tỹ ẽprã ke ag krenkren han mũ vã, ti kósin ter ja ti tugnĩn, Jesus Cristo ti. Ti hã ren kỹ tag han ke mũ vã?

 Adão kygnẽ ti tugrĩn ẽprã ke ag vỹ Topẽ vĩ mranh nỹtĩ, ẽg mỹ krenkren han jé, Jeová tóg Jesus jẽnẽ mũ Ga ra. Ga kri Jesus tóg venh kar kanhrãnrãn mũ, fag ne han ke nỹtĩ ti, fag tỹ rĩnrĩr krỹg ja tũ nỹtĩ jé, kar ti tỹ ‘vẽnh kar jagfy ter ke mũ, ti tỹ ag krenkren han jé.’ a (Mateus 20:28; João 14:6) Jesus pi ti ki nén ũ kórég nĩ vã, Adão ri ke. Tag tugnĩn ti tỹ ẽg krenkren han tĩ. Hã ra Jesus tỹ ter ken kỹ, ti tóg Topẽ vĩ jẽmẽ han mũ, ti pi ter ke nĩ vã. Kỹ Topẽ tóg ti rĩr mãn han mũ, kar kỹ ti tóg kanhkã tá vỹn ke mũ. Gen kỹ Jesus tỹ nén ũ há kãfór ẽg mỹ nĩm ja: ẽg tỹ rĩnrĩr krỹg ja tũ venh ke mũ, ti ter ja tugrĩn. Bíblia vỹ ẽg mỹ ke tĩ: “Ũn pir tóg Topẽ vĩ han ja tũ nĩ. Kỹ ẽg kar vỹ Topẽ vĩ mranh tĩ sir, ti nón. Kar kỹ ũn pir vỹ Topẽ vĩ han kãn ja nĩgtĩ. Kỹ Topẽ tóg ti tugrĩn ẽg mỹ vẽnh pãte fón kãn ke mũ gé sir.” (Roma 5:19) Jesus tỹ ẽg jagfy ter ja tugnĩn Jeová tỹ ti vĩ han kãn ke mũ – ẽprã ke ag tỹ rĩnrĩr krỹg ja tũ venh ke mũ, Ga kri.

Ẽg tỹ nén ũ ãn ag to kanhrãnrãn kỹ, ẽg tỹ ki kanhrãn tĩ, Jeová tỹ nén kar han sór tĩ, ti tỹ nén ũ ãn han kãn ke mũ, kỹ ti vĩ tỹ han kãn nĩgtĩ sir. (Isaías 55:11) Ẽg tỹ ki kanhró tĩ gé, Jeová tỹ ẽg to há tãvĩ nĩ. Bíblia vỹ ke tĩ: “Tag to ẽg tóg ki kanhró nỹtĩ, Topẽ tỹ ẽg to há nĩn ki, ha mẽ: ti kósin pir jẽnẽ ja tóg nĩgtĩ, ti tỹ ga kri mur jé, ẽg tỹ ti kósin tugrĩn rĩnrĩr krỹg ja tũ ẽn ve jé. Ẽg pijé ti to há nỹtĩ ja nĩgtĩꞌ. Ti hã ne ẽg to há nĩ vénꞌ. Hã kỹ tóg ti kósin jẽnẽ, ti tỹ ẽg jagfy ter jé, ti tỹ ẽg tỹ ti vĩ mranh tỹ tũꞌ he jé. Ti tỹ ẽg to há nĩn hã vẽ.”— 1 João 4:9, 10.

Topẽ tỹ “ti kósin pir fẽg, ti tỹ ẽg jagfy ter jé. Ti kósin pir nenh ja tũ tóg nĩ. Hã kỹ tóg ẽg mỹ nén ũ há nenh ke tũ pẽ nĩ, ti tỹ ti kósin pir nenh ja tũ nĩn kỹ”. (Roma 8:32) Topẽ ne tó ja, ti tỹ ẽg mỹ han ke mũ? Ha vé vẽnh rá kãtĩg ẽn kã.