Tessalônica tá ke ag mỹ carta ve 2:1-20
2 Inh kanhkãꞌ, inh ve ãjag tóg, isỹ ãjag mré nĩ mũn kã. Isỹ ãjag mỹ Topẽ vĩ tó kỹ ãjag tóg Topẽ ki ge ja nĩ. Tó há han ja sóg nĩ.
2 Ẽmã tỹ Filipos tá ag tóg inh vóg kónãn ja nĩgtĩ. Tá ag tóg iso é he ja nĩgtĩ. Kỹ sóg tá kãkutẽ kỹ ãjag tá jun ja nĩgtĩ. Ge ra sóg ãjag mỹ tó, Topẽ vĩ sér ti. Ãjag kamẽg ja tũ sóg nĩ, Topẽ tỹ isar han kỹ, sỹ inh jagtar jagy ẽn ve ja ra.
3 Sỹ ãjag jyvẽn kỹ sóg ãjag mỹ ki hã tó ja nĩgtĩ. Kygnẽ ja tũ inh nĩ. Nén ũ vẽnhmỹ tó ja tũ sóg nĩgtĩ gé. Ãjag tỹ nén ũ to én ja tũ sóg nĩgtĩ gé.
4 Topẽ hã ne inh jykre ve kỹ inh mỹ: “ha inh vĩ tó,” he ja nĩꞌ. Hã kỹ sóg tó mũ sir. Ẽprã ke ag tỹ iso vĩ há han tũ ra tóg inh mỹ tỹ nén ũ tũ nỹ. Topẽ tỹ iso vĩ há han ke tag hã tóg inh mỹ há nĩꞌ. Hã jé sóg ti vĩ hã ki króm sór mũ. Ti hã ne ẽg jykre ve kỹ ẽg ki kanhró nĩꞌ, Topẽ ti.
5 Hã kỹ sóg ãjag mỹ ón kỹ: “há ãjag tóg nỹtĩ,” he ja tũ nĩgtĩ. Ãjag tỹ nén ũ to én ja tũ sóg nĩgtĩ gé. Ãjag ki sóg gỹj ve sór ja tũ nĩ gé. Topẽ hã ne tag véꞌ.
6 Kỹ ẽprã ke ag tỹ iso vĩ há han tũ ra tóg inh mỹ tỹ nén ũ tũ nỹ mỹr. Ãjag tỹ inh mỹ vĩ há han tũ ra tóg inh mỹ tỹ nén ũ tũ nỹ gé.
7 Cristo hã vỹ inh jẽnẽ ja nĩ. Hã kỹ tóg, sỹ ãjag mỹ vĩ tar han há tĩ vẽ. Hã ra sóg ke ja tũ nĩ. Komẽr hã sóg vĩ ja nĩgtĩ. Ẽg tỹ ẽg krẽ kãsir mré vĩ ri ke han ja sóg nĩgtĩ.
8 Ãjag to sóg há tãvĩ nĩ, hã kỹ sóg ãjag mỹ Topẽ vĩ sér tó kãn sór ja nĩgtĩ. Kỹ tóg inh mỹ tỹ nén ũ tũ nĩ gé, sỹ ãjag jagfy ter ke mũ ti.
9 Inh kanhkãꞌ, inh rãnhrãj to jykrén nĩ. Inh rãnhrãj vỹ inh kutãn tĩ. Kuty ki sóg inh rãnhrãj han tĩ, kurã ki ke gé, isỹ inh jẽn kajãm jé. Hã kỹ sóg ãjag jẽn ko ja tũ nĩgtĩ. Topẽ vĩ hã tó ja sóg nĩ, ãjag kanhrãn kỹ.
10 Isỹ nén han mũ ve kãn ãjag tóg, kỹ Topẽ vỹ inh vég tĩ gé. Topẽ jykre hã han isóg tĩ, vẽjykre kuryj ti. Nén ũ vẽnhmỹ han vãnh sóg nĩgtĩ. Ãjag rĩnve sóg han, ãjag tỹ Jesus ki ge kỹ nỹtĩn kỹ.
11 Gĩr panh vỹ ti kósin jyvẽn tĩ, kỹ tóg kejẽn ti jyvẽn tar han tĩ gé. Kỹ tóg kejẽn vĩ há han tĩ gé, ti fỹn kỹ. Ti ri ke han ja sóg nĩ mỹr, ãjag mỹ.
12 Hã kỹ sóg ãjag fe tar han. Ãjag jyvẽn ja sóg nĩgtĩ, kỹ sóg ãjag jyvẽn tar han ja nĩgtĩ gé kejẽn, ãjag tỹ Topẽ jykre ki króm jé. Ti hã ne ãjag kuprẽgꞌ, ãjag tỹ ti tỹ tỹ ẽg pãꞌi nĩ ve jé, ãjag tỹ ti jykre mág ve jé, ti jykre tỹ ẽg kãfór nĩ ẽn ti.
13 Ãjag tỹ Topẽ vĩ mẽ kỹ ãjag tóg to: “he,” he ja nĩgtĩ. Ãjag mỹ sóg tó, kỹ tóg ãjag mỹ há ja nĩgtĩ. Tag to sóg Topẽ mỹ: “ã hã ne tóg ag krĩnꞌ. Kỹ tóg inh mỹ sér tĩ,” he tĩ. Kurã kar ki sóg ti mỹ tó tĩ. Hã kỹ tóg ãjag jykre kugrynh mũ sir, Topẽ vĩ ti, ãjag tỹ ti vĩ kri fin kỹ.
14 Inh kanhkãꞌ, ga tỹ Judéia tá ke ag tóg vẽnh mãn tĩ, Topẽ vĩ mẽ jé, ag tỹ Jesus Cristo ki ge kỹ nỹtĩn kỹ. Hã ra ag mré ke ag tóg ag vóg kónãn tĩ, Israel ag. Kỹ ãjag mré ke ag tóg ãjag vóg kónãn tĩ gé. Hã kỹ ãjag tóg ag kóm vẽsỹrénh mũ gé.
15 Israel ag pãꞌi ag vỹ Jesus tén, ẽg Senhor ti. Topẽ vĩ tó tĩ ag kãgtén ag tóg tĩ gé. Kỹ ag tóg ẽg vóg kónãn tĩ gé sir. Hã ki ag tóg Topẽ jũ han tĩ.
16 Hã kỹ ag tóg inh mỹ: “ker fóg ag mỹ vĩ hẽꞌ,” he tĩ. “Ker kanhgág ag mỹ Topẽ vĩ tó hẽꞌ, ag krenkren tũ nĩ jé,” he tóg tĩ. Hã ki ag tóg Topẽ vĩ mranh kãn tĩ. Hã kỹ Topẽ tóg ag to jũ mũ sir. Kỹ tóg ag vóg kónãn kãn ke mũ gé sir, vẽnh kaja jé.
Paulo krĩ kufy
17 Inh kanhkãꞌ, isỹ ãjag vég tũ nĩn kỹ tóg inh mỹ e tĩ. Hã kỹ sóg fe kaj nĩ. Tãg ti nĩ ver, sỹ ãjag ve ja ti. Hã ra inh pijé ãjag kã jatuꞌ he mũꞌ. Ãjag ve sór tãvĩ inh nĩ, kỹ sóg ãjag to kãtĩg kren.
18 Isỹ ãjag to kãtĩg ke vẽ vẽ, hã ra Satanás vỹ inh kato tẽ. Kar kỹ sóg to jykrén mãn, hã ra Satanás vỹ inh kato tẽ mãn. Hã kỹ sóg ãjag tá jun ja tũ nĩ, inh, hã vỹ: Paulo, he mũ.
19 Ãjag hã to sóg jykrén mũ, Jesus tỹ ãjag hã ki inh jykre ve jé, ti kãtĩg mãn kỹ. Ãjag tỹ ti vĩ ki króm kỹ tóg vég mũ, inh rãnhrãj ti. Ãjag hã to inh fe tóg mrin ke mũ. Ãjag hã ki sóg tỹ ũn mág nĩnh mũ, Jesus mỹ.
20 Ãjag hã tugrĩn sóg tỹ ũn mág nĩ. Ãjag hã tugrĩn tóg inh mỹ sér tĩ.
