Tessalônica tá ke ag mỹ carta ve 3:1-13
3 Ãjag to sóg jykrén mág tĩ, hã kỹ sóg Timóteo jẽnẽ ja nĩ, ti tỹ ãjag ve jé, isỹ ẽmã tỹ Atenas tá nĩn kỹ. Ti mỹ sóg: “ha inh ré kỹ tĩg, sỹ inh pir mỹ tag kã nĩ jé,” he ja nĩ. “Ag hỹn ne han mũꞌ?” he sóg mũ, isỹ ãjag to krĩ kufy ja nĩn kỹ.
2 Timóteo vỹ tỹ Jesus mré ke nĩ. Hã kỹ tóg Cristo kãmén tĩgtĩ, inh ri ke. Kỹ tóg ãjag tá jun kỹ ãjag jyvẽn ja nĩ. Ãjag fe tỹ háꞌ he ja tóg nĩ, ãjag tỹ Jesus ki rã tovãnh tũ nĩ jé.
3 “Hẽn ri ke mũn ag hỹn krĩ kufy nỹtĩ, ag jagãgtar mũn kỹ,” he ja sóg nĩgtĩ ãjag to. “Ag mré ke ag ne tóg ag vóg kónãn mũꞌ, Topẽ jykre toꞌ,” he ja sóg nĩgtĩ. Hã ra sóg ãjag mỹ tó ja nĩ, ẽg jagãgtar ke ti, Topẽ jykre to.
4 Isỹ ãjag mré nĩ mũ ẽn kã sóg ãjag mỹ: “ti tugrĩn ẽg jagtar ke mũ,” he ja nĩ. Hã ve ja ãjag tóg nĩ.
5 Hã kỹ sóg Timóteo jẽnẽ, isỹ ãjag to krĩ kufy ja nĩn kỹ. “Ag mỹ Topẽ tovãnh tũ nĩ vỹ?“ he ja sóg nĩ. “Ẽg krĩn kónãn tĩ ẽn mỹ ag krĩn tũ nĩ vỹ? Ti tỹ ag krĩn kónãn kỹ sóg fagrĩnh mỹ ag mỹ tó ja nĩ mỹrꞌ,” he ja sóg nĩ.
Timóteo tỹ Paulo krĩ kuprãg
6 Hã ra tóg sir inh ki jun mãn mũ, ãjag ve kar kỹ. Ãjag kãmén tóg mũ, kỹ inh fe tóg mrin ke mũ sir. “Jesus ki ge to tar ag nỹtĩ. Jagnẽ to há ag nỹtĩ. Ã mĩ ẽkrég ag tóg tĩ. Ã ve sór ag tóg tĩ. Ã tỹ ag ve sór ri ke han ag tóg tĩ,” he tóg mũ inh mỹ.
7 Kỹ inh krĩ tóg kãnhvyꞌ he mũ sir. Inh jagtar mũ ra inh fe tóg háꞌ he mũ sir, ãjag tỹ Jesus ki ge kỹ nỹtĩn kỹ.
8 Ãjag tỹ ti to tar nỹtĩn kỹ tóg inh mỹ inh rĩr mãn ri ke nĩ
9 Topẽ mỹ sóg vĩ há han mũ sir, ãjag to. Inh fe vỹ mrin ke mũ.
10 Kuty kar ki sóg ti mré vẽmén tĩ, kurã kar ki ke gé. Sỹ ãjag ve sór nĩn kỹ sóg Topẽ mỹ isĩg ke to vĩ tĩ, sỹ ãjag tar han sór kỹ, ãjag tỹ ti ki rã to tar nỹtĩ jé.
11 Ẽg jóg tỹ Topẽ tỹ inh mỹ: “ha ag venh tĩg,” hen kỹ tóg inh mỹ sér tĩnh mũ, Jesus ti ke gé, ẽg Senhor ti.
12 Ti hã mỹ sóg to vĩ tĩ, ti tỹ ãjag tỹ jagnẽ to há tãvĩ han jé. Jagnẽ to há ãjag nỹtĩ. Ti hã vỹ ãjag tar han ke mũ, ãjag tỹ vẽnh kar to há nỹtĩ to tar nỹtĩ jé, isỹ ãjag to há nĩ ri ke.
13 Kỹ sóg ti mỹ to vĩ tĩ gé, ti tỹ vẽjykre há to ãjag tar han jé. Kejẽn ẽg Senhor tỹ Jesus vỹ kãtĩg mãn ke mũ, ti tũ kar ag mré. Ẽg jóg tỹ Topẽ tỹ ũri ãjag kykũnh kỹ ãjag tóg kurã ẽn kã ti rĩnja tá jãnhkri nỹtĩnh mũ.
