Tessalônica tá ke ag mỹ carta ve 4:1-18
4 Inh kanhkãꞌ, vãhã sóg ãjag mỹ nén ũ tó sór mũ gé. Ẽg Senhor tỹ Jesus rĩnve sóg ãjag jyvẽn sór mũ. Ãjag mỹ sóg ti jykre tó huri, ãjag tỹ ti japry jagma mũ há han jé, ãjag tỹ Topẽ mỹ há nỹtĩ jé. Kỹ to tar nỹtĩm nĩ.
2 Tag kãmén sór isóg mũ ãjag mỹ, ẽg Senhor tỹ Jesus tỹ inh mỹ: “tag tóm nĩ,” he ja nĩn kỹ.
3 Topẽ vỹ ãjag to jykrén, ãjag tỹ ti jykre hã han jé. Kỹ ãjag prũ tũ fag mré nỹ tũg nĩ, ãjag mén tũ ag mré nỹ tũg nĩ gé.
4 Ãjag tỹ ãjag prũ fi mré nỹ kỹ fi mré nỹ há han nĩ, Topẽ jykre han jé. Kỹ ẽprã ke ag vỹ ãjag to jykrén kónãn ke tũ nĩ gé. Fi tỹ prũg kónãn tũg nĩ.
5 Fi to én kónãn tũg nĩ gé, ãjag prũ fi to. Ũ tỹ Jesus ki rã tũ ag jykre han tũg nĩ. Ũ tỹ Topẽ jykre ki kagtĩg ag jykre han tũg nĩ, ãjag prũ fi to. Fi tỹ prũg há han nĩ.
6 Ãjag régre tỹ nén ũ to én tũg nĩ. Ti tũ vẽ mỹr. Kỹ ti tũ ki Topẽ vĩ mranh tũg nĩ. Topẽ hã ne tag to jũ tĩꞌ. Kỹ ãjag régre tỹ nén ũ vóg tũg nĩ gé. Ãjag tỹ ti tũ vóg kỹ Topẽ vỹ ãjag vóg ke mũ gé, ti kajãm jé. Tag tó sóg huri ãjag mỹ, hã ra sóg tó mãn mũ gé.
7 Ẽg tỹ vẽnh kavénh kỹ ẽg tóg Topẽ jykre han tũ nĩgtĩ mỹr. Ti jykre vỹ kuryj nỹ. Ẽg tỹ tỹ ti tũ nỹtĩ hã jé tóg ẽg kuprẽg.
8 Ẽprã ke vĩ pijéꞌ, sỹ ãjag mỹ nén tó mũ tag tiꞌ. Topẽ vĩ vẽ mỹr. Ãjag tỹ inh vĩ tag han tũ nĩn kỹ ãjag tóg Topẽ vĩ mranh mũ. Ti kuprĩg tỹ tóg inh jagrẽ han ja nĩꞌ, kỹ tóg tỹ ãjag jagrẽ han ja nĩ gé.
9 Nén ũ to ãjag tar nỹtĩ, hã vỹ: jagnẽ to há, he mũ. Hã kỹ sóg tag to ãjag mỹ rán mág han ke tũ nĩ. Topẽ vỹ ãjag kanhrãn, ãjag tỹ jagnẽ jagãgtãn ken ki.
10 Ga tỹ Macedônia tá ke kar ag to ãjag há nỹtĩ, Jesus mré ke kar ag to ke gé. To tar nỹtĩm nĩ. To krónh ke tũg nĩ, ãjag tỹ tỹ Jesus mré ke nỹtĩn kỹ.
11 Vãsãn nĩ, ãjag tỹ jatun mỹ nỹtĩ jé, jatun mỹ ãjag rãnhrãj han jé. Ãjag rãnhrãj pẽ ẽn to tar nỹtĩm nĩ, hã jé sóg ãjag jyvẽn ja nĩ. Kỹ sóg to ãjag jyvẽn mãn mũ, ãjag rãnhrãj to.
12 Kỹ nén ũ vỹ ãjag mỹ tũꞌ henh ke tũ pẽ nĩ. Ãjag tỹ ãjag rãnhrãj to nén ũ kar ve kỹ tóg há tĩ, ũ tỹ ãjag mỹ nén ũ nĩm tũ nĩ jé, fagrĩnh mỹ.
Ũ ter kỹ fỹ mág tũg nĩ
13 Inh kanhkãꞌ, sỹ nén ũ ki ãjag kanhrãn há tóg tĩ gé, ha mẽ. Ẽg mré ke ũ ag tóg hur kãgter. Kỹ fỹ mág tũg nĩ, ag jé. Jesus ki ge tũ ag ri ke han tũg nĩ. Ag ter kỹ ag tóg nén ũ há venh ke tũ nĩ. Hã kỹ ag tóg fỹ mág tĩ. Hã ra tóg ẽg mỹ ge tũ nĩ.
14 Jesus vỹ ter ja nĩ. Kar kỹ tóg rĩr mãn ja nĩ. Hã ri ke ti nĩ, Jesus ki ge mũ ag kãgter ti. Topẽ vỹ ẽg han mãn ke mũ, Jesus tugrĩn, ẽg tỹ ti mré nỹtĩ jé sir.
15 Ẽg Senhor vỹ inh kanhrãn. Ti jẽnky ki tóg kutẽ, sỹ tónh ke tag ti, ha mẽ. Ver ẽg rĩnrĩr nỹtĩ. Hẽn ri ke mũn ẽg kãgter kãn ke tũ nĩ, ti kãtĩg ken jo. Kỹ ẽg tóg ti kãtĩg venh mũ sir. Hã ra ẽg tóg ũn kãgter mũ ag jo mũnh ke tũ nĩ. Ag hã mré ẽg tóg mũnh ke mũ.
16 Ti kãtĩg vỹ ge nĩnh mũ, ha mẽ. Tére jé tóg ke mũ, kanhkã tá. Kỹ Topẽ tỹ jẽgnẽ jafã ag pãꞌi mág vỹ prẽr ke mũ sir. Topẽ tỹ vãkyn jafã vỹ mẽ há tĩnh mũ, trombeta ẽn ti. Kỹ ũn kãgter mũ ag vỹ rĩnrĩr mãn mũ sir, Jesus mré ke ag.
17 Kar kỹ ẽg tóg ag mré jãprynh mũ gé, ẽg tỹ ti kãtĩg ke jo kãgter tũ ra, ũn rĩnrĩr mãn mũ ag mré. Kanhkã góg kã mĩ ẽg tóg jãprynh mũ. Kỹ ẽg tóg ẽg Senhor kato tẽgtẽnh mũ sir, kanhkã krẽm. Kỹ ẽg tóg ti mré nỹtĩnh mũ sir. Ti ré kỹ ẽg mũ mãn ke tũ nĩ sir.
18 Tag tóm nĩ jagnẽ mỹ, ãjag krĩ tỹ kãnhvyꞌ he jé, ũn kãgter mũ ag to.
