Timóteo mỹ carta ve 6:1-21
6 Tá ke ag kã mĩ ũ tóg tỹ patrão camarada nỹtĩ. Kỹ ũ ag patrão vỹ Cristo ki kagtĩg nĩ. Ag jé ag patrão tũ ki rĩr há han. Kỹ ũ tóg ẽg to vĩnh ke tũ nĩ, Topẽ to, ag tỹ vẽjykre há han kỹ.
2 Ũ ag patrão vỹ Cristo ki rã kỹ nĩ. Kỹ ag jé ti to é he tũg. Ti tỹ ẽg mré Jesus ki rã kỹ Jesus vỹ ti to há nĩ. Kỹ tóg ũn vẽsỹrénh mũ ag jagãgtãn tĩ, ag patrão ti. Kỹ tóg há tĩ, ti camarada ag tỹ ti tũ ki rĩr há tãvĩ han kỹ. Tag tóm nĩ, vẽnh kar mỹ. Tag tỹ ag jyvẽn nĩ.
Ón kỹ Topẽ kãmén tĩ ag
3 Ũ tóg vyr mỹ jykrén kỹ nén ũ tó sór tĩ. Topẽ vĩ rán kỹ nĩ ẽn tó sór tũ tóg nĩgtĩ. Ẽg Senhor tỹ Jesus Cristo tỹ nén tó mũ ẽn tovãnh kỹ tóg nĩ ha, vẽnh vĩ há ẽn, Topẽ jykre ẽn.
4 “Ũn mág vỹ tỹ inh nĩ,” he tóg tĩ. Hã ra tóg jykre tũ nĩ. Kaga ti nĩ, krĩ vẽnh mỹ ti nĩ. Hã kỹ tóg fagrĩnh mỹ vĩ tĩgtĩ. Ti vĩ tugnĩn jagnẽ tũ ki vẽꞌĩ vỹ kutẽ tĩ, jagnẽ to jũ ke gé, jagnẽ to vĩ kónãn, jagnẽ to jykrén kónãn,
5 jagnẽ mỹ féfén ke gé. Krĩ tũ nỹtĩ ve ag nĩ. Vẽnh vĩ há ki kagtĩg ag nỹtĩ. Kỹ ag tóg ón kỹ Topẽ kãmén to rikon sór nỹtĩ.
6 Hỹ, Topẽ to ẽg riko nỹtĩnh mũ, ẽg tỹ ẽprã rikon sór tũ nỹtĩn kỹ.
7 Ha vé, ẽg mur mũ kã ẽg tóg tỹ nén ũ tũ mur, kỹ ẽg tóg ẽg ter kỹ ẽg tỹ nén kar tovãnh kỹ tĩg mũ gé.
8 Kỹ tóg há tĩ, ẽg tỹ ũri vẽjẽn mré ẽg kur ven kỹ, tag tãvĩ.
9 Ẽg tỹ riko nỹtĩ sór kỹ tóg inh mỹ ẽg tỹ Topẽ vĩ mranh ha mẽ tĩ. Kãnhmar ẽg tóg nén ũ to énꞌ, nén ũ to énꞌ he tĩ, kỹ tóg inh mỹ tag tỹ ẽg kókén ha mẽ tĩ. Kỹ ẽg tag to nũgme ki vár ke mũ. Pijé há nĩꞌ.
10 Ẽg tỹ jãnkamy mág to én kỹ ẽg tóg nén ũ kórég kar han sór tĩ. Vẽjykre kórég vẽ. Tag to ũ ag tóg Jesus ki rã tovãnh huri, kỹ ag tóg vẽsỹrénh mũ ha, ag tỹ jãnkamy mág to há nỹtĩ tugnĩn.
à rãnhrãj ki rĩr há han nĩ
11 Ag jãvo ã hã vỹ tỹ Topẽ tũ nĩ. Kỹ vẽjykre kórég tag tovãnh kãn. Ã tỹ nén han ken hã vẽ, hã vỹ: vẽjykre kuryj, he mũ, Topẽ kamẽg mũ, ti ki rã kỹ tĩ, vẽnh kar to há nĩ, he mũ, komẽr hã vĩ, he mũ gé.
12 Ẽg tỹ ti ki rã kỹ ẽg tóg ti jykre to vãsãn ke mũ, ẽg tỹ ka kunũnh sór kỹ to vãsãn ri ke. To tar nĩm nĩ, ã tỹ ẽg rĩr krỹg ja tũ ve jé. Tag hã to tóg ã jé prẽr, Topẽ ti. Kỹ ã tóg vẽnh kar mỹ tó ja nĩ gé, kurã ẽn kã. Ũn e ag vỹ ã vĩ ẽn mẽgmẽ. Kỹ to tar nĩm nĩ.
13 Sỹ ã jyvẽn sór vẽ, kỹ Topẽ vỹ mẽnh mũ. Ti hã ne nén kar rĩnrĩr han tĩꞌ. Kỹ Jesus Cristo vỹ inh vĩ mẽnh mũ gé. Ti hã ne vẽnh kãmén há hanꞌ, pãꞌi tỹ Pôncio Pilatos ẽn mỹ.
14 Sỹ tag tó sór vẽ, ã mỹ, ha mẽ: ã rãnhrãj ki rĩr há han nĩ. To krónh ke tũg nĩ. To kygnẽ sór tũg nĩ gé. Tag han kỹ ẽg Senhor tỹ Jesus Cristo tỹ vỹn ke ẽn jãvãnh nĩ.
15 Ti kurã ki Topẽ vỹ ti mỹ: “ha tĩg,” henh ke mũ. Topẽ vỹ ti pir mỹ tỹ nén ũ kar kri ke nĩ. Kỹ ẽg tóg ti hã mỹ vĩ há han ke mũ. Pãꞌi kar kri tóg tỹ pãꞌi nĩ. Ũn mág kar kri tóg tỹ ũn mág nĩ.
16 Ti hã ne ti pir mỹ ter ke tũ nĩꞌ. Ti hã ne jẽngrẽ kã kã nĩ nĩꞌ. Tá ẽg jun ke tũ nĩ. Ẽprã ke ũ vỹ ti ve ja tũ nĩ gé. Kỹ ẽg tóg ti venh ke tũ nĩ gé. Ti hã ne tỹ ũn mág nĩꞌ. Ti hã ne tar nĩꞌ. Tũꞌ henh ke tũ ti nĩ, ti tỹ tỹ ũn mág nĩ ti. Hã vẽ.
Ẽprã ũn riko ag
17 Ẽprã ũn riko ag mỹ tóm nĩ, ag tỹ vẽso: “tỹ inh ũn riko pẽ nĩ,” he tũ nĩ jé. Ag riko vỹ kãnhmar tũꞌ henh ke mũ. Ag jé Topẽ hã ki nén ũ kar ve sór. Ti hã vỹ ẽg mỹ nén ũ kar nĩm tĩ, ẽg fe tỹ mrin ken jé.
18 Ũn riko ag jé vẽjykre kuryj han. Ag jé ag tũ tỹ vẽnh kãpãm. Ag jé ũn jagãgtar ag jagãgtãn to krónh ke tũg.
19 Ag tỹ nén ũ há kar han kỹ ag tóg kanhkã tá riko nỹtĩnh mũ. Kanhkã tá ag tóg ag tũ vin han ke mũ. Kỹ ag tóg ẽg rĩr krỹg ja tũ venh ke mũ gé. Ã tỹ ẽprã ũn riko ag mỹ tónh ken hã vẽ.
20 Timóteoꞌ, ã tỹ Topẽ vĩ mẽ ja ẽn kã jatun tũg nĩ. Ki króm nĩ, to jykrén kỹ. Ũ ag tóg fagrĩnh mỹ vẽmén mág han sór tĩ. Ón kỹ ag tóg: “vẽnh vĩ há vỹ jagnẽ kato tẽ tĩ,” he tĩ. Hã ra ag tóg fagrĩnh mỹ vĩ tĩ. Ag vĩ mẽ sór tũg nĩ.
21 “Ki kanhró ẽg nỹtĩ,” he ag tóg tĩ. Hã ra ag tóg Topẽ ki rã tovãnh huri. Kórég ag nỹtĩ.
Topẽ mỹ sóg to vĩ tĩ, ti tỹ ãjag tỹ ti to tar han jé.
Hã vẽ.
