Pedro tỹ carta han vén 2:1-25
2 Hã kỹ ãjag jykre kórég tovãnh kãn nĩ. Ón mãn tũg nĩ. Ũ lograr he mãn tũg nĩ. Ũ tũ to én mãn tũg nĩ. Ũ to vĩ kónãn mãn tũg nĩ gé.
2 Nẽnẽ vỹ leite kron (ka)mẽ nĩgtĩ. Topẽ vĩ vỹ ẽg mỹ gĩr sĩ pafa mũ ẽn ri ke nĩ. Kãnhmar vẽnh vĩ há ẽn mẽ mãnꞌ, mẽ mãnꞌ hem nĩ. Kỹ ãjag tóg mog há han ke mũ, ãjag krenkren jé.
3 Hã kỹ tóg: “ki kanhrãn sĩ han ãjag tóg huri, ẽg Senhor tỹ tỹ ũn há tãvĩ nĩn ki,” he ja nĩ, Topẽ vĩ rá ki.
4 Ẽg Senhor to kãmũ jẽg. Pó ri ke ti nĩ. Ðn han mũ ag tỹ pó fón mũ ẽn ri ke ti nĩ. Hã ra tóg rĩr jẽ, ẽg Senhor ti. Ag tỹ ti fón mũ ra tóg Topẽ mỹ há tãvĩ nĩ, pó kar ag há kãfór.
5 Kỹ ẽg tóg pó ri ke nỹtĩ gé. Kỹ Topẽ kuprĩg vỹ ẽg tỹ Topẽ ĩn ri ke han ke mũ, pó tỹ ĩn ẽn ri ke. Kỹ ti tỹ ãjag mỹ nén han sór mũ to: “he,” hem nĩ. Jesus Cristo vỹ ãjag tar han sór mũ, ãjag tỹ ti tũ ki rĩr há han jé. Vãsỹ Topẽ tũ ki rĩr tĩ ag tỹ ti mỹ nén ũ kar pũn ja ẽn ri ke tóg nĩ sir, ẽg tỹ Jesus tũ han kỹ.
6 Hã kỹ tóg: “pó há kuprẽg inh,” he mũ. “Kỹ sóg tỹ ĩn nũna ri ke han, tá. Ũ tỹ ti ki rã kỹ tóg venh ke mũ, Topẽ tỹ nén tó mũ ẽn ti,” he tóg, Topẽ vĩ rá ki.
7 Ãjag hã to tóg rán kỹ nĩ, ti vĩ tag, ãjag tỹ ti ki ge kỹ nỹtĩn kỹ. Kỹ tóg ũ tỹ ti kato vãsãnsãn mũ ag to: “pó tỹ ĩn han jafã fón ag tóg, pó tỹ ĩn han tĩ ag,” he mũ. “Hã ra Topẽ tóg pó ẽn hã tỹ ĩn nũna han mũ,” he tóg, Topẽ vĩ rá ki.
8 Kỹ tóg: “pó ẽn tỹ ag tóg krĩm ke tĩ. Kỹ ag tóg pó ẽn tỹ krĩm krĩm ke kỹ vár mũ sir,” he mũ gé. Ũ tỹ Topẽ vĩ kri fi sór tũ ag hã vỹ tỹ krĩm krĩm ke tĩ. Topẽ tỹ nén han hã vẽ gé.
9 Ãjag hã kuprẽg tóg, ãjag tỹ tỹ ti tũ to pãꞌi mág nỹtĩ jé, ãjag tỹ tỹ ti povo nỹtĩ jé, vyr mỹ. Ãjag kuprẽg tóg, ãjag tỹ ti tỹ nén han mũ kãmén jé, ti jykre tar ti. Vãsỹ ãjag tóg kuty mĩ mũ ja nĩgtĩ. Hã ra tóg ãjag tatĩ kãtĩg, ãjag tỹ ũri kurã mĩ mũ jé, jẽngrẽ mĩ.
10 Ãjag pijé vãsỹ tỹ ũ tũ ja nỹtĩgtĩꞌ. Ũri ãjag tóg tỹ Topẽ povo nỹtĩ, ti tũ. Ãjag pijé vãsỹ Topẽ tỹ ãjag jagãgtãn sór mũ tag mẽ ja nĩgtĩꞌ. Ũri tóg hã ra ãjag jagãgtãn, Topẽ ti.
Jesus tỹ vẽjykre pãno to ẽg kygvãn
11 Inh kanhkãꞌ, tag ki ẽg tóg ẽg mré ke tũ ag jamã mĩ mũgtĩ. Ẽg jamã pijéꞌ, ga tag tiꞌ. Hã kỹ sóg ãjag jyvẽn mũ. Ãjag tỹ nén to én mũ ẽn han sór tũg nĩ. Ãjag kókén jé tóg ke mũ. Kỹ ãjag tóg ẽg Senhor tovãnh sór ke mũ, ha vem nĩ.
12 Jesus ki ge tũ ag kã mĩ ãjag tóg nỹtĩ. Hã kỹ vẽjykre há tãvĩ han nĩ. Ãjag to ón sór ag tóg tĩ. Ãjag to ag tóg: “jykre pãno ag nỹtĩ,” he sór tĩ. Kỹ vẽnh kar tỹ ãjag jykre há ve kỹ ag ón ẽn tóg ve há tĩnh mũ. Kỹ ag tóg: “Topẽ jykre vỹ há nĩ,” henh ke mũ, hẽn ri ke mũn, Topẽ tỹ ag kutãn kỹ.
13 Ẽg Senhor to há ãjag tóg nỹtĩ. Ti to há nỹtĩn kỹ ẽprã ãjag pãꞌi ag vĩ ki króm nĩ gé. Pãꞌi mág pẽ tỹ imperador ẽn vĩ ki króm nĩ, vẽnh kar mỹ tỹ ũn mág ẽn vĩ ti.
14 Ti krẽm pãꞌi ag vĩ ki króm nĩ gé, governador ag. Pãꞌi mág pẽ ẽn tỹ vin mũ ag vẽ, ag tỹ ũn jykre pãno ag vóg kónãn jé, ag tỹ ũn jykre há ag to vĩ há han jé gé.
15 Ũ tỹ ki kagtĩg ag vỹ ãjag to vĩ kónãn tĩ. Kỹ nén ũ há tãvĩ hã han nĩ. Kỹ ag tỹ ãjag kato ne tónh ke tóg tũ tĩnh mũ, ha vem nĩ. Tag vỹ há nĩ, Topẽ mỹ.
16 Cristo vỹ ẽg kygvã, vẽjykre pãno to. Kỹ han mãn sór tũg nĩ. To: “inh kava ti huri, Cristo ti. Hã kỹ sóg jatun mỹ han ke mũ, isỹ nén to én mũ kar ti,” he tũg nĩ. Topẽ tũ vỹ tỹ ẽg nỹtĩ. Kỹ ti jykre hã han nĩ.
17 Ẽprã ke ũ to é he tũg nĩ. Ẽg mré Jesus ki ge kỹ nỹtĩ ag kar to há nỹtĩm nĩ. Topẽ kamẽg nĩ. Ẽprã ke tỹ pãꞌi mág tỹ imperador ẽn kamẽg nĩ gé.
Ẽg tỹ Cristo ri kén jagtar nỹtĩnh ke
18 Ãjag kã mĩ ũ ag tóg patrão mỹ rãnhrãj tĩ, fagrĩnh mỹ. Kỹ ag vĩ ki króm nĩ, ag kamẽg nĩ. Ãjag kã mĩ ũ patrão vỹ há nĩ, komẽr hã tóg ãjag mỹ vĩ tĩ. Ãjag tỹ ti to há nỹtĩn kỹ tóg há tĩ. Ãjag kã mĩ ũ patrão tóg kórég nĩ. Ẽn to vĩ há han nĩ gé, ge ra. Ti kamẽg nĩ gé.
19 Kejẽn tóg fagrĩnh mỹ ãjag to jũnh ke mũ, ãjag tỹ Topẽ jykre han sór mũ to. Ge ra ti to jũ tũg nĩ. Kỹ Topẽ tóg ãjag mỹ vĩ há han ke mũ.
20 Kejẽn ãjag patrão tóg ãjag tỹ kygnẽ to ãjag mrãnmrãn tĩ. Tag vỹ tỹ nén ũ tũ nĩ. Ti tỹ ãjag jykre há to ãjag mrãnmrãn kỹ Topẽ tóg ãjag mỹ vĩ há han ke mũ.
21 Hã jé Topẽ tóg ãjag kuprẽg.
Cristo vỹ ẽg jagfy vẽsỹrénh gé, mỹr, ha mẽ. Ti vẽsỹrénh tugrĩn ẽg tóg ti to tar nỹtĩnh mũ, ẽg tỹ kejẽn ti ri kén jagtar nỹtĩnh ken kỹ.
22 Nén ũ kórég han ja tũ ti nĩ. Ũ pijé ti ón venh ke mũꞌ, ti ón vãnh nĩn kỹ.
23 Ag tỹ ti mỹ vĩ kónãn mũ ra tóg ag mỹ vĩ kónãn ja tũ nĩ. Ag tỹ ti vóg kónãn mũ ra tóg ag mỹ vĩ ja tũ nĩ gé. Topẽ hã mĩ tóg ẽkrén ja nĩgtĩ. “Ti hã ne ag jykre tugnỹm ke mũꞌ, inh jykre ti ke gé,” he ja ti nĩ, Cristo ti.
24 Ha vé, Cristo vỹ ẽg tỹ Topẽ vĩ mranh ja ẽn kajãm ja nĩgtĩ. Krunh to sa kỹ tóg ter ja nĩgtĩ. Hã tugrĩn ẽg jykre pãno tóg tũ tĩ ha, ti tỹ tỹ tũꞌ hen kỹ. Vẽjykre há hã han jé ẽg tóg ti ki ge kỹ nỹtĩ. Ti vẽsỹrénh tugrĩn ẽg tóg tỹ ũn há nỹtĩ.
25 Vãsỹ ẽg tóg vẽnh mẽg tỹ carneiro vãgfor ri ke nỹtĩ ja nĩgtĩ. Hã ra tóg hur ẽg tatĩ kãtĩg, ẽg vãgfor ja ra, Jesus ti. Kỹ ẽg tóg ti mré mũ mũ sir, carneiro fag tỹ ag ki rĩr tĩ mré mũ ri ke. Ti hã ne ẽg ki rĩr nĩ haꞌ.
