Pedro tỹ carta han vén 3:1-22
3 Sỹ ũn tỹtá fag jyvẽn hã vẽ, ha mẽ. Ãjag mén jykre mĩ mũm nĩ. Hã ra ãjag kã mĩ ũ fi mén vỹ hẽn ri ke mũn Topẽ ki rã tũ nĩ ver.
2 Ge ra ti ki rĩr há han nĩ. Ti tỹ ã jykre há ve kỹ tóg hẽn ri ke mũn Jesus ki rã sór ke mũ, ã tỹ ti mỹ nén ũ tó tũ ra.
3 Ãjag tỹ vẽsĩnvĩ han jé ãjag jykre sĩnvĩ han vén nĩ, hã vỹ: komẽr hã vĩ, he mũ, vĩ mág tũ, he mũ. Mré hã ãjag há ki rĩr há han nĩ gé, ãjag gãnh, ãjag kur, nén sĩnvĩ kar ti.
4 Vẽjykre sĩnvĩ tag vỹ há nĩ, Topẽ mỹ, kỹ tóg tũꞌ henh ke tũ nĩ gé.
5 Gen kỹ fag tóg nỹtĩ ja nĩgtĩ gé, ẽg mỹnhꞌmỹnh ve fag, Topẽ tũ fag, ũ tỹ Topẽ ve sór ja fag. Fag mén jykre hã mĩ fag tóg mũ ja nĩgtĩ,
6 Sara fi ke gé. Abraão jykre mĩ fi tóg tĩ ja nĩgtĩ, hã kỹ fi tóg ti to: “inh kri ke vẽ,” he ja nĩgtĩ. Kỹ vẽjykre há hã han nĩ. Ũ tỹ ãjag tỹ vẽjykre há han kamẽg mũ ra ge ra han nĩ. Kỹ ãjag tóg tỹ Sara fi krẽꞌkrẽ fag ri ke nỹtĩ.
7 Kỹ sóg ag jyvẽn sór mũ gé. Ãjag prũ fag ki rĩr há han nĩ, ha mẽ. Fag pijé ãjag tar ri ke nỹtĩꞌ. Topẽ tóg fag mỹ rĩr krỹg ja tũ ẽn nĩm ke mũ gé, ag ri ke. Ãjag tỹ ãjag prũ fag ki rĩr há han kỹ ãjag tóg jatun mỹ Topẽ mré vẽmén ke mũ.
Ẽg tỹ kejẽn Cristo jykre to jagtar ke
8 Vãhã sóg ãjag mỹ: “jagnẽ mré vẽjykre pir han nĩ,” he mũ. “Ũ fỹ kỹ ti mré fỹm nĩ. Ũ mỹ sér tĩn kỹ ti mré mỹ sér nĩm nĩ. Jagnẽ to há tãvĩ nỹtĩm nĩ. Jagnẽ mré komẽr hã vĩm nĩ. Jagnẽ kãfór han sór tũg nĩ.
9 Ũ tỹ ãjag mỹ nén ũ kórég han mũ ra ti mỹ nén ũ kórég han tũg nĩ. Ũ tỹ ãjag mỹ vĩ kónãn mũ ra ti mỹ vĩ kónãn tũg nĩ gé. Vẽnh kajãm sór tũg nĩ. Vẽnh kar to Topẽ mỹ: “ag ve há han nĩ,” hem nĩ. Topẽ vỹ ãjag ve há han sór mũ, hã jé tóg ãjag kuprẽg.
10 Hã kỹ tag tóg rán kỹ nĩ, ha mẽ: “ãjag mỹ jatun mỹ nỹtĩ sór mũꞌ, nén ũ kar tỹ ãjag mỹ sér tĩ jéꞌ? Kỹ vĩ kónãn mãn tũg nĩ. Ón mãn tũg nĩ gé.
11 Vẽjykre pãno han mãn tũg nĩ, vẽjykre há hã han nĩ, vẽnh kar krĩ tỹ kãnhvyꞌ he sórm nĩ gé. Tag hã to vãsãn nĩ.
12 Ẽg Senhor vỹ ũ tỹ vẽjykre kuryj han mũ ag ki rĩr há han mũ. Ag tỹ ti mỹ nén ũ to vĩn kỹ tóg ag vĩ mẽg mũ. Hã ra tóg ũ tỹ vẽjykre pãno han mũ kato tẽ tĩ, Topẽ ti,” he tóg, Topẽ vĩ rá ki.
13 Ũ vỹ ãjag mỹ nén ũ kórég han ke tũ nĩ, ãjag tỹ vẽnh kar mỹ nén ũ há han sór kỹ.
14 Kejẽn ãjag tóg hã ra vẽjykre há tugrĩn vẽsỹrénh ke mũ, Topẽ vĩ tugrĩn. Kỹ mỹ sér nỹtĩm nĩ. Ẽprã ke ag kamẽg tũg nĩ. Ag vĩ jẽmẽ sór tũg nĩ, ag tỹ ãjag tỹ ti tovãnh han sór mũ ra.
15 “Cristo vỹ tỹ inh pãꞌi nĩ, kỹ sóg ti hã kamẽg tĩ,” hem nĩ. Tag hã mĩ ẽkrén nĩ. Kejẽn ũ tóg ãjag mỹ: “ne to ke nẽ, hã vỹ: Cristo ki rã, he mũ?“ he tĩ. Ẽn mỹ kãmén kãn nĩ.
16 Ũ tỹ ge mỹ komẽr hã vĩm nĩ. Topẽ vỹ vég nĩ nĩ, ãjag tỹ ti mỹ nén tó mũ ẽn ti. Fe kavéj nỹtĩ sór tũg nĩ. Kỹ ãjag tóg ũ tỹ Cristo jykre to vĩ kónãn sór mũ ag vĩ tỹ tũꞌ henh ke mũ, ha vem nĩ.
17 Kejẽn ãjag tóg vẽjykre há to jagtar ke mũ, Topẽ tỹ tag to jykrén kỹ. Hã ra tóg há nĩ. Ãjag tỹ vẽjykre kórég to jagtar nỹtĩn kỹ tóg kórég nĩ.
18 Cristo hã to jykrén nĩ, ha mẽ. Ter ja tóg nĩ, ẽprã ke ag tỹ Topẽ mỹ név nỹtĩ tugrĩn. Ti ter pir ki tóg kajãm kãn. Jykre kuryj tóg nĩ, Jesus ti, hã ra tóg ũn jykre pãno ag jagfy ter ja nĩ. Ti tỹ Topẽ mỹ ẽg tatĩn tĩg sór vẽ. Ti tén ja ag tóg nĩ, hã ra Topẽ kuprĩg vỹ ti rĩn mãn.
19 Topẽ kuprĩg vỹ ti tar han, kỹ tóg vẽnh kuprĩg ag jamã ra vyr gé, ag mỹ Topẽ vĩ sér tó jé, vẽnh kuprĩg sigse kỹ nỹtĩ ag mỹ.
20 Vãsỹ ag tóg ti vĩ mẽ sór ja tũ nĩgtĩ, vẽnh kuprĩg sigse kỹ nỹtĩ ẽn ag. Noé tỹ ga kri tĩg kỹ barco mág han mũ ẽn kã ke ja vẽ. Ẽn kã Topẽ tóg ver ag to fe nĩ ja nĩ, kỹ tóg ag vóg kónãn jãvãnh ja nĩ ver. Noé tỹ barco han kãn kar tóg ag vóg kónãn mũ sir. Kỹ ũ tỹ 8 (ke) ag hã vỹ krenkren, barco ẽn kã ki.
21 Goj tỹ ãjag tóg kygpe kỹ nỹtĩ, ãjag krenkren jé. Barco tỹ goj kri tĩg ri ken hã vẽ, hã vỹ: batismo, he mũ. Ãjag mro pijéꞌ. Topẽ tỹ ẽg fe kavéj tỹ jãnhkriꞌ he to ken hã vẽ. Ẽg tỹ Topẽ mỹ vẽnh fẽg to ken hã vẽ. Topẽ vỹ Jesus Cristo rĩn mãn ja nĩ, hã kỹ tóg ẽg krenkren han ke mũ gé.
22 Kanhkã tá tóg nĩ nĩ, Jesus ti. Kỹ tóg Topẽ pẽgja tá nĩ nĩ. Tá tóg tỹ ũn mág nĩ, Topẽ tỹ jẽgnẽ jafã ag kri, ũn tar kar ag kri, ẽg tỹ kanhkã tá ũn vég tũ kar ẽn ag mré hã. Vẽnh kar kri ke vỹ tỹ ti nĩ, Jesus ti.
